Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ise do in, na roh hun Edom, marhiou sigerger hun Bosra, marmulia marpakeian, luar ibagas hinagok ni gogohni? Ahu do, sihatahon hapintoron, na margogoh paluahkon.
2 Mase gerger pakeian-Mu, anjaha hiou-Mu songon hiou ni halak sipardogei anggur ibagas kilang anggur?
3 Sahalak Ahu do na mardogei ibagas kilang ai, seng dong humbani bangsa-bangsa hasoman-Ku. Domma bois Hulotloti sidea ibagas ringis-Ku, anjaha domma Hurosaki sidea ibagas ringis-Ku; marbirsak do daroh ni sidea bani hiou-Hu, gabe butak ganup pakeian-Ku.
4 Tongon, domma Huputuskon ari pambalason, anjaha roh ma tahun haluahon na hun Bangku.
5 Mangkawah Ahu, hape seng dong na mangurupi. Longang Ahu, halani seng dong na ra mangkasomani Ahu. Jadi tangan-Ku mando pangurupi Bangku, anjaha ringis-Ku mangkasomani Ahu.
6 Domma Hurojati bangsa-bangsa ibagas ringis-Ku, anjaha mabuk Hubahen sidea ibagas ringis-Ku; Huuseihon do daroh ni sidea hu tanoh.
7 Sai baritahononku do ganup dear ni layak ni Jahowa, pambahenan habanggalon ni Jahowa, domu hubani haganup na binahen ni Jahowa banta, ampa buei ni dear ni layak-Ni hubani ginompar ni Israel, na binahen-Ni bani sidea romban hu bani idop ni uhur-Ni, domu hubani hinagok ni dear ni layak-Ni.
8 Ai nini do, “Tongon, bangsang-Ku do sidea, anak na so ra marladung.” Jadi Ia do gabe Sipaluah bani sidea, ibagas sagala hasosakan ni sidea.
9 Sedo suruhan atap malekat, tapi bohi-Ni do na paluahkon sidea; marhitei holong ni atei-Ni ampa idop ni uhur-Ni do sidea ipaluah; iabing do sidea anjaha iusung tongtong humbani sapari.
10 Tapi marbalik do sidea anjaha isunsahi Tonduy-Ni Na Pansing in; halani ai mubah do Ia bani sidea gabe munsuh, anjaha Ia sandiri marporang dompak sidea.
11 Dob ai mardingat ma bangsa-Ni bani panorang sapari, bani si Musa juakjuak-Ni ai, nini sidea, “Ija do Ia, na mambuat humbagas bah siparmahan bani hulananni? Ija do Ia, na dob mamberehon Tonduy-Ni marianan ibagas dirini,
12 na mambahen tangan-Ni na marmulia in mardalan bani ianan ni si Musa, na mambolah bah ai i lobei ni sidea, laho mambahen goran Bani sadokah ni dokahni,
13 na manogu-nogu sidea mamontas laut na bagas, songon huda na mardalan i halimisan, seng tartolsu?”
14 Songon pinahan na tuad hu habungan, sonai do ibere Tonduy ni Jahowa parsaranan bani sidea. Sonai do pambobai-Mu bani bangsa-Mu, laho mambahen Bamu goran na marmulia.
15 Mangkawah ma Ham hun nagori atas, anjaha tatap Ham ma humbani ianan-Mu na pansing anjaha na marmulia in! Ija do pongut ni uhur-Mu pakon hagogohon-Mu? Sihol ni uhur-Mu ampa holong ni atei-Mu mandaoh-daoh do humbangku.
16 Tongon, Ham do Bapanami, ai seng itanda si Abraham hanami, anjaha si Israel pe seng ipabotoh-botoh hanami. Ham do ale Jahowa, Bapanami, humbani sapari do goran-Mu Sitobus hanami.
17 Ham Jahowa, mase ipaturut Ham hanami manlembang humbani dalan-Mu? Mase ipahengkeng Ham uhurnami gabe seng marhabiaran hanami Bamu? Marulak-ulakan ma uhur-Mu halani juakjuak-Mu, halani marga parbagianan-Mu.
18 Tongkin do bangsa-Mu marrupei bani ianan-Mu na pansing in; munsuhnami do mandogei-dogei ianan hapansingon-Mu.
19 Gabe doskon bangsa na so ongga ginomgoman-Mu do hanami, doskon halak na so ongga marpanggorankon goran-Mu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA