Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Enda me berita kerna Tirus. Ngandungkenlah o kam anak kapal si sangana erlayar i lawit! Sabap kota Tirus, kota pelabuhenndu nggo ikernepken; rumah-rumah ras dermaga nggo runtuh kerina. Asum kapalndu mulih i Kiprus nari, ibegindu me beritana.
2 Tangiskenlah o perbinaga Sidon! Isuruhndu kalak ngepari lawit,
3 nukur ras ndayaken gandum si turah i Mesir janah erbinaga ku kerina negeri.
4 O kota Sidon, man kemelanken nge sikerajangenndu ena! Lawit ras lawit si mbelang nggo mersoken kam nina, "La pernah lit anakku. La pernah kupebelin-belin anak dilaki tah anak diberu."
5 Negeri Mesir pe sengget dingen kemamangen tupung tereteh man bana maka Tirus nggo kernep.
6 Nderkuhlah kam alu dem ceda ate o kerina kalak si ringan i tepi lawit, janah lompatkenlah ku Sepanyol.
7 Enda kin ndia kota Tirus si meriah, si ipanteki i bas paksa si nuria? Enda kin kota si nggo nuruh kalak ngepari lawit si mbelang lako majekken daerah-daerah jajahen?
8 Ma enda kin kota si saudagar-saudagar jadi raja janah ihamati kalak kal i belang-belang doni enda? Ise dage ngerencanakenca maka kota e banci kernep?
9 TUHAN si Mada Kuasa kap ngerencanakenca si e kerina! Irencanaken TUHAN si e gelah ngadi ukur meganjang erkiteken kemulianna, janah kalak si mehaga i bas kota e ipeteruk.
10 To perjumailah tanehndu o kalak Sepanyol, sabap lanai lit pelabuhenndu.
11 Nggo iawatken TUHAN TanNa kempak lawit janah kerajan-kerajan nggo IruntuhkenNa. Nggo IperentahkenNa maka ingan-ingan perbinagan Punike iradasken.
12 O kota Sidon, kesenangenndu nggo keri, janah kalak si ringan i bas kam iayak-ayak. Aminna lompat pe ia ku Kiprus, i jah pe labo banci ia terkelin.
13 (Kalak Babilon nge si merekenca kota Tirus man rubia-rubia si merawa, labo kalak Assur. Kalak Babilon e ka nge simajekken menara-menara guna ngkepung kota Tirus, ngeruntuhken benteng-benteng kota e, janah ngeradaskenca.)
14 Nderkuhkenlah alu ceda ate, o kam anak-anak kapal si sangana erlayar i lawit. Kota penalemenndu nggo ikernepken.
15 Lit pagi paksana Tirus ilupaken pitu puluh tahun dekahna, eme asa umur geluh sekalak raja. Kenca paksa si pitu puluh tahun e nggo lepas, kota Tirus bali me ras diberu si pencarinna erlua-lua bagi si tersinget i bas ende-enden enda nina:
16 Buat kulcapindu, siar-siarlah kuta, o diberu perdenggal si nggo ilupaken! Kuitlah kulcapindu, endeken ka ende-endenndu, gelah inget kalak ka kam mulihi.
17 Kenca mentas si pitu puluh tahun e, iinget TUHAN ka mulihi Tirus, janah IbereNa ka ia mulihi ndahiken dahinna si ndekah; idayakenna me dirina i bas perbinagan man kerina kerajan-kerajan i babo doni enda.
18 Upah ras duit si idatca arah perbinagan e ipersembahkenna me man TUHAN, duit e la isimpanna, tapi kalak si nembah man TUHAN me makesa nukur nakan ras uis si iperlukenna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA