Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaminne pappasang ri passala’na Ka’bung Paccinika: He, pandudu’na Yerusalem, angngapa nunai’ ngaseng ri pattongko’ ballaka?
2 Tena nasiratang sikabusu’na kotaya assua’-suara’ siagang a’reja-reja. Saba’ sikamma turewanu matei lalang anne bunduka, tena namate lanri mate a’bundu’.
3 Sikontu panglima tantaranu lari ngasengi siagang tenapa nalappassangi panana napatemba’ na nitahang memammo ke’nanga. Sikontu tau kassa’nu nitahang ngasengi manna pole nabellamo larina.
4 Teako nakke nuparhatikang; boli’ma’ kamma nakukarruki sikamma bansaku mateamo. Teako cobai ansaleoria’.
5 Memang, KalenNa Batara Kaminang Tinggia siagang Kaminang Makoasaya le’ba’ ampattantui anne alloa a’jari allo karicuang, kagegerang, siagang pa’beserang ri Ka’bung Paccinikang. Sikamma tembo’na kotaya lanirumbangi. Kemae-kemae nia’ kalangngerang sa’ra ammarrang appala’ tulung ri buluka.
6 Battui tu Siria a’dongko’ jarang siagang kareta pa’bundukang, tu Elam angngerang sanjata pana, tu Kir sadia siagang pa’lapa’ barambanna untu’ a’bundu’.
7 Sikamma ka’bung copponga ri Yehuda rassi ngaseng siagang kareta pa’bundukang. Sadiami pasukang a’dongko’ jaranga ri dallekanna sikamma pakke’bu’ lompona Yerusalem.
8 Sikontu pattahanganna Yehuda runtung ngasemmi. Anjo wattua nuparessai sikamma pakkakasa’ pa’bundukannu ri gudang sanjataya.
9 Jai sikali nugappa a’latta tembo’na Yerusalem ia parallua nipakabaji’. Nuparessai sikontu ballaka ri Yerusalem, siapa are jaina balla’ nubongkara’ nampa nualle nupake batunna untu’ ampakabajiki tembo’na kotaya. Untu’ appasse’re je’ne’,
10 (22:9)
11 appare’ mako kollang lalang ri kotaya nampa nupasse’re je’ne’ battua ri kollang salloa. Mingka tena ngaseng nuparhatikangi Allata’ala, Ia salloamo le’ba’ anrancanakang ngasengi sikammaya anjo, siagang a’jaria passabakkang nakajariang anjo kammaya.
12 Anjo wattua laNasuro ngasengko Batara Kaminang Tinggia siagang Kaminang Makoasaya angngarru’ siagang appiraung, ancukkuruki uu’nu siagang ammake kaeng karung.
13 Mingka kabalekanna, ikau assannang-sannang jako siagang assua’-suara’ jako. Ammolongko sapi siagang gimbala’, angnganre dageng siagang angnginung je’ne’ anggoro’ nampa akkio’ angkana, "Umba ningnganre siagang angnginung, saba’ ammuko lamate maki’!"
14 Napa’nyatai KalenNa Batara Kaminang Tinggia siagang Kaminang Makoasaya mae ri nakke, na nakana, "Tojeng, anjo kaja’dallanna ke’nanga tena nalaKupammopporang sa’genna mate ke’nanga. INakke, Batara, anne le’ba’ akkana kamma."
15 Nasuroa’ Batara Kaminang Tinggia siagang Kaminang Makoasaya mange ri Sebna, kapala ruma tanggana balla’ lompoa, untu’ ampabattui pappasanNa Batara angkana,
16 "Nukana inaika kalennu? Apa ha’nu sa’genna nupare’ jera’ kalennu ri anjo bulu’ batua?
17 Jagako, laKupelakko sa’gennu bella. LaKuta’gala’ jarrekko siagang laKugulung-gulungko nampa Kupagulungko rapang golo’ mange ri pa’rasangang lompoa. Anjorengko lamate ri sa’rinna karetanu nukalompoang pa’maika. Nura’massimi arenna kaluargana karaennu.
18 (22:17)
19 Lanri kammana laKupasulukko battu ri jabatannu siagang laKupanaungko battu ri pangka’ tingginu.
20 Anjo wattua laKukioki atangKu Elyakim ana’na Hilkia.
21 Pakeang kalompoannu siagang passikko’ aya’nu laKupatabai mae ri ia. Sikontu kakoasannu laKupassareangi mae ri ia. Ia la’jari bapa’ mae ri pandudu’na Yerusalem siagang Yehuda.
22 Ia lakoasa nipatappa’ irawanganna karaeng turunganna Daud. Ia lanna’gala’ koncina kakaraenganga. Punna ia assungkei, tena tau akkulle antongkoki; punna natongkoki, tena tau akkulle assungkei.
23 LaKusarei empoang majarre’ rapang paku lompo tappasang jarreka mae ri temboka. Sikontu kaluargana lanipakalompoi lanri ia.
24 Mingka sikamma bija pammanakanna siagang sikamma tanggonganna la’jari tanggongangi mae ri ia. La’dingkolengi ke’nanga mae ri ia, rapang uring ta’gentunga mae ri paku lompoa.
25 Punna kajariang anjo kammaya, anjo paku nipasang jarreka lata’lappasaki nampa tu’guru’. Nampa ia tomminjo kala’busanna sikamma bija pammanakanna siagang sikamma tau a’dingkolenga mae ri ia. INakke, Batara, anne le’ba’ akkana kamma."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA