Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tonggor ma, paosoron ni Tuhan Jahowa Zebaot ma hun Jerusalem pakon hun Juda panungkoli ampa tungkot, parbohalan ni ruti pakon parbohalan ni bah ganup,
2 puanglima pakon dalahi si parmunsuh, panguhum pakon nabi-nabi, si partondung pakon partua-partua,
3 kopala ni silima-puluh halak, na sangap-sangap pakon panuturi, parsibalik mata na pandei ampa si partabas.
4 Bahenon-Ku do dakdanak dalahi gabe raja bani sidea, dakdanak na inumon do na mamarentah sidea.
5 Jadi marsiodoh-odohan ma bangsa in, dalahi samah dalahi, hasoman samah hasoman; na maposo pahiri na matua, halak na malumat mandoruni halak na sangap.”
6 Jadi jorotan ni halak ma saninani i rumah ni bapani, nini ma, “Dong ope mantelmu, ho ma pambobainami, ho ma na manggomgom reong-reong ni huta on.
7 Jadi bani ari ai nini ma marbalos, ʻLang tarbahen ahu gabe panambari, seng dong ruti atap hiou i jabungku, ulang pabangkit nasiam ahu gabe pambobai ni bangsa in.ʼ
8 Tongon, marumbak do Jerusalem anjaha Juda madabuh, halani dilah ni sidea ampa pambahenan ni sidea na mangimbang Jahowa, laho paboritkon panonggor-Ni na marmulia in.
9 Rupa ni bohi ni sidea do patandahon sidea, anjaha dousa ni sidea pabotohkon sidea songon par Sodom, seng ihailahon. Magou ma sidea, ai sidea sandiri do parohkon na masambor bani.
10 Martuah do halak parpintor, sonang do ia; tongon, panganonni do buah ni na hinorjahonni.
11 Magou do halak parjahat, sunsah do ia, ai balaskononkon do bani domu hubani na hinorjahon ni tanganni.
12 Aih bangsang-Ku! Dakdanak do na mangodoh-odoh sidea, naboru parrajai bani. Aih bangsang-Ku! pambobaimu do na pakahouhon, anjaha sidea do na manggeori dalan sibolusonmu.”
13 Hehe do Jahowa laho mamorang, jongjong do Ia laho manguhum bangsa-Ni.
14 Roh do Jahowa laho mandabuh uhum, hubani pangintuai ni bangsa-Ni ampa raja-Ni. “Hanima, hanima do na mamondut pohon anggur in, ibagas rumahnima do barang rampasan humbani halak na masombuh.
15 Na mahua do hanima, ase idogei-dogei hanima bangsang-Ku, anjaha irojati hanima bohi ni halak na madoyuk? nini Tuhan Jahowa Zebaot.”
16 Nini Jahowa, “Halani margijang ni uhur boru Sion, ipadirgak-dirgak uluni mardalan, manerep-nerep pangkawahni, mairdit mardalan, anjaha mardiring-diring golang ni naheini ibahen,
17 jadi palpalon ni Tuhan ma ulu ni boru Sion, anjaha pasalangon ni Jahowa na niabitanni.
18 Bani ari ai buaton ni Tuhan ma hajengeson ni tintin ni nahei, alit-alit ni bohi, horungkorung,
19 subang, golang, tudung-tudung,
20 bulang, golang bani nahei, gondit, guri-guri ni minak na morum, pagar-pagar,
21 tintin bani jari-jari, tintin bani igung,
22 pakeian na marujuan, baju ganjang, salendang, tas,
23 sormin, baju parbagas, tujung pakon sabing-sabing.
24 Jadi masa ma, gantih ni na morum na marbau, gantih ni gondit tali, gantih ni jambulan na kariting hapalpalon, gantih ni pakeian na majenges guni, gantih ni hajengeson habadoron.
25 Sagala anak dalahi bannima rasei do bahenon ni podang, anjaha puanglimanima matei i parmunsuhan.
26 Tangis anjaha marhoru ma horbanganni, lungunan, hundul-hundul ma ia bani tanoh.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA