Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pangungkabon Pasal Tirus: Mandoruhi ma, ale kapal Tarsis, ai domma iparseda, seng dong rumah-rumah be. Sanggah mulak hun tanoh Kittim (Cyprus) tarbogei ai bani sidea.
2 Sip ma hanima na marianan i topi laut, partiga-tiga na i Sidon; suruhanmu do mandipari laut.
3 Manlopusi laut bolag do iboban bam gandum si Sihor ampa pariama ni Nil, ho do gabe partiga-tiga ni bangsa-bangsa.
4 Bador ma ho ale Sidon, ai domma marsahap laut, benteng ni laut in: Seng be mangarou anak ahu barang mantubuhkon, seng pagodang-godang anak garama be ahu atap anak boru.
5 Bani na das barita ai hu Masir, tarsonggot ma sidea songon sanggah na mambogei barita ni Tirus.
6 Mandipar ma hanima hu Tarsis, mandoruhi ma hanima, na marianan i topi ni laut!
7 Ai on do hutanima na mariah ai, na tinombei bani na basaia, parbingkatan nasiam laho manginsolat bani tanoh na daoh?
8 Ise do na mansurahon sisonai pasal Tirus, sibagihon sortali-sortali, saudagarni songon raja-raja, anjaha partiga-tigani halak pinarsangapan i tanoh on?
9 Jahowa Zebaot do na mansurahon ai, laho pahirihon hasangapon na gok hatoalon, laho patoruhkon halak na banggal i dunia on.
10 Ornangi ma tanohmu, songon na bani Bah Nil, ho, ale boru Tarsis; seng dong be kapal.
11 Domma ipagostong tangan-Ni hu atas ni laut in, idugur do harajaon-harajaon, domma iparentahkon Jahowa pasal Kanaan, laho mansedahon benteng-bentengni.
12 Anjaha ihatahon do, “Seng be marolob-olob ho hu lobeian on, ho, ale boru Sidon, na dob pinadorun. Jongjong ma ho, mandipar ma hu Cyprus! Ijai pe seng anjai sonang ho.
13 Tonggor ma, tanoh ni halak Kasdim! In ma bangsa ai, sedo Assur, na mambahen Sidon gabe ianan ni sorigala. Ipajongjong sidea do manara pangkubu, iparseda sidea istana-istana, anjaha mareong do ibahen sidea huta ai.
14 Mandoruhi ma, ale kapal Tarsis, ai domma iparseda bentengnima!
15 Bani ari ai, halupahononkon ma Tirus pitu puluh tahun dokahni songon dokah ni ari-ari ni sada raja. Tapi dob salpu na pitu puluh tahun ai, masa ma bani Tirus songon bani doding-doding ni boru jalang.
16 Buat ma husapi, dalani ma huta in, ale boru jalang na dop hinalupahon! Padear ma panggiutmu, pabuei ma dodingmu, ase idingat halak ho use!
17 Ai dob salpu sipitu puluh tahun ai, tohuon ni Jahowa do Tirus, gabe mulak ma ia marupah boru jalang; marnriah-riahi do ia pakon sagala harajaon na i dunia on, na bani sab tanoh on.
18 Tapi untungni ampa upahni marboru jalang gabe pinapansing do ai bani Jahowa; seng pahumpulon ai atap ponopkononkon, tapi bani na marianan i lobei ni Jahowa do untungni ai, bahen sipanganon marsulei-sulei ampa pakeian na jenges-jenges.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA