Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ O negeri-negeri si i tepi lawit, perdiatekenlah; begikenlah katangku, o bangsa-bangsa si ndauh. TUHAN nggo ndilo aku i bas bertin denga pe aku, IpilihNa aku i bas mula jadingku.

² Dilahku IbahanNa entelap bagi pedang, i bas TanNa IbunikenNa aku. IbahanNa aku desken anak panah si entelap, tersusun i bas inganna, sikap guna ipanahken.

³ Nina man bangku, "Kam kap suruh-suruhenKu, o Israel, erdandanken kam, gelarKu terpuji."

⁴ Tapi ningku, "Nggo latih kuakap erdahin, tapi sia-sia kerina; nggo kupekeri gegehku tapi la lit bekasna." Amin bage gia tek aku maka ibela TUHAN nge perkarangku, IberekenNa nge upahku i bas kerina kelatihenku.

⁵ I bas bertin nari pe, TUHAN nggo milih aku, IbahanNa aku jadi suruh-SuruhenNa, lako negu-negu BangsaNa mulih, bangsa Israel si merap marpar. I lebe-lebe mata TUHAN, aku ipermuliaken, Ia kap sumbul gegehku.

⁶ Nina TUHAN man bangku, "O suruh-suruhenKu, lit denga dahin si terbeliden bandu; la cukup terjeng iulihken kam Israel si tading denga, ras ngulihken kehagan man bana, tapi Kubahan ka pe kam jadi terang man bangsa-bangsa, gelah keselamaten seh man bangsa doni kerina."

⁷ Dibata si Badia nu Israel si Penebus, ngataken man kalak si igombangi, si ciga ate kerina bangsa doni, si jadi budak man penguasa-penguasa, "Raja-raja ngidah kam ipulahi, emaka tedis ia lako nghamati; janah pengulu-pengulu pe ngidahsa, emaka nembah mungkuk ia kerina." Si enda jadi erkiteken TUHAN tetap nehken PadanNa, Dibata si Badia nu Israel nggo milih suruh-SuruhenNa.

⁸ Nina TUHAN man BangsaNa, "Adi keselamatenndu nggo seh paksana. Kucidahken perkuah ateKu man bandu janah Kualoi pe nderkuhndu mindo penampat bangKu. Kam Kukawali ras Kujaga, janah arah kam Kubahan perpadanen ras kerina bangsa. Kubere kam ringan mulihi i bas negerindu si nggo melungen genduari.

⁹ Kalak si i bas penjara Kupulahi, janah kalak si i bas gelap, kempak terang Kubabai. Desken rarasen biri-biri, dat gagaten ia gedang-gedang dalan, janah i das uruk si melinang pe la ia kurang nakan.

¹⁰ La ndigan pe ia muas tah kelihen, las matawari i gurun pasir la mereken kiniseran. Sabap Aku, si Perkuah naruhken ia, janah Kubabai ia ku sumbul si erburak-burak launa.

¹¹ Arah deleng-deleng Kubahan pasar mbelin, janah kerina dalan irataken.

¹² BangsangKu reh i bas ingan si ndauh nari, subuk i Utara ras i Barat nari, bage pe i Sinim nari."

¹³ O langit rendelah! O doni ersuraklah alu meriah, o deleng-deleng, alu sora megang, rendelah. Iapuli TUHAN me BangsaNa, mekuah AteNa ngenehen BangsaNa si mesera.

¹⁴ Tapi ngerana kalak Jerusalem, "TUHAN nggo nadingken kita; nggo IlupakenNa kita!"

¹⁵ Emaka erjabap TUHAN nina, "Banci kin nande ngelupaken anakna? Banci kin la keleng atena man anak si ipupusna? Aminna pe nande ngelupaken anakna, tapina Aku la ndigan pe ngelupaken kam kerina.

¹⁶ O Jerusalem, la ndigan pe kam Kulupaken! Sabap i bas tapak-tapak tanKu, gelarndu nggo Kusuratken.

¹⁷ Pedas me reh kalak si manteki kam mulihi, o Jerusalem, janah lawes me kerina kalak si nggo ncedaken kam.

¹⁸ Tatap ku sekelewetndu janah perdiateken kai si jadi; nggo pulung kalak kerina, janah mulih me ia ku kuta genduari. Tuhu-tuhu katangKu bandu, megah me akapndu erkiteken anak kutandu, bali megahna ras singuda-nguda si tersereh, make barang si meherga.

¹⁹ Tanehndu tuhu nggo ceda ras lume, tapi picetsa pagi man ingan kalak si reh ku je. Janah kalak si ncedaken kam gelgel e, ipedauh i bas kam nari pe.

²⁰ Bangsandu si tunduh i negeri pembuangen, i bas sada paksa pagi ngataken, 'Negeri enda kitiksa, perlu denga kita tole taneh man inganta.'

²¹ Emaka nindu pagi i bas ukurndu ngerana, 'I ja nari rehna anak enda kerina? Ise ngenda si mupussa? Ise pebelin-belinca? Anak-anakku nggo keri, aku mupus, lanai banci, aku ibaba ku pembuangen, janah je me aku ringan la erteman. I ja nari dage rehna anak enda kerina?'"

²² Nina TUHAN si Erdolat man BangsaNa, "Kuawatken tanKu jadi tanda man bangsa-bangsa, emaka ibahanna mulih anak-anakndu subuk dilaki bage pe diberu.

²³ Raja-raja desken bapandu, kemberahen-kemberahen bagi nandendu. Kerina ia erjimpuh i lebe-lebendu, ihamatina kam alu ngema tapak-tapak nahendu. Kenca bage, maka itehndu maka Aku me TUHAN; kasa kai kalak si ngarapken penampatKu la kemalun."

²⁴ Lit si nungkun nina, "Banci kin irebutndu barang rampasen i bas kalak si mbisa? Banci kin ipulahindu tabanen kalak si merawa?"

²⁵ Nina TUHAN ngaloisa, "Payo, si eme si nandangi jadi. Tabanen kalak si mbisa nandangi irebut mulihi, barang rampasen kalak si merawa irampas i bas ia nari. Kasa kai musuhndu Aku ngelawanca janah anak-anakndu Kupulahi kerina.

²⁶ Kubahan maka si nindih kam si bunuh-bunuhen, sabap mabuk ia nginem dareh bali ras minem anggur. Kenca bage kerina manusia metehsa maka Aku me TUHAN, Penebusndu. Ietehna maka Aku me Dibata si Mbisa nu Israel."

Yesaya

Video Yesaya 49

Ikuti Kami:

KONTAK | PARTISIPASI | DONASI