Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Edhingngagi sengko’, ra-nagara se badha e jauna, edhingngagi pateppa’ tang caca reya. PANGERAN nembali sengko’ sabellunna sengko’ lahir ka dunnya, Pangeran mele sengko’ molae sengko’ egandhu’ ebu.

² Bi’ Salerana tang caca epatajem akantha peddhang, bi’ astana dibi’ sengko’ ejaga sopaja salamedda. Sengko’ epadaddi akantha pana se egangse, esempen e bungbung sopaja to-sabakto ekennenga angguy.

³ Dhabuna ka sengko’, "Ba’na Tang abdi; Sengko’ bakal eagungngagiya polana ba’na."

⁴ Tape sengko’ mator, "Abdidalem lesso tadha’ ollena; abdidalem alako ngettokkagi kakowadan, namong parcoma!" Tape sengko’ yakin PANGERAN abillai tang ha’, Allah males sengko’ menorot tang lalakon e dunnya.

⁵ Sabellunna lahir ka dunnya, sengko’ etembali PANGERAN epadaddi abdina, epamakompola ommat Isra’il sopaja ommat jareya abali ka Salerana. PANGERAN se madaddi sengko’ ehormadi oreng, Allah reya tang kakowadan.

⁶ PANGERAN adhabu ka sengko’, "Badha lalakon se lebbi raja se kodu elakone ba’na, Tang abdi; ba’na banne pera’ mabaliya re-karena toronanna Yakub ban mabaliya kaagunganna ku-suku Isra’il, tape bi’ Sengko’ epadaddiya keya terrangnga sa-bangsa, sopaja saantero dunnya padha epasalamet."

⁷ Allah se socce panyalamedda Isra’il adhabu ka reng-oreng se talebat eya-seya, ban se ekabaji’i sa-bangsa, sarta daddi abdina para pangobasa, "To-rato bakal nangaleyana Tang lalakon; bakal jaga’a ngormada ka Sengko’. Para pangobasa bakal nangaleyana keya, laju asojud nyemba ka Sengko’." Jareya kalakon polana PANGERAN la mele abdina; Allah se socce se esemba Isra’il esto ka dhabuna.

⁸ PANGERAN adhabu ka ommadda, "E bakto Sengko’ kenceng, Sengko’ ajawaba. E are bakto Sengko’ masalamet, Sengko’ nolonga ba’na. Bi’ Sengko’ ba’na enaonge ban ejaga, ban epadaddi parjanjiyan ka sa-bangsa. Nagara se seppe bi’ Sengko’ epabali one, epadaddi tana sangkol se ekennengnge oreng.

⁹ Oreng se epenjara bi’ Sengko’ esoro kalowar; se badha e pettengnga bi’ Sengko’ egiba ka kennengngan se terrang. La’-mala’ e gumo’ se gundhul reng-oreng jareya ta’ kakorangan, e salanjangnga lorong badha kakanan.

¹⁰ Reng-oreng jareya ta’ kera pelka’ otaba lapar, e sagara beddhi ta’ kera kapanasan. Sabab Sengko’, se taresna ka reng-oreng jareya, bakal nontona aba’na ka ber-somber se lebbur aengnga.

¹¹ Sengko’ agabaya lorong se lebat e pagunongan, sakabbinna Tang lorong raja eparata’a.

¹² Tang ommat padha dhateng dhari jauna, dhari dhaja, bara’ ban Sinim e lao’."

¹³ Mara anyanye langnge’, mara asorak bume, mara asorak pagumbira, nong-gunong kabbi! Sabab PANGERAN rabu alepor ommadda, Salerana bellas ka ommadda se taseksa.

¹⁴ Tape pandhudhu’ Yerusalim ngoca’, "PANGERAN la adinggallagi sengko’ ban ba’na, PANGERAN la ta’ emot ka sengko’ ban ba’na."

¹⁵ PANGERAN ajawab, dhabuna, "Ba’ bisa’a ebu se loppa ka ana’na, ban ta’ neser ka ana’na dibi’? Maske badha ebu se loppa ka ana’na, Sengko’ ta’ loppa’a ka ba’na!

¹⁶ Yerusalim, Sengko’ enga’ terros ka ba’na; nyamana ba’na bi’ Sengko’ eoker e pa’-dapa’na Tang tanang.

¹⁷ Reng-oreng se maddegga ba’na bakal duli dhatengnga, ban se maancor ba’na bakal nyengla’a.

¹⁸ Abas ban pandeng e sakalenglengnga ba’na, ra’yadda ba’na akompol nyander ka ba’na. Bit Sengko’ dibi’, Allah se odhi’, Sengko’ ngoca’a, onggu, ba’na bakal gumbira’a polana pandhudhu’na, akantha pangantan bine’ se gumbira polana pareyasanna.

¹⁹ Nagarana ba’na se kajal ban seppe, sateya la talebat cope’ kaangguy reng-oreng se terro ngennengngana. Ban reng-oreng se maancora ba’na la padha ondur ka jauna.

²⁰ Na’-kana’ se lahir e pambuwangan bakal ngoca’a ka ba’na, ‘Nagara reya ce’ cope’na ka sengko’, berri’i sengko’ kennengngan sopaja sengko’ bisa enneng e dhinna’.’

²¹ Ba’na pas bakal ngoca’a e dhalem atena, ‘Sapa se alahirragi na’-kana’ reya kaangguy sengko’? Tang ana’ kabbi gu ta’ la elang, ban sengko’ ta’ bisa andhi’ ana’ pole? Sengko’ ebuwang ban epanyengla, edina kadibi’an kantha reya. Daddi, dhari dhimma na’-kana’ jareya, ban sapa se maraja sampe’ kantha jareya?’"

²² GUSTE Allah Se Mahatenggi adhabu ka ommadda, "Sengko’ aberri’a tandha ka sa-bangsa ban reng-oreng jareya tanto mamole na’-ana’na ba’na; ana’ lalake’anna ba’na bakal egindhunga, ana’ babine’anna bakal esongguya.

²³ To-rato bakal padha’a ban eppa’ ka ba’na, ban ju-dinaju rato bakal kantha’a ebuna. To-rato ban dinajuna jareya bakal asojuda ngormat ba’na, maasor aba’ e adha’na ba’na. Daddi ba’na bakal taowa ja’ Sengko’ PANGERAN; oreng se ngarep Tang partolongan ta’ kera epaastaba."

²⁴ Ba’na atanya, "Ba’ bisa’a barang rampasan ekala’ dhari tanangnga pahlawan, otabana tawanan erebbu’ dhari tanangnga oreng se kejjem atena?"

²⁵ PANGERAN ajawab, "Jareya se bakal kadaddiyana. Tawananna para pahlawan bakal erebbu’a pole, barang rampasanna oreng kejjem bakal ekala’a pole. Sabab Sengko’ dibi’ se amoso ban mosona ba’na; Sengko’ masalamedda na’-ana’na ba’na.

²⁶ So-mosona ba’na bi’ Sengko’ epamabu’a dhara, daddi laju padha saleng pate’e. Sakabbinna ommat manossa pas bakal taowa, ja’ Sengko’, PANGERAN, panyalamedda ba’na; Se Mahakowat, Allahna Yakub, se nebbus ba’na."

Yesaya

Video Yesaya 49

Ikuti Kami:

KONTAK | PARTISIPASI | DONASI