Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Roh ma hanima ale sipajuh begu-begu anjaha tangar ma hanima pe, ale bangsa-bangsa, bogei ma! Manangi ma tanoh ampa ganup isini, dunia on pakon sagala na tubuh ijin.
2 Ai marringis do Jahowa bani ganup sipajuh begu-begu, anjaha manggila bani ganup bala ni sidea. Hona papa do sidea anjaha iondoskon do sidea hu panayatan.
3 Marsampakan do halak na rasei humbani sidea, muap do bau ni bangkei ni sidea, anjaha dolog malala ibahen daroh ni sidea.
4 Masab do haganup bala ni langit, anjaha igulung songon pustaha langit ai, ganup balani hurleh, songon parmelus ni bulung ni hayu anggur, songon parrurus ni bulung ni hayu ara.
5 Tongon, mabuk do podang-Ku i nagori atas, tonggor ma, turun do ai bani Edom, bani bangsa na pinapaan-Ku laho manguhum ai.
6 Podang ni Jahowa gok do ibahen daroh, marlimur ibahen taboh-taboh, ibahen daroh ni biribiri ampa hambing tunggal, ibahen taboh-taboh ni piah-piah ni biribiri tunggal. Ai Jahowa do na mangadongkon panggalangan i Bosra ampa panambolihan banggal i Edom.
7 Anjaha tompas do lombu jalang rap pakon sidea, sonai lombu ampa lombu jonggi, marbah do tanoh ni sidea ibahen daroh, anjaha marlapu-lapu tanohni ibahen taboh-taboh.
8 Ai Jahowa do na pamasa ari pambalason, tahun marlulu bani Sion.
9 Mubah do bah ni Edom gabe asal, ladangni gabe hirtah, anjaha tanohni gabe aspal na gara.
10 Borngin age arian seng miloh ai, ronsi sadokah ni dokahni do martimpul timusni; marsundut-sundut do tarulang ai, ronsi sadokah ni dokahni, seng dong na montas hunjai.
11 Sitanda ulog ampa landak do simada ai, langkupa ampa kawak do marianan ijai, ai Jahowa do na pagistang sibar-sibar hasedaon ampa tali dondon halungunon i atas ni.
12 Seng dong be raja sipabangkiton ijai, anjaha ganup na sangap-sangap ni sidea gabe na lang.
13 Tubuhan tatada do istanani, latong pakon suga-suga do ibagas bentengni; gabe ianan ni sorigala do ai, panggagatan bani burung unta.
14 Pajumpah do ijai binatang halimisan ampa sorigala, anjaha setan-setan samah setan-setan; tongon, begu borngin do marianan ijai, jumpahsi do parsaranan ijai.
15 Marasar do ijai ulog darih, martolur anjaha iposahi bani na linggom; tongon, marurup do ijai kawak, marsiarah-arahan.
16 Pareksa hanima ma buku ni Jahowa, basa ma: Sada pe lang na tading humbani sidea, sada pe lang na telpang. Ai pamangan-Ni do na mangkatahon ai, anjaha tonduy-Ni do na patumpu-tumpuhon sidea.
17 Ia sandiri do mandabuh ruji-ruji bani sidea, anjaha tangan-Ni do na mambagihon tanoh ai bani sidea marhitei sibar-sibar; ronsi sadokah ni dokahni do sidea manean ai, anjaha marsundut-sundut do sidea marianan ijai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA