Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhabuna PANGERAN, "Yakub, Tang abdi, mara edhingngagi, Isra’il, Tang ommat peleyan, mara gateyagi!
2 Sengko’ PANGERAN se agabay ba’na, se madaddi ba’na molae e dhalem gandhu’anna ebuna, sarta se nolong ba’na. Ba’na ta’ osa tako’, sabab ba’na Tang abdi, Tang ommat peleyan se bi’ Sengko’ ekataresnae.
3 Sabab Sengko’ nyelena aeng ka tana se kerreng, ban magiliya ngay-songay e tana kajal. Sengko’ aberri’a Tang kobasa ka toronanna ba’na, ban aberkadana na’ potona ba’na.
4 Toronanna ba’na bakal tombuwa ce’ daddina akantha rebba e seddi’na aeng se ta’ korang, akantha bungkana gandarusa e penggirra songay.
5 Manossa gan settong bakal ngakowa ja’ aba’na andhi’na Sengko’, ban dhateng akompol ban toronanna Yakub. Kabbi bakal nolesa e tanangnga bang-sebang: Kaagunganna PANGERAN, ban ngoca’ aba’na anggotana ommadda Allah."
6 Areya’ dhabuna PANGERAN Se Mahakobasa, Rato se ajaga kasalameddanna Isra’il, "Sengko’ reya Allah Se Settong, se dha’-adha’ ban se dhi-budhi.
7 Sapa se padha ban Sengko’? Mara, soro ngako! Mara soro ngoca’, soro abukteyagi ka Sengko’! Sapa se aramallagi jaman pagi’, molae dhari parmola’anna sampe’ ka dhi-budhina jaman?
8 Tang bangsa, ba’na ta’ osa tako’ otaba takerjat; gu ta’ molae lamba’ sampe’ sateya Sengko’ la aramallagi apa se kadaddiyana? Ba’na kabbi Tang sakse. Sengko’ ta’ kennal ka laenna se ajaga kasalameddanna ba’na, ban jareya pajat tadha’."
9 Reng-oreng se agabay arca brahala reya tadha’ gunana, ban ba-diba se epojja reng-oreng jareya tadha’ mamfa’adda. Reng-oreng se nyemba arca reya buta ban ta’ tao pa-apa, daddi bakal todhusa.
10 Tadha’ gunana agabay arca eccoran se pas esemba eanggep diba!
11 Onggu, oreng se nyemba arca bakal olleya malo. Oreng se agabay arca reya manossa biyasa. Kodda’ soro kalowar areng-bareng, tanto padha tako’ ban padha todhus kabbi.
12 Pandhi ngala’ besse pas eobbar, laju etette ban tokol. Pas elakone kalaban ngettokkagi sakabbinna kakowadan se badha e dhalem aba’na. Teppa’na alalakon, pandhi jareya pas lapar, pelka’ ban lesso.
13 Tokang kaju ngokor kaju; agambar bangon ngangguy kapor, pas eoker bi’ pakakassa epadaddi arcana manossa se gantheng, pas esaba’ e bengkona.
14 Olle daddi kaju se ekagabay jareya dhari bungkana comara otaba bungkana erru otaba terpentin se epoger e alas. Olle daddi keya oreng jareya namen bungkana sallam se enante’ tombuna e mosem nembara’.
15 Sabagiyan dhari kajuwan jareya ekagabay kaju, eobbar kaangguy maanga’ badanna, epangeppan roti ban epamanggang daging; tokang jareya pas arassa senneng atena. Sambi maanga’ badanna e adha’na kampowan, oreng jareya ngoca’, "Bhu, nyaman onggu, ban anga’ rassana! Apoy reya ce’ nyamanna!" Karena kajuna ekagabay arca. Oreng jareya nondhu’ nyemba arca jareya sambi adu’a, "Junandalem illah abdidalem, parenge salamet abdidalem!"
16 (44:15)
17 (44:15)
18 Budhu onggu reng-oreng se kantha jareya! Mata ban atena topo sampe’ ta’ ngarte pa-apa.
19 Oreng se agabay patung jareya ta’ sampe’ apekker, "Kaju reya bi’ sengko’ sabagiyan eobbar, arengnga epangeppan roti ban epamanggang daging se ekakan sengko’. Karena kajuna bi’ sengko’ ekagabay arca. Daddi, sateya reya sengko’ nyemba ka kaju!"
20 Lalakon jareya padha bai ban ngakan abu. Oreng jareya epasala jalan bi’ pekkeranna se budhu, sampe’ ta’ ekenneng tolong pole. Aba’na ta’ endha’ ngakone ja’ arca se badha e tanangnga jareya sanyatana pera’ tepowan.
21 Dhabuna PANGERAN, "Kaenga’e reya kabbi, ya Isra’il, sabab ba’na reya Tang abdi. Sengko’ agabay ba’na, ban ba’na reya Tang abdi, Isra’il, Sengko’ ta’ kera loppa ka ba’na!
22 Kasala’anna ba’na bi’ Sengko’ epamosna akantha ondhem, dusana ba’na bi’ Sengko’ epaserna akantha bun-arbun. Mara sateya ba’na abali ka Sengko’, sabab ba’na la epabebas bi’ Sengko’!"
23 Mara asorak pagumbira, he langnge’, mara asorak, he bagiyan dhalemma bume! Asorak pagumbira, he nong-gunong! Bariya keya alas ban saneyap kajuwan e dhalemmanna! Sabab PANGERAN la noduwagi kaagunganna kalaban nebbus Isra’il ommadda.
24 Cara reya dhabuna PANGERAN panyalamet ba’na se agabay ba’na molae ba’na badha e gandhu’anna ebuna, "Sengko’ reya PANGERAN se agabay sakabbinna, sengko’ dibi’ se ngampar langnge’, ban se agabay bume ta’ kalaban ebanto sapa’a bai.
25 Sengko’ reya se mabuddhu ramalanna tokang ramal, ban se ngaen-maenan kang-tokang tennong. Cacana oreng se bicaksana bi’ Sengko’ elaban, kabicaksana’anna bi’ Sengko’ epadaddi kabudhuwan.
26 Sengko’ se makoko oca’na Tang abdi, ban ajalannagi rancana se enyata’agi Tang otosan, Sengko’ ngoca’ ja’ Yerusalim ekennengngana pole, ban tha-kottha Yehuda bi’ Sengko’ epaddegga pole; jur-gujuranna bi’ Sengko’ epabaliya akantha asalla.
27 Sengko’ se ngoca’ ka dhasarra tase’: Nyorot! Sengko’ makerrenga ngay-songayya ba’na.
28 Sengko’ se ngoca’ ka Kores, ‘Ba’na se marenta’a abakkele Sengko’, ban ajalannagi sakabbinna Tang karep. Mara parenta’agi sopaja Yerusalim epaddek pole, ban Padalemman Socce esaba’ e dhasarra.’"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA