Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Cilaka me kota Jerusalem, kota ingan batar-batar persembahen man Dibata! Cilaka me kota ingan Daud erkemah! Pelepaslah tahun-tahun mentas alu pesta-pesta ras perayan-perayanna.
2 Jenari kota si igelari "Batar-batar persembahen man Dibata" e la banci lang icilakaken Dibata. Tangis ras ngandung me kalak si i je, janah kerina kota e itamburi dareh bagi sada batar-batar.
3 Iserang TUHAN me kota e, jenari ikepungna.
4 Tupung e, Jerusalem desken begu si ndehereng i teruh taneh, desken sora kusik-kusik si sedak i teruh abu taneh nari.
5 Tapi bangsa si merawa si nerang kam e mistak me kerina desken abu tah segal iembusken angin. Rempet, alu la iarap,
6 reh TUHAN si Mada Kuasa mulahi kam alu lenggur ras linur si mehantu. IsuruhNa angin kalinsungsung ras api si gurlah;
7 jenari kerina tentera bangsa-bangsa si nerang kota Jerusalem eme "Batar-batar Dibata" e, kerina senjata ras perkakasna la lit sada pe si tading-tading kerina lesap desken nipi, desken pengenehenen i tengah berngi.
8 Kerina bangsa-bangsa si pulung nerang Jerusalem desken sekalak jelma si kelihen ernipi man, tapi tupung ia medak melihe beltekna; tah pe desken sekalak jelma si menam mate perban muasna ernipi ia minem, tapi tupung ia medak kerah kalah-kalahna.
9 Pemotu-motulah bandu maka kam motu lalap. Pepentang-pentanglah bandu maka kam pentang terus. Mabuklah kam, tapi la erkiteken minem anggur! Mbewat-mbewatlah kam erdalan, tapi labo erkiteken minem samsu.
10 TUHAN kap erbahanca maka madat matandu, jenari badeh pertunduhndu. Nabi-nabi kap arusna jadi mata man jelma si nterem, tapi nggo itutupi Dibata matana.
11 Erti pengenehenen kerina nggo terbuni man bandu, desken pustaka si nggo itutup janah isegel. Adi iberekenndu pustaka e man kalak si beluh ngoge gelah iogekenna man bandu, erjabap ia nina, "La banci ku oge, sabap pustaka e itutup dingen isegel."
12 Adi iberekenndu man kalak si la beluh ngoge gelah iogena man bandu, erjabap ia nina, "La aku beluh ngogesa."
13 Nina TUHAN, "Bangsa enda ngatakenca maka isembahna Aku. Tapi perkatanna e la lit ertina, sabap pusuhna ndauh i bas Aku nari. Agamana la lit si deban seakatan peraturen-peraturen ras adat manusia si iapalna.
14 Erkiteken si e, sengget me Kubahan bangsa enda alu perbahanen si mejin si la iarap, seh maka kalak pentar salih jadi bodoh, janah kerina kecerdikenna lanai erguna."
15 Cilaka me kalak adi icubakenna muniken rencana i bas TUHAN nari. Alu erbuni-buni idalankenna bagi sura-surana janah iakapna ise pe la ngidahsa tah metehsa perbahanenna e,
16 kerina ibalikkenna. Apai kin ergan, pande kudin tah taneh dah? Banci kin bahan-bahanen kalak ngerana man bana nina, "Labo kam si mahan aku?" Tah pe banci kin ikataken bahan-bahanen e man bana, "Labo kam beluh mahan kai pe?"
17 Lit kuan-kuan ngatakenca nina, "Lanai ndekahsa salih me kerangen tua jadi taneh perjuman, taneh perjuman salih jadi kerangen tua."
18 Adi nggo seh pagi si e, kalak pasek banci megi kata pustaka, janah kalak pentang si nggeluh i bas kegelapen, medak matana janah erpengidah.
19 Kalak musil ras si medungu ndatken keriahen ras kemalemen ate i bas TUHAN, Dibata si Badia nu Israel.
20 I jem pagi pengkeri-kerin kalak si nindes kalak si deban dingen si megombang man Dibata. Ikernepken Dibata pagi kerina kalak si jahat ukurna,
21 kerina kalak si melasken kata la tuhu, kalak si ngambati ukumen man kalak jahat, janah kalak si erbahan kesaksin si la tuhu gelah kalak bujur ula ndatken keadilen.
22 Emaka genduari nina TUHAN, Dibata nu Israel, si mulahi Abraham i bas kepiceten nari, "O bangsangKu, lanai pagi kam igombangi kalak janah ayondu pe lanai sambar perban mela akapndu.
23 Adi idahndu pagi danak-danak si Kubereken man bandu, i je pagi iakuindu maka Aku kap Dibata si Badia nu Israel. Emaka ipehagandu Aku, janah mbiar kam bangKu.
24 Kalak bodoh erlajar pagi gelah ngerti, janah kalak si rusur jungut-jungut meriah akapna iajarken."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA