Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Ise kin kam, si reh i kota Bosra, i negeri Edom nari? Ise kin kam si ruisken uis mejile, megara rupana, si erdalan alu kuasa ras gegeh?" Nina TUHAN, "Aku kap enda, TUHAN si erkuasa ngkelini; Aku reh meritaken kemenangenKu."
2 "Ngkai maka bage kal garana rupa uisndu, bali ras rupa uis kalak si ngerik buah anggur?"
3 Nina TUHAN ngaloi, "Sabap bangsa-bangsa nggo Kuerik bagi buah anggur, janah la lit ise pe si nampati Aku. Perban nembehna ateKu nggo Kuerik ia, janah darehna mbincar ku uisKu.
4 Nggo Kutetapken maka paksana nggo seh lako ngkelini bangsangKu; nggo seh paksana ngukum musuh-musuhna.
5 Jengang kal Aku, sabap tupung Kutatap ku sekelewetKu, la lit ise pe reh nampati Aku. Tapi perban rawana ateKu, megegeh Aku, janah menang Aku alu la ise pe nampatisa.
6 Erkiteken rawangKu, Kuperjati kerina bangsa-bangsa janah Kuripukken, darehna Kuamburken ku taneh."
7 Ateku nuriken kerna kekelengen TUHAN si la lit sibarna, kupuji Ia, erkiteken kasa kai si nggo IbahanNa. Man bangsa Israel nggo mbue kal pasu-PasuNa, erkiteken KekelengenNa si tetap ras perkuah AteNa.
8 Nina TUHAN, "BangsangKu kap ia, emaka labo banci Aku itipuna." Erkiteken si e ikelinina bangsa e
9 i bas kerina kiniseranna nari. Labo malekat, tapi TUHAN jine kap si ngkelinisa. Erkiteken KekelengenNa ras perkuah AteNa, IpulahiNa bangsa e. I bas paksa si nggo lepas lalap ipekena-KenaNa ia,
10 tapi ilawanna TUHAN janah ceda kal ate TUHAN ibahanna. Erdandanken si e TUHAN erkusur jadi imbangna, janah iperangi TUHAN bangsa e.
11 I jem teringet bangsa e kempak paksa si nggo lepas, kempak Musa, suruh-suruhen TUHAN nai, janah nina, "I ja genduari TUHAN si ngkelini peminpin-peminpin BangsaNa i bas lau lawit nari? I ja kin TUHAN si mereken KesahNa si badia man Musa?
12 I ja kin TUHAN, si ngelakoken perbahanen si mbelin alu KuasaNa arah Musa? Erbelah IbahanNa lau lawit jenari ItaruhkenNa BangsaNa arah lau si mbages e, gelah datca gelar si termur-mur seh rasa lalap." Arah penegu-negu TUHAN, perdalanna paguh desken kuda i mbal-mbal janah la pernah tertuktuk.
13 (Yes 63:12)
14 Desken rarasen lembu si igera ku baluren si mehumur, bage me TUHAN mereken pengadi-ngadin man BangsaNa. Itegu-TeguNa BangsaNa erkiteken si e ermulia GelarNa.
15 O TUHAN, tatap min kami i Surga nari, InganNdu si badia dingen mulia. I ja kin kuasa ras KinimbisanNdu? I ja kin kekelengen ras perkuah AteNdu? I ja dage PusuhNdu si rusur ertedeh ate nandangi kami? Ula min Kam ndiri-ndiri ngenehen kami.
16 Ma Kam kin Bapa kami? Abraham ras Jakup labo nandai kami. TUHAN, Kam nge si tuhuna Bapa kami, si ngkelini kami i bas paksa si nuria nari.
17 Ngkai maka ipediat kam kami papak? Ngkai maka ibahan Kam ukur kami mersik, seh maka lanai kami mbiar nimbak? Mulihlah Kam TUHAN, erkiteken suruh-SuruhenNdu, erkiteken nai nari bangsa e SikerajangenNdu.
18 Ngkai maka IpediatNdu musuh merjaki RumahNdu si Badia, ngkai maka IbereNdu kami sempat itabanna?
19 Kami tempa-tempa la pernah IrajaiNdu, tempa-tempa kami la BangsaNdu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA