Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bangsa jareya ajawab, "Sapa se parcaja ka se ekaedhing sengko’ ban tang bangsa reya? Sapa se tao nangale’e kobasana PANGERAN?
2 PANGERAN terro sopaja abdina padha’a ban selbi’na bu-tombuwan se tombu e tana kajal. Tadha’ apana se lebur eabas, tadha’ apana se materrowan atena sengko’ ban ba’na.
3 Sengko’ ban ba’na ya-nyeya ban ajauwi oreng se talebat nyangsarana ban biyasa nanggung sake’. Tadha’ oreng se endha’ ngabas ka oreng jareya, sengko’ ban ba’na ta’ parduli keya.
4 Sanyatana panyakedda sengko’ ban ba’na se etanggung salerana, kasangsara’anna sengko’ ban ba’na se manyangsara salerana. Mangkana sengko’ ban ba’na nyangka kasangsara’anna jareya okomanna Allah ka salerana.
5 Tape salerana elokae polana sa-dusana sengko’ ban ba’na, epeccot polana kajahadanna sengko’ ban ba’na. Salerana eokom sopaja sengko’ ban ba’na epasalamedda, polana lampadda peccot se dheng-malandheng e kole’na, sengko’ ban ba’na padha epabaras.
6 Sengko’ ban ba’na padha ban dumba se ta’ tao jalan, padha nyare jalanna bang-sebang. Kajahadanna sengko’ ban ba’na bi’ PANGERAN epapekol ka salerana.
7 Salerana eseksa ce’ kejjemma, tape sabbar nanggung seksa’an jareya. Salerana ta’ makalowar sowara pa-apa akantha budhu’na dumba se egiba ka pajagalan, otabana korbina dumba se ecokor buluna.
8 Salerana etahan ban eadili, pas eeret laju eokom mate. Tadha’ se marduli ka kabadha’anna; salerana seda polana dusana sengko’ ban ba’na.
9 Salerana esareyagi epapolong ban oreng jahat; pasareyanna badha e nga’-tengnga’anna makamma oreng sogi, maske salerana ta’ tao alako juba’, ban ta’ tao lecegan."
10 PANGERAN se ngasokane salerana nanggung sangsara, ban massra’agi salerana menangka kurban palebbaranna dusa. Daddi salerana bakal lanjanga omorra ban ngoladana toronanna, kalaban parantara’anna kasokanna PANGERAN bakal kalakona.
11 Daddi PANGERAN adhabu, "Samarena nanggung sangsara, aba’na bakal sennengnga. Tang abdi jareya, se masenneng Tang ate, la nanggung okomanna oreng se bannya’; polana Tang abdi jareya Sengko’ nyapora’a dusana reng-oreng jareya.
12 Kalaban ehlas Tang abdi jareya massra’agi odhi’na, ban tamaso’ bilanganna oreng daraka. Tang abdi jareya mekol dusana oreng se bannya’ ban adu’a sopaja reng-oreng daraka jareya esapora. Daddi bi’ Sengko’ Tang abdi jareya eberri’i oreng sabannya’na menangka hadiyah, ban eberri’ bagiyan apolong ban reng-oreng se teppa’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA