Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Iaminne pappasang ri passala’na Babel: Rapang anging puttusu’ ammarrunga allalo ri parang lompoa, kammaminjo kabattuanna bala lompoa battu ri pa’rasangang hebaka.

² Anggappa’ pangngunju’, nakucini’ sikamma passala’ lakajarianga, sannaka appakamalla’na; iamintu nikanaya sipa’ a’bali’ ballang siagang pammanrakia. Maju mako, pasukanna Elam, a’bakka mako! He, pasukanna Madai, kurummi! LaNapa’le’ba’mi Allata’ala sikontu kapa’risang passabakkang nagaukanga Babel.

³ Linguma’ kugappana anjo paccinika, sa’genna takkulleama’ accini’ siagang allangngere’. Malla’ma’ siagang pa’risi’mi kusa’ring, rapang baine lamanaka.

⁴ Lussaki pa’maikku; annekkerekka’ napakamma malla’. Poro malla’ji naerang battu bangngi kuminasaia.

⁵ Nia’ todong kucini’ parjamuang pa’rannu-rannuang, ia le’baka memammo nipasadia; sadia tommi empoanga untu’ sikamma undanganga. Angnganre angnginungi ke’nanga. Ti’ring nia’mo kalangngerang parenta angkana: "He, sikamma perwiraya! Pasadia ngasengi pa’lapa’ barambannu!"

⁶ Nampa Nakanamo Batara mae ri nakke, "A’lampako ammoli’ sitau pajaga siagang suroi allaporoki apa niaka nacini’.

⁷ Punna nia’ nacini’ pasukang a’jarang ta’rua-rua a’gimbara’ battu, pasukang a’dongko’ keledai siagang unta, musti nuparhatikang baji’-bajiki."

⁸ Nampa ammarrammo anjo pajagaya angkana, "O, Karaeng, le’ba’ma’ a’jaga allo-allo, a’jaga allo bangngi."

⁹ Ciniki, anjomi ke’nanga! Pasukang a’jarang ta’rua-rua a’gimbara’ battu. Nampa nakabarrammo anjo pajagaya angkana, "Runtummi Babel! Patung-patung napakalompoa ke’nanga ancuru’mi tassia’-siara’ ri buttaya."

¹⁰ He bansaku Israel! Le’ba’ mako nilissarrang siagang nionjo’-onjokang rapang lisere’-lisere’ gandung. Kamma-kamma anne kupabattuangko kabara’ baji’, ia kulangngereka battu ri Batara Kaminang Makoasaya, Allata’alana Israel.

¹¹ Iaminne pappasang ri passala’na Edom. Nia’ tau akkio’ battu ri Edom mae ri nakke, nakana, "He, pajaga, sallo ijakai anne bangngia? Pirang tetteppi nampa bari’basa’?"

¹² Appialima’ angkana, "Labattui bari’basaka, mingka bangngia pole. Punna erokko akkuta’nang, battu poleang mako akkuta’nang."

¹³ Iaminne pappasang ri passala’na Arab: He, tu Dedan, akkemai sikamma kapilanu ri rompo’-rompo’na butta Arab.

¹⁴ He, pandudu’na butta Tema, sarei je’ne’ inung sikamma tau turere battua mae ri kau, siagang sarei kanre tau laria battu ri pa’rasanganna battu annumpang.

¹⁵ Nasaba’ nalariangi kalenna ampilari pa’dang ta’bi’buka, battu ri ana’ pana nipalio-lioa, siagang battu ri pa’bundukang hebaka.

¹⁶ Nampa Nakana Batara ri nakke, "Ganna’-gannaki sitaung pole lakala’busammi kaporeanna suku-suku Kedar.

¹⁷ Sikamma tau papanana Kedar sangnging tau barani. Mingka sike’de’ji battu ri ke’nanga lasalama’. INakke, Karaeng, Allata’alana Israel, anne le’ba’ akkana."

Yesaya

Video Yesaya 21

Ikuti Kami:

KONTAK | PARTISIPASI | DONASI