Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Appiali anjo bansaya nakana, "Inai tappa’ ri apa le’baka nalangngere’ ikambe? Inai le’ba’ nipa’nyatang koasaNa Batara?
2 Nakaerokangi Batara sollanna a’jari rapang cu’la’ anjo atanNa attimboa ri butta rosoka. Tena baji’-baji’ ri ia lanicini’; tena apa-apa lakkulle ningai ri ia.
3 Nihinai siagang nililiangi, tau tuli sessaya siagang biasaya antanggongi pa’risika. Tena manna sitau ero’ anciniki, siagang ikatte tena todong nijampangi.
4 Sikontutojenna garrinta natanggongi, pa’risitta napisa’ringi, nampa nikapang angkana anjo hukkunganNa Allata’ala mae ri kalenna.
5 Mingka nilokoki lanri dosa-dosata ngaseng, nisessai passabakkang kaja’dallanta. Ia nihukkung sollanna ikatte nipasalama’, lanri bokka’ bate cambo’ nakasiaka nakinipammolle.
6 Ikatte sala oloang ngaseng maki’ rapang gimbala’ massing naboya kalennai oloanna. Iami Napitujui Batara sikontu kaja’dallanta ngaseng.
7 Ia nigau’ nikapallakki, mingka sa’baraki ampisa’ringi. Tamakkana-kanayai rapang ana’ gimbala’ nieranga mange ri pammolongang yareka anrong gimbala’ nicukkuruka bulunna.
8 Nitahangi siagang niadeli, nampa nierang mange nihukkung mate. Tena anjampangi sarenna; matei lanri dosana bansata.
9 Nipasitarawangi siagang tau ja’dalaka; jera’na niaki ri tangnga-tangngana tau kalumanynyanga, manna natale’bakka a’gau’ ja’dala’, siagang tale’bakai annipu."
10 Batara angkaerokangi sollanna nakasiaki passessaya, siagang napassareang kalenna untu’ a’jari koro’bang pa’lu’lu’na dosaya. Na lala’bu umuru’na siagang naciniki turunganna tete ri kalenna na Napa’jari Batara apa Nakaerokia.
11 Lanri kammana anjo Nakana Batara, "Punna le’baki sessa napakamma nipa’risi, lamate’nei siagang lasukku’ baji’mi pakkasia’na. Anjo atangKu, napakasannangi atingKu, le’ba’mi natanggongi hukkunganna tau jaia; lanri ia naKupammopporang ke’nanga.
12 Rellai ampassareangi katallassanna nantama’ ri bilanna tau ja’dalaka. Natanggongi dosana tau jaia nappala’ doang sollanna nipammopporang ke’nanga. Jari Kusaremi tau jai a’jari hadia, siagang para anggappami bageang siagang sikamma tau annabaya."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA