Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pangungkabon pasal Babel, na nididah ni si Jesaya, anak ni si Amos.
2 Pajongjong hanima ma mandera partanda bani dolog na leseng, pagomos ma martaur bani sidea; hilapkon hanima ma tangannima, ase masuk sidea humbani horbangan ni halak na sangap-sangap!
3 Ahu na dob mamarentahkon hubani halak na Hupapansing, domma Huhara puanglima-Ku, na roh garang marsurak, laho padalankon ringis-Ku,
4 tangar, sora na gosou bani dolog songon sora ni bala na buei! Tangar, sora na guyu bani harajaon-harajaon, bangsa-bangsa na roh martumpu! Jahowa Zebaot patitirhon bala laho marmunsuh.
5 Na roh do sidea humbani nagori na daoh, humbani ujung ni langit, Jahowa ampa sinjata ni ringis-Ni, laho mamboiskon ganup tanoh in.
6 Mandoruh ma hanima, ai dohor do ari ni Jahowa, songon hasedaon humbani Siparkuasa in do parroh-Ni.
7 Halani ai galek ma sagala tangan, madotei uhur ni ganup halak, anjaha tarsonggot sidea.
8 Hajorgongon ampa pangarouon do mandorab sidea, mangarou do sidea songon naboru na laho tubuhan tuah, marsinonoan do sidea, gerger bohini songon narnar.
9 Tonggor ma, na roh ma ari ni Jahowa, jangin marhasoman gila ampa ringis na gajag, laho mambahen halimisan tanoh in ampa laho mamboiskon pardousa hunjai.
10 Ai sagala bintang na i langit ampa bintang pariama seng be bereonni sinalsalni; golap do mata ni ari bani parpoltakanni, anjaha bulan seng marsinondang.
11 Balaskonon-Ku do bani dunia on hajahatonni, ampa bani halak parjahat salahni, parontihonon-Ku ma pangenjengon ni halak si gijang uhur, anjaha patoruhon-Ku do gijang ni uhur ni halak siunsagahkon gogoh.
12 Bahenon-Ku ma jolma jarangan humbani omas pitah, anjaha manisia jarangan humbani omas Opir.
13 Halani ai dugur ma langit anjaha tanoh on mosor humbani iananni, halani gila ni Jahowa Zebaot bani panorang pargajag ni ringis-Ni.
14 Jadi songon ursa na binuru, anjaha songon biribiri na so marparmahan, mulak ganup sidea bani bangsani anjaha maporus ganup hu nagorini.
15 Sagala na dapot ai itiham, anjaha sagala na tartangkap ai matei ibahen podang.
16 Irosaki do dakdanak ni sidea ididah matani, hona rampas rumah ni sidea, anjaha na binuat ni sidea ibutaki.
17 Tonggor ma, pajujuon-Ku ma halak Madai mangimbang sidea, na so impolan bani pirak anjaha na so mangkamegahkon omas.
18 Raseihonon ni sior ni sidea do garama-garama, seng holong uhur ni sidea bani boras ni boltok, anjaha seng ihargai panonggor ni sidea dakdanak.
19 Anjaha masa ma bani Babel, bungaran ni harajaon-harajaon, hamegahon ampa hamuliaon bani halak Kasdim, songon na masa bani Sodom ampa Gomora, sanggah na ibalikkon Naibata ai.
20 Seng be iankonon ai lalab atap hundulan ai marsundut-sundut; seng dong be halak Arab na marlampolampo ijai, anjaha parmahan seng be marlampolampo ijai.
21 Tapi binatang na i halimisan do manggompang ijai, anjaha langkupa manggoki rumah ni sidea; marianan do ijai burung unta, anjaha manortori do ijai setan-setan.
22 Baliang harangan do markaing-kaing bani lopou ni sidea, anjaha sorigala i rumah bolon ni sidea. Dohor ma roh panorangni, anjaha seng be paganjangon ari-arini.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA