Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara, "Tenamo nala’jari kota anjo Damsyik, mingka la’jari pannambungang loro mami.
2 Lanibokoimi kota-kota niaka ri Siria sa’genna satunggu-tungguna, siagang la’jari mami pammantangngang olo’-olo’; tena manna sitau lambongkai ke’nanga.
3 Tenamo la’jari pajaga mae ri Israel nampa Damsyik latappela’mi kabebasanna. Tu Siria niaka ija tassesa la’jari hinai lalang tallasa’na sangkamma tu Israel. INakke, Batara Kaminang Makoasaya, anne le’ba’ akkana kamma."
4 Nakana Batara, "Nia’ wattunna sallang, nalalanynya’ kalompoanna siagang kacopponganna tu Israel.
5 Anjo Israel lasanrapangi koko ri Refaim cappuka le’ba’ nikatto gandunna, na sike’de’ mamo tassesa.
6 Rapang poko’ zaitun cappuka nialle rapponna, na piram batu mami ammantang ri cappa’-cappa’ tangkenna, kamma tomminjo bansa Israel, sike’de’ mami lasalama’. INakke, Batara Allata’alana Israel, anne akkana."
7 Anjo wattua sallang, lammotere’mi taua mange appala’ tulung ri Mappa’jarina, iamintu Allata’ala matangkasa’na Israel.
8 Tenamo nalamanrannuang pole ke’nanga ri wassele’ bate pare’ kalenna ke’nanga, iamintu ri tampa’-tampa’ pattunuang dupana, siagang patung-patunna rewata baine niarenga Asyera.
9 Anjo wattua sallang, sikamma kota-kota kassaka pattahanganna ri Israel la’jari rumbangngang mami siagang la’jari sinomi, sangkamma kota-kota le’baka nabokoi tu Hewi siagang tu Amori ri wattunna lari ke’nanga battu ri tu Israel.
10 O, Israel, nukaluppaimi Allata’ala le’baka ampasalamakko siagang alla’langiko sanrapang moncong batu kassaka. Kabalekanna, nulamungimi kokonnu untu’ rewata-rewataya.
11 Mingka manna pole naccu’la’ memang siagang a’bunga memang ri allo nulamunna, mingka tena nalanugappa wassele’na. Ia lanugappaya iamintu poro kasusaang siagang kapa’risang bawang, tenaya nakkulle tappela’.
12 Para gegere’mi sikamma bansa kassaka; ammarrummi sa’ranna rapang arrunna bombang lompoa.
13 Majui ke’nanga rapang a’ba sannaka lompona. Mingka Niancangi ke’nanga ri Allata’ala, nampa lari ke’nanga sa’genna bella lampana. Niondangi ke’nanga rapang awang niri’bakang ri anging nai’ ri buluka, yareka rapang limbu’bu’ nitui’ ri anging lompoa.
14 Ri wattu karuenna appakamalla’ lompoi ke’nanga, mingka ri bari’basa’na tenami ke’nanga. Iaminjo rapanna sarenna sikamma tau arrampasakai apa-apanta.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA