Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara, "Pilangngeri, he atangKu Yakub, he Israel, ummakKu Kupilea!
2 INakke Batara ampa’jariako, amparekko baku’ lalannu ri pammanakkanga, siagang antulungko. Teako mallakki, ikaumi atangKu, ummakKu Kupilea siagang Kukamaseanga.
3 Saba’ laKupaturungi bosia ri butta kalotoroka, Kupasolongi binanga-binangaya ri butta rosoka. LaKusarei koasaKu turungannu, siagang Kubarakkaki ana’ cucunnu.
4 Lacoppongi pa’bakka’na ke’nanga rapang ruku’ ri ampi’ je’ne’, rapang poko’ gandarusa ri biring binangaya.
5 Tasse’re-se’re tau lamangakui angkana iNakke ampatangi, na battu asse’re siagang turunganna Yakub. Massing natulisiki ri limanna angkana: Batara Ampatangi, na naareng kalenna anggotana umma’Na Allata’ala."
6 Iaminne kananNa Batara Kaminang Makoasaya, Karaeng siagang pajaga mae ri Israel, "INakke Allata’ala Kaminang Se’re-se’rea, uru-urua siagang kala’busanga.
7 Inaika sangkamma iNakke? Suromi mangaku! Lappassammi napau siagang napa’butti mae ri Nakke! Inai le’ba’ antappu rioloi apa labattua battu ri uru-urua sa’genna kala’busang jammang?
8 He, bansaKu, teako mallakki yareka teako ta’bangkai; sai battu riolo iji sa’genna kamma-kamma anne le’ba’mi Kutappu riolo apa lakajarianga? Kau ngasemmi sa’bi-sa’bingKu. Tena pajaga maraeng siagang tena Kuasseng maraeng."
9 Anjo tau appareka barhala tena matu-matunna, siagang anjo rewata-rewata napakalompoa ke’nanga tena anggaranna. Tau anynyombaya ri anjo patunga butai siagang tena apa-apa naasseng, lanri kammanna lasiri’-siriki ke’nanga napakamma.
10 Sia-siaji taua appare’ patung nampa nisomba a’jari rewata!
11 Tojeng, sikontu tau anynyombaya patung latu’guru’ siri’-siriki. Anjo tau appareka patung tau biasaji. Suromi ke’nanga para maju siagang; mattantu lamallaki siagang lasiri’-siriki ke’nanga.
12 Tukang bassia angngallei sipolong bassi nampa napare’ lalang pepe’ siagang nade’de’ siagang palu-palu bassi. Napareki siagang sikamma kitta’ magassinna. Lalang anjamana, a’jari cipuruki, turerei siagang mangngangi.
13 Tukang kayua naukkuruki kayua. Appareki gambara’ siagang pa’leo’, naukiriki siagang pakkakasa’ nampa napare’ a’jari patung antanja’ tau ga’ga, nampa naboli’ lalang ri balla’na.
14 Anjo kayu napareka nakulle poko’ kayu camara, poko’ kayu eru yareka poko’ kayu terpentin nata’banga ri romang. Nakulle todong a’lamungi poko’ salang nampa natayang bosia ampattimboi.
15 Anjo poko’ kayua nia’ napa’jari kayu tunuang untu’ a’binrung siagang attunu roti yareka allangga dageng, nampa sukku’mo baji’na nasa’ring. A’binrungi na nakana, "Edede, nyamanna siagang kammu’na! Teai sipato’ appakanyamanna anne pepeka!" La’binna anjo kayua napareki patung. Su’juki ri ia nappala’ doang nakana, "Ikaumi allata’alaku, pasalamaka’!"
16 (44:15)
17 (44:15)
18 Tojeng, teai sipato’ dongo’na ngaseng tau kammaya anjo! Natongkoki matanna siagang atinna ke’nanga sa’genna tena apa-apa napahang.
19 Tanarapikai napikkiri’ anjo papare’ patunga angkanaya, "Anjo kayua kutunui sipa’gang, siagang cumi’na kupakei untu’ attunu roti siagang allangga dageng untu’ kukanre. Nampa sesanna anjo kayua kupa’jari patung. Jari kamma-kamma anne anynyomba’ sipolong kayu!"
20 Anjo panggaukang kammaya sangkamma le’baki tau angnganrea au. Anjo taua nipa’lingui ri pikkirang dongo’na, sa’genna takkulleami nitulung. Takkulleami mangaku angkanaya anjo patung niaka ri limanna poro pannipu bawang.
21 Nakana Batara, "U’rangi ngasengi sikammaya anne, he Israel, saba’ ikaumi atangKu. INakke ampa’jariko, na ikau atangKu, Israel, tena nalaKukaluppaiko!
22 Kasalannu Kubongkai rapang rammang, dosanu Kupakabellai rapang saliu’. Ammotere’ mako mae ri Nakke, saba’ le’ba’ mako Kupakabebasa’!"
23 Akkio’ rannuko, he langi’, ma’rannu-rannuko, he bone kambunna buttaya! Akkio’ rannuko, he sikamma monconga! siagang romanga na sikamma poko’ niaka lalang! Saba’ Napappicinikammi Batara kala’biranNa lanri le’ba’na Napasulu’ Israel umma’Na.
24 Kammaminne kananNa Batara Mappasalama’nu ampa’jariako baku’ lalannu ri pammanakkang, "INakkemi Batara ampa’jariai yangasenna niaka, kale-kalennaya angka’rangi langika, tena ambantuA’ naKupa’jari buttaya.
25 INakkemi ampassala-salangi tappu-tappuna pacinika, siagang ampakkarek-karenangi sikamma pabaca-bacaya. Kugeakki kana-kananna tau cara’deka, kacara’dekanna ke’nanga Kupa’jari kadongokang.
26 INakke ampakajarreki kananna atangKu, siagang anggaukangi rancana napa’nyataya tunisuroKu, iNakke angkana lanipammantangngi poleammi Yerusalem, siagang kota-kota Yehuda laKubangung poleangi ammotere’; laKupakabajiki sikamma rumbanganna.
27 INakke angkana mae ri tamparanga: esakko! INakke ampa’jari kalotoroki sikamma binanganu.
28 INakke angkana mae ri Kores, ‘Ikau lammarenta untu’ iNakke, siagang langgaukangi sikontu erokKu. Parentakangi sollanna nibangung ammotere’ Yerusalem, siagang na nipadongko’ batu pundasina Balla’Na Batara.’"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA