Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Umba kirappungang, he bansa-bansaya, pilangngerimi. Lappassammi nabattu ngaseng sikontu buttaya siagang sikontu niaka ammantang ri tompo’na, nampa appilangngeri.
2 Larroi Batara mae ri sikontu bansaya siagang sikontu pasukanna ke’nanga. LaNahukkungi siagang laNaancuruki ke’nanga.
3 Sikamma maya’na ke’nanga tena nalanitarawang, mingka nibalang parekangi sa’genna a’jari a’rasa siagang a’jari botto’. Sikamma monconga la’jari ejai lanri attalaka cera’na.
4 Mataalloa, bulanga siagang sikamma bintoenga laancuruki. Langika lanigulungi sanrapang gulungang karattasa’. Latu’guruki sikamma bintoenga rapang leko’-leko’ kayu runanga battu ri poko’ kayua.
5 Napasadiami pa’danNa Batara ri suruga, na kamma-kamma anne latattabami anjo pa’danga mae ri bansa Edom, le’baka nitappuki hukkunganna laniancuru’.
6 Lattalaka ceraki pa’danNa Batara siagang larassi jannana ke’nanga, rapang cera’na siagang jannana olo’-olo’ nikoro’bangkanga. Saba’ appasadiai Batara koro’bang ri Bozra, siagang lajai tau Nabuno ri butta Edom.
7 Lamatei taua rapang sapi liara’ siagang sapi rungka. Laejai pa’rasanganna ke’nanga napakamma cera’ siagang larassi siagang janna.
8 Iaminjo wattunna na Naalleangang Batara Sion siagang Napa’balassang mae ri sikamma musu-musunNa.
9 Sikamma Binanga Edom latappinrai a’jari tere’, siagang buttana la’jari batu-batu a’bara. Kale’bakkanna sikontu pa’rasanganga la’rinrai kamma tere’.
10 Allo bangngi tamatea rinrana, na nai’mo umbuna satunggu-tungguna. Lanibokoi anjo buttaya a’jari kosong siagang kalotoro’ ri sikontu turungang, na tena manna sitau langngoloi.
11 Kiti’balang siagang landa’ lammantang anjoreng, kammayatompa kokocika siagang kalaa’. LaNapa’jari ricui siagang kosongi Batara anjo buttaya sangkamma tenanapa apa-apa nipa’jari.
12 Tena karaeng lamparentai anjo pa’rasanganga, siagang sikamma pamimpinna lanynya’ ngasemmi.
13 Sikamma balla’ rewatana siagang kota-kota niaka pattahanganna lanitimboi ri ruku’ siagang rompo’ katinting, nipammantangngi ri kongkong romang siagang jangang-jangang unta.
14 La’lemereki olo’-olo’ sekkeka anjoreng; jing assibalasa’-balasaki assa’ra, na jing bangngia a’boyai tampa’ pammari-mariang.
15 Ri anjo tampaka appare’ ru’mung ulara’ a’racunga, untu’ a’bayao, anggoppoki bayaona, siagang amparakai ana’-ana’na. Jangang-jangang tarruka a’rappungi anjoreng, massing nia’ sipasanna.
16 Boyai siagang bacami lalang Kitta’Na Batara, niaka angkana: Tena manna se’re anjo sikontu apa attallasa’ nipa’jari latappela’ yareka latena pasanganna. Saba’ kammaminjo parentaNa Batara, siagang Ia KalenNa lampa’rappungangi ke’nanga.
17 Batara ambagei anjo pa’rasanganga mae ke’nanga na massing natarima bageanna. Lammantangi ke’nanga anjoreng satunggu-tungguna, siagang anjo buttaya la’jari napatangi ke’nanga tulusu’ mae ri turunganna ke’nanga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA