Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anjo lapung Karaeng Ahas, iami ana’ bura’nena Yotam, cucunna Uzia. Ri wattunna ia ammarenta ri Yehuda, kajariammi bunduka. Rezin karaeng Siria, siagang Pekah ana’ bura’nena Remalya karaeng Israel, battui ambunduki Yerusalem. Mingka takkulleai nabeta ke’nanga anjo kotaya.
2 Nalangngere’na karaeng Yehuda angkanaya antamami pasukang Siria a’jari agang ri daerana Israel, a’jari sanna’mi malla’na siagang bansana, sa’genna annekkere’ rapang poko’ kayu nige’gosoka ri anging.
3 Nakanamo Batara ri Yesaya, "Erangi ana’nu Syear Yasyub nampa a’lampako mange angngagangi sicini’ Karaeng Ahas. Lanugappai antu ri cappa’ solongang kollang bageang rateang, tampa’na sikamma pasassaya anjama.
4 Pauangi anjo karaenga angkana musti sadia-sadiai, mingka tuli sannangi. Teami mallakki yareka lingui. Anjo larrona Karaeng Pekah siagang Karaeng Rezin siagang anjo tantarana tu Siria, tena nalompoangngang bahayana na ruaya cappa’ kayu tunuang a’rumbua.
5 Assikongkolo’mi Siria siagang Israel na karaenna.
6 Eroki ke’nanga ambunduki Yehuda siagang ampakamalla’-mallaki pandudu’na sollanna ero’ a’jari agang mae ri ke’nanga, nampa naangka’ ana’ bura’nena Tabeel a’jari karaeng.
7 Mingka iNakke, Batara, angkana tena nalakajariang anjo kammaya,
8 lanri anjo Siria tena nakassakkangngang na ibukotana iamintu Damsyik, kammayatompa anjo Damsyik tena nakassakkangngang na Karaeng Rezin. Nampa lalanna annampulo allima taung, lata’bage-bagei Israel sa’genna takkulleami attahang a’jari se’re bansa.
9 Anjo Israel tena nakassakkangngang na Samaria, iamintu ibukotana, kammayatompa anjo Samaria tena nakassakkangngang na Karaeng Pekah. Punna tena nuttojeng-tojeng tappa’ mae ri Nakke, mattantu tena nukkulle lattahang."
10 Nia’ pole pappasang maraeng Napabattu Batara mae ri Ahas, iamintu:
11 "Palaki sollanna nasareko pammatei Karaeng Allata’alanu, tanranna battua irawa ri lino kamateanga yareka tanra battu ratea ri langika."
12 Appialimi Ahas angkana, "Tena kuppala’ tanra. Tena kuero’ anso’ri Batara."
13 Nampa nakanamo Na’bi Yesaya, "Punna kamma, pilangngeri he turunganna Daud! Tenaka nangganna’ le’ba’na nuso’ri kasa’barranna rupataua, sa’genna nuso’ri todong kasa’barranNa Allata’alaku?
14 Kamma-kamma anne, KalenNa Batara lassare tanra mae ri kau: Nia’ sallang sitau tulolo latianang siagang allassukang sitau ana’ bura’ne, lanaarenga Imanuel.
15 Ri wattunna lompo-lompomo, siagang akkullemi angngalle kaputusang kalenna, lakala’biangi anjo pa’rasanganga.
16 Saba’ ri wattu tenanapa narapiki anjo wattua, anjo ruaya pa’rasangang nukamallakkanga karaenna, lanibokoi ri taua sa’genna a’jari kosong.
17 LaNapabattui Batara karaeng Asyur, nampa ikau siagang sikontu kaluarganu, kammayatompa ra’ya’nu, lanakasiaki allo-allo kasessang la’bi hebakkangngang nale’baka nukasia’ baku’ le’ba’na ta’bage kakaraengang Israel siagang Yehuda.
18 Anjo wattua laNakioki Batara tu Mesir siagang tu Asyur, nampa battumo anjo ruaya bansa rapang katingalo siagang bani angkatulungi sikamma ka’bung lantanga siagang alla’-alla’na batu karanga. Lanatongko’ ngasengi ke’nanga sikamma romang katintinga kammayatompa sikamma tampa’ niaka ruku’na.
19 (7:18)
20 LaNasewai Batara karaeng Asyur anggauki Israel rapang tukang cukkuru’ ancukkuru’ ngasengi uu’na siagang sikamma bulu-bulu kalenna tu Israel.
21 Anjo wattua, punna nia’ sitau ammarakai sikayu sapi rungka siagang ruang kayu bawang bembe,
22 anjo dadi’na olo’-olo’ piaraya la’bi ri gannaka untu’ ri tau niaka tassesa ammantang ri anjo pa’rasanganga. Tojeng, langnginungi ke’nanga dadi’ siagang bani.
23 Anjo wattua sikamma koko anggoro’ massing nilamungia tassisa’bu poko’ anggoro’ siagang nianggaraka sisa’bu doe’ pera’, lanitimboi ri romang katinting.
24 Tau eroka a’lampa mange anjoreng musti angngerangi pana siagang anrong pana, saba’ sikontu anjo pa’rasanganga rassi romang katinting.
25 Siagang daera moncong biasaya nijama siagang nilamungi, rassi tommi romang katinting, sa’genna tenamo nabarani taua mange anjoreng. Ia mami matu-matunna anjo buttaya iamintu a’jari pangnganreang ruku’na sapia siagang gimbalaka."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA