Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sitojenna, laNaalle ngasengi Batara Kaminang Koasaya sikamma parsadiaang kanrea siagang inunganga battu ri Yerusalem siagang Yehuda. Kammayatompa sikamma tau napattoanga ke’nanga:
2 sikamma tubarania siagang tantaraya, haking, na’bi, patappu bicara siagang tumappakainga’,
3 perwira, tunipare’ tutoaya siagang tummarentana, pabale’-bale’ mata siagang pacini’.
4 LaNaangkaki Batara ana’-ana’ rungkaya a’jari pamimping ra’ya’, nampa lappaero’-ero’ ke’nanga ammarenta.
5 Lamassing sijalla’-jallakkangi taua. Tau rungkaya tanajampangiai tau toaya, siagang tau ca’dia tanajampangiai tau lompoa.
6 Anjo wattua lanakana taua mae ri se’rea bijanna: "Ikauji bawang nia’ pakeannu siratang; jari ikaumo a’jari pamimping mae ri kambe lalang ri anne jammang jaia susa."
7 Mingka lappiali anjo bijanna nakana, "Inakke teaiya’ sanro! Tena todong kanreku siagang pakeangku. Teako suroia’ a’jari pamimping bansa!"
8 Tojeng, tu’guru’mi Yerusalem! Runtummi Yehuda! Saba’ sikontu kana-kananna siagang panggaukanna naewai Batara siagang nabaliangi kakoasanNa.
9 Sipa’ borrona ke’nanga ampa’nassai kaja’dallanna ke’nanga. A’nassa-nassai ke’nanga doraka sangkamma tu Sodom riolo. Cilakami ke’nanga! Kalenna tonji ke’nanga ampabattui cilakaya mae ri kalenna.
10 Nakana Batara, "Pabattui mae ri tau mannurukia ri Nakke angkana lamate’nei siagang lasalamaki ke’nanga. Lanakasia’ bajiki ke’nanga wassele’ posona.
11 Mingka cilakai tau ja’dalaka! Lanihukkungi ke’nanga kamma nigaukanga mae ri tau maraenga.
12 UmmakKu lanijallakkangi ri tau nangaia a’gau’ riba, siagang lanipaccoki ri tau nangaia ammacco’ paranna tau. Lanipasala oloangi ummakKu ri sikamma pamimpinna sa’genna tanaassengamo ke’nanga oloang siratanga naolo."
13 Sadiami Batara untu’ antuntuki siagang angngadeli umma’Na.
14 Langngallei tindakang Batara salaku Haking mae ri sikamma pamimpinna umma’Na. Naia tuduhanNa Batara mae ri ke’nanga, iamintu: "Ikau ngasemmi angngellaki sikamma wassele’ koko anggoroka; balla’nu rassi siagang barang nurampasaka battu ri tau kasi-asia.
15 Angngapa nanujallakkang ummakKu siagang nupacco’ tu kasi-asia? INakke anne, Batara Kaminang Tinggia siagang Kaminang Koasaya, a’bicara mae ri kau ngaseng."
16 Nakana Batara, "Teai sipato’ borrona bai’-bainea ri Yerusalem! Sanna’ lalena, nangai akkido kanynying siagang tampo sikali nicini’ a’jappa. Napare’-pareki dakkana, a’rincing-rincingi ponto bangkenna.
17 Mingka laKuhukkungi ke’nanga; larassi puru-puru ulunna ke’nanga siagang lanigondoloki."
18 Nia’ se’re wattu sallang naNaalle Batara sikamma anjo belo-belo niaka ri bai’-bainea ri Yerusalem, ia napattampo-tampoanga ke’nanga: passikko’ ulu, ponto bangkeng, rante,
19 ponto lima, pattongko’ rupa,
20 bongong, jima’-jima’ ri lima siagang ri aya’,
21 cincing siagang anting-anting ka’muru,
22 pakeang ga’ga untu’ pa’gaukang, baju la’bu kapala’, dompe’,
23 baju nipisi’, pakeang lenang, passikko’ kallong siagang bongong la’bu.
24 Kamma-kamma anne ammakei ke’nanga minynya’-minynya’ bau’, mingka sallang la’rasa bottoki ke’nanga. Passikko’ aya’ alusu’na ke’nanga lanisambei siagang otere’ kasara’. Ulunna ke’nanga ga’gaya uu’na lanigondoloki. Pakeang ga’ga-ga’gana ke’nanga lanisambei siagang pakeang kekke’-kekke’. Kamma-kamma anne ga’gai ke’nanga; mingka sallang a’jari kodimi tanja’na lanri le’baki nisitempele’.
25 Tu bura’nea, kammayatompa kassa’-kassaka, lamatei lalang bundu’.
26 Ri sikamma pakke’bu’ lompona kotaya lasusai taua lanri kamateangi siagang lappiraungi, nampa kalenna anjo kotaya lasanrapangi baine nisolarri, ammempo naung ri buttaya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA