Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rato Ahas reya pottrana Yotam, bajana Uziya. E bakto Rato Ahas marenta Yehuda, badha perrang. Rezin, rato Siria, ban Pekah pottrana Remaliya rato Isra’il, nyerrang Yerusalim. Tape se kadhuwa jareya ta’ ahasel arebbu’ kottha jareya.
2 E bakto rato Yehuda meyarsa ja’ pasukan Siria la maso’ ka baba kakobasa’anna Isra’il menangka kanca, rato Yehuda jareya ban ra’yadda laju katako’en, sampe’ padha ngetter akantha kajuwan se etongngo’ angen.
3 PANGERAN adhabu ka Yesaya, "Kassa’ ba’na entar ka Rato Ahas, giba Sye’ar Yasyub ana’na. Ba’na bakal tatemmowa ban Ahas jareya e konco’na sellogan li-giliyanna taman se paleng attas, e lorong kennengnganna kang-tokang panatu alako.
4 Kabala ka rato sopaja terros asadhiya, tape paggun pakalem. Ta’ osa tako’ otaba bingong. Kapeggellanna Rato Pekah ban Rato Rezin sarta tantarana reng-oreng Siria rowa babajana pera’ padha ban tomper dhadhuwa’ se gi’ ngokos.
5 Siria asakongkel ban Isra’il sarta ratona.
6 Reng-oreng jareya nyerranga Yehuda ban ko’-nako’ana reng-oreng e jadhiya sopaja padha’a nolonge Siria; saellana jareya ana’na Tabe’el pas epadaddiya rato.
7 Tape Sengko’, PANGERAN, ngoca’ ja’ jareya ta’ kera kalakon,
8 sabab kakowadanna Siria ta’ lebbi dhari kakowadanna Damsyik, ibu kotthana, ban kakowadanna Damsyik ta’ lebbi dhari kakowadanna Rato Rezin. Dineng e dhalem bakto sabidak lema’ taon, Isra’il bakal eca’-pecca’a sampe’ ta’ ekenneng sebbut bangsa pole.
9 Isra’il ta’ akowadan dhari Samaria, ibu kotthana, ban Samaria ta’ lebbi kowat dhari Rato Pekah. Mon ba’na ta’ pate parcaja ka Sengko’, tanto ba’na ta’ kera kowat."
10 PANGERAN apareng pessen laen pole ka Ahas,
11 "Ba’na nyo’on sopaja GUSTE Allahna apareng tandha ka ba’na, ta’ tao apa tandha jareya dhari dunnyana oreng mate e baba otaba dhari langnge’ e attas."
12 Saodda Ahas, "Kaula ta’ nyo’ona tandha. Kaula ta’ nyoba’a PANGERAN."
13 Atorra Nabbi Yesaya, "Manabi saka’dhinto, ngereng peyarsa’agi, toronanna Rato Daud! Ponapa ta’ cokop junandalem ngoji kasabbaranna manossa, me’ junandalem ngojiya kasabbaranna Allah abdidalem jugan?
14 Samangken, Pangeran dibi’ se aparenga tandha ka junandalem: Badha paraban bubut, badhi alahirragi pottra lalake’ se eparengngana nyama Immanuwil.
15 E bakto kana’ gapaneka ampon cokop omorra kaangguy motose dibi’ parkara ponapa’a saos, nagara gapaneka bakal ma’mora.
16 Sabab sabellunnepon bakto gapaneka napa’, nagara dhadhuwa’ se eparenta to-rato se ekatako’e junandalem gapaneka bakal kosonga tadha’ orengnga.
17 PANGERAN madhatengnga rato Asyur, junandalem sakalowarga sareng ra’yadda bakal ngalamana karekongan se alebbiyan dhari sadaja se ampon oneng ealame junandalem molae peccana karaja’an Isra’il sareng Yehuda.
18 E bakto gapaneka PANGERAN bakal aparenga tandha nembali oreng Messer sareng oreng Asyur, se padha dhatengnga akadi lala’ sareng nyarowan dhari nagarana, ngaromo’a ra-cora se durjet sareng ke’-lekke’na bato karang, notobi but-ombut se bannya’ dhurina sareng lon-talon se bannya’ rebbana.
19 (7:18)
20 E bakto gapaneka Pangeran badhi nyewa’a rato Asyur se badhi mamosna’a bangsa Isra’il akadi tokang cokor se nyokor sadajana obu’ e cethak sareng sadajana bulu e badan.
21 E bakto gapaneka, manabi badha oreng tane se gi’ gadhuwan sape se gi’ ngodha settong sareng embi’ dhadhuwa’,
22 powan se ehasellagi keban se tatello’ gapaneka gi’ lebbi dhari cokop kaangguy karena reng-oreng se gi’ badha e nagara ka’dhinto. Lerres, reng-oreng gapaneka bakal ngenoma powan sareng maddu.
23 E bakto jareya, bun-kebbun anggur se bang-sebangnga etamenne saebu bungkana anggur se argana saebu pesse salaka, bakal etombuwana ombut se adhuri.
24 Oreng se entar ka jadhiya kodu ngeba gandhiba ban pana, sabab saantero nagara possa’ ban ombut se adhuri.
25 Ban dhaera pagunongan se biyasana emen-tamenne, padha topo ban ombut se adhuri keya, sampe’ oreng ta’ bangal entar ka jadhiya. Tana jareya pera’ ekenneng gabay kennengnganna sape ban dumba ngamba."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA