Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaminne kananNa Batara Kaminang Koasaya, iamintu Allata’alana Israel, ri sesena Moab, nakana, "Cilakai pandudu’na Nebo, nasaba’ runtummi kotana! Niallei Kiryataim, siagang benteng pattahanganna kassaka niancuru’mi, sa’genna siri’-siri’ pandudu’na;
2 lanynya’mi nakalompoang pa’maika Moab. Naallemi musu Hesybon siagang anjorengi ke’nanga a’rancana untu’ ampa’lanynya’ kabusuki sikontu bansa Moab. Sikamma sa’raya ri kota Madmen lanipamari ngasengi, lanri anjo kotaya lanibunduki ri tantara.
3 Pilangngeri! Pandudu’na Horonaim ammarrangi angkana, ‘Kapanrakang! Kaancurang!’
4 Ancuru’mi Moab! Sa’ra karru’ ana’-ana’ ca’dina kalangngerangi sa’genna mange ri Zoar.
5 Pilangngeri sa’ra karru’ ri oloang naika ri Luhit, siagang sa’ra piraunga ri oloang naunga ri Horonaim.
6 Nakana ke’nanga, ‘Karo-karoko! Pasalamaki nyawanu! Lariko rapang keledai liaraka ri paranga!’
7 Moab! Ikau nupattoangi kaporeannu siagang kakalumanynyangngannu. Mingka kamma-kamma anne ikau kalennu lanibetako. Kasmos, rewatanu, siagang sikamma imanga siagang pagawena laniengkaki mae nipela’.
8 Kabusu’na kotaya laancuruki, tena manna se’re lata’lappasa’. Ka’bung siagang lapparaka, lapanra’ kabusuki. INakke, Batara, anne akkana.
9 Attannangko batu nisang untu’ Moab, lanri tasalloami anjo pa’rasanganga nanipanraki taba sikali. Kota-kotana laruntungi siagang tena manna sitau lammantang anjoreng."
10 Nitunrai tau tenaya naero’ anggaukangi tugasa’ battua ri Batara siagang attojeng-tojeng. Nitunrai tau tenaya nabi’buki pa’danna untu’ ammuno.
11 Nakana Batara, "Battu riolo amangi tallasa’na Moab. Tale’bakai niengka’ mange ri butta pammelakkanga. Ia rapangi je’ne’ anggoro’ nibolika sallo siagang tale’bakai nipatiri’ antama’ ri tampa’ anggoro’ maraenga. Anggoro’na tuli bau’ iji siagang nyamangi.
12 Mingka, lanarapiki sallang wattunna naKupassuroang sollanna nipatiri’ Moab rapang anggoro’, siagang sikamma tampa’na nikosongi siagang nireppeki.
13 Lala’bai pa’mai’na Moab mae ri Kamos, rewatana ke’nanga, sangkamma batena Israel la’ba pa’mai’na ri Betel ia napattoanga ke’nanga.
14 Antekamma nakkulle barani tu bura’nena Moab angkana, ‘Ikambe tubarani, tantara pore, le’baka niso’ri lalang pa’bundukang?’
15 Moab siagang kota-kotana le’ba’mi niancuru’, siagang sikamma tau rungkana kaminang bajika le’ba’mi nibuno. INakkemi le’ba’ a’bicara. INakke karaeng, Batara Kaminang Koasaya.
16 Nia’mi ri dallekanna pakke’buka bala lantujuai Moab, tasalloami naancuru’.
17 He ikau ngaseng pa’rasangang-pa’rasangang singngampi’na Moab angngassengai masahoro’na, susa mako untu’ Moab. Akkana mako, ‘Tenamo koasana Moab, lanynya’mi kalompoanna siagang kagassinganna!’
18 He pandudu’na Dibon, naung mako battu ri tampa’ kalompoannu; ammempo mako ri buttaya, irate ri limbu’buka. Lanri eroka ampanraki Moab, anne pa’rasangannu nia’mi battu, siagang lanaancuruki sikontu pattahangannu.
19 Ikau niaka ammantang ri Aroër, ammentengko ri birinna aganga siagang parhatikangi! Pakkuta’nangngangi mae ri ke’nanga laria, siagang ta’lappasaka, angkana, ‘Apa le’ba’ kajariang?’
20 Lappiali ke’nanga angkana, ‘Tu’guru’mi Moab, siagang a’jari tunami, jari karrukimi. Pa’la’bangi kabarrang ri sikontu birinna Binanga Arnon angkanaya ancuru’mi Moab.’"
21 "Nipabattumi hukkunganga mae ri kota-kota niaka ri daera lappara’ tinggia: irate ri Holon, Yahas, Mefaat,
22 Dibon, Nebo, Bet-Diblataim,
23 Kiryataim, Bet-Gamul, Bet-Meon,
24 Keriot, siagang Bozra. Kabusu’na kota niaka ri Moab, bella yareka ambani, nihukkung kabusuki.
25 Nitepo’mi kagassinganna Moab, niancuru’mi kakoasanna. INakke, Batara, anne akkana."
26 Nakana Batara, "Pareki Moab nasa’ring, lanri napattampoangi kalenna mae ri Nakke. Langgulung-gulungi lalang ri langngena, siagang lanikakkali ri taua.
27 Sai riolo le’baki nikakkali Israel ri Moab siagang napareki carita rapang angkanaya le’baki nirapikang ke’nanga siagang ngaseng palukkaka?
28 Ikau pandudu’na Moab, bokoimi kota-kotanu siagang mange mako ammantang ri bulu’-bulu’ batua rapang jangang-jangang bodobangkeng appareka ru’mung ri tubirika.
29 Teai sipato’ tamponu! Kulangngere’mi antekamma borronu, tinggi langganu koborroannu, siagang katampoannu!
30 INakke, Batara, Kuassengi katampoannu. Bicarannu sangnging tena bonena, siagang panggaukannu tena battuanna.
31 Lanri kammana anjo langngarru’ lompoA’ untu’ ikau ngaseng siagang untu’ sikamma tau niaka ri Kir-Heres, ibukotana pa’rasangannu.
32 Lala’biangang Kukarrukinna pandudu’na Sibma na pandudu’na Yaezer. Kota Sibma rapangi lamungang anggoro’ a’la’banga mange-mange tangkenna sa’genna ri ba’leanna Tamparang Matea, kamma bellana Yaezer. Mingka kamma-kamma anne rappo-rapponna ri wattu timoroka siagang rappo anggoro’na le’ba’mi nipanraki.
33 Sa’ra-sa’ra karannuanga lanynya’mi battu ri Moab, pa’rasangang copponga. Kupamari assolong je’ne’ anggoroka battu ri pakkakasa’ pammaccokanna; tenamo tau appare’ anggoro’ siagang a’rannu-rannu.
34 Tu Hesybon siagang tu Eleale angngarruki, nakalangngerang karru’na sa’genna mange ri Yahas, siagang kalangngerang tongi mae ri tau battua ri Zoar sa’genna mange ri Horonaim siagang Eglat-Selisia. Angngarruki ke’nanga lanri manna je’neka ri pangkana Binanga Nimrim kalotoro’ ngasemmi.
35 LaKupammari tu Moab attunu koro’bang ri tampa’-tampa’ panynyombanna ke’nanga, siagang Kupammari ke’nanga assare koro’bang mae ri rewata-rewatana ke’nanga. INakke, Batara, anne akkana.
36 Sikontu kakalumanynyangnganna Kir-Heres siagang kabusu’na Moab lanynya’mi. Si’nai pa’maikKu anciniki katallassanna anjo ke’nanga; rapangA’ tau appasa’ra suling kasusaang.
37 Le’ba’ ngasemmi nacukkuru’ uu’na siagang janggo’na ke’nanga, nabokkaki paling-palinna, siagang ammake kaeng karung, pammatei ri kasusaanna ke’nanga.
38 Irate ri sikontu tompo’na ballaka siagang ri sikamma paranga, sangnging karru’ mami nilangngere’. Nasaba’ Moab le’ba’mi Kureppe’ rapang katoang tenayamo ningai.
39 Ancuru’ taba sikalimi Moab! Teai sipato’ siri’-siri’na Moab! Angngarruki lanri nipakatunai siagang nikakkali ri bansa-bansa niaka ri tammulilina. INakke, Batara, anne akkana."
40 Nakana Batara, "Rapang jangang-jangang rajawali attamberoa siagang ka’nyi’na takka’ranga, kammami anjo nia’ se’re bansa lantamberoi Moab.
41 Kota-kotana siagang sikamma pattahanganna laniallei, siagang tantarana lamallaki rapang baine eroka ammana’.
42 Laancuruki Moab siagang tenamo nattanja’ se’re bansa, lanri napattampoanna kalenna mae ri Nakke.
43 Lanipassidallekangi ke’nanga siagang pammunoang, kali’bong, siagang sikko’.
44 Tau laria battu ri tau lammunoa, latu’guruki antama’ ri kali’bonga, siagang tau akkullea assulu’ battu ri kali’bonga laniallei ri sikko’. Yangasenna anjo kammaya lakajariangi ri wattu le’baka Kupattantu untu’ angngancuruki Moab.
45 Tau annompang tenaya pakkullena a’lampai a’boya pa’la’langngang ri Hesybon, mingka anjo kotaya akkanrei siagang manna balla’ karaenna Sihon nikanre tongi ri pepe’. Pepeka le’ba’mi naancuru’ daera pa’baeng-baenga siagang pa’monconganna Moab, pa’rasanganna tau nangaia a’bundu’.
46 Cilakami Moab! Pandudu’na anynyombaya ri Rewata Kamos le’ba’mi nipanraki, siagang ana’-ana’na ke’nanga niengka’mi salaku tau nitahang.
47 Mingka sallang, laKupa’jari bajiki ammotere’ katallassanna pa’rasangang Moab. INakke, Batara, anne akkana!" Iaminjo Nagaukanga Batara mae ri Moab.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA