Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Reya’ se edhabuwagi PANGERAN Se Mahakobasa, parkara Mo’ab, "Palang pandhudhu’ Nebo, kotthana la gujur! Kiryata’im erebbu’ moso, bintengnga se koko epaancor, sampe’ pandhudhu’na daddi malo;

² la tadha’ se eandellagi Mo’ab. Moso la arebbu’ Hesybon ban e jadhiya moso jareya andhi’ sajja matompessa sakabbinna bangsa Mo’ab. Ra-sowara e kottha Madmen bakal serebba, sabab kottha jareya eserbuwa tantara.

³ Edhingngagi! Pandhudhu’ Horona’im aera’, ‘Mate sengko’! Ancor sengko’!’

⁴ Mo’ab la mosna! Cerrengnga na’-kana’ kene’ ekaedhing sampe’ ka Zowar.

⁵ Edhingngagi sowarana tangessa e ga’-ongga’an ka Luhit, ban sowarana tangessa e ron-toronan ka Horona’im.

⁶ Oca’na, ‘Duliyan! Pasalamet odhi’na ba’na! Buru pakantha hemar alas e ra-ara!’

⁷ Mo’ab ba’na ngandellagi kakowadan ban kasogiyanna. Tape sateya ba’na dibi’ epakala’a. Kamos, dibana ba’na, ban para imam sarta para pangrajana ba’na eangko’a ka pambuwangan.

⁸ Tha-kottha bakal ancora kabbi, tadha’ settonga se lopoda. Cora ban tana mandhap bakal mosna’a kabbi. Sengko’, PANGERAN, la ngoca’.

⁹ Pasang paesan kaangguy Mo’ab, sabab sakejja’aggi’ nagara jareya epamosna’a epatadha’a karena. Tha-kotthana bakal gujura ban tadha’ oreng settonga se ennengnga e jadhiya."

¹⁰ Palang oreng se ta’ ajalannagi kawajiban dhari PANGERAN kalaban gu-onggu! Palang oreng se ta’ ngonos peddhangnga ban ta’ mate’e oreng.

¹¹ PANGERAN adhabu, "Molae lamba’ Mo’ab odhi’ aman. Ta’ tao eangko’ ka pambuwangan. Mo’ab reya akantha aengnga anggur se epaeddet ban ta’ tao esalen ka baddhana anggur laenna. Anggurra gi’ ro’om ban nyaman.

¹² Tape bakal dhapa’a baktona Sengko’ nyorowa Mo’ab etotta’ epakantha anggur, ban dha-baddhana epakosong ban epabella.

¹³ Mo’ab bakal astaba’a polana Kamos, dibana, padha ban oreng Isra’il se astaba polana Betel se eandellagi rowa.

¹⁴ Baramma lalake’an Mo’ab me’ bangal ngoca’, ‘Sengko’ pahlawan, parjurit parjuga se la eoji e dhalem paperrangan?’

¹⁵ Mo’ab ban tha-kotthana la epaancor, ngangodhadanna se paleng becce’ la epate’e. Sengko’ la ngoca’. Sengko’ rato, PANGERAN Se Mahakobasa.

¹⁶ Balai se teba’a ka Mo’ab la badha e adha’na labang, sakejja’ aggi’ Mo’ab ancor.

¹⁷ He ra-nagara tatanggana Mo’ab se la tao ka kasohoranna, mara ba’na pasossa polona Mo’ab jareya! Mara ngoca’, ‘Mo’ab la ta’ andhi’ kobasa pole, kakasohoranna ban kakowadanna la mosna!’

¹⁸ He pandhudhu’ Dibon, mara toron dhari kennengnganna ba’na se molja; toju’ e tana e attas abu. Sabab se marosaga Mo’ab nagarana ba’na la dhateng, ban maancora sakabbinna bintengnga.

¹⁹ Ba’na se enneng e Aroër, mara manjeng e penggir lorong sambi abassagi! Tanya’agi ka reng-oreng se ngenneng buru jareya, ban salamet, ‘Badha apa kowa?’

²⁰ Reng-oreng jareya bakal nyaoda, ‘Mo’ab la gaggar ban tadha’ ajina; daddi mara tangese. Berta’agi e salanjangnga Songay Arnon ja’ Mo’ab la ancor.’"

²¹ "Okoman la eteba’agi ka tha-kottha e dhaera tana tenggi: ka Holon, Yahas, Mefa’at, Dibon, Nebo, Bet-Diblatayim,

²² Kiryata’im, Bet-Gamul, Bet-Meyon,

²³ (48:22)

²⁴ Keriyot ban Bozra. Sakabbinna kotthana Mo’ab, jau ban semma’, la eokom.

²⁵ Kakowadanna Mo’ab la epotel, ban kakobasa’anna la epaancor. Sengko’, PANGERAN, la ngoca’."

²⁶ PANGERAN adhabu, "Pamabu’ Mo’ab jareya, polana nyombongngagi aba’na e adha’na Sengko’. Mo’ab bakal alu’-gulu’a gubang e dhalem otana dibi’, ekala’-gella’ oreng.

²⁷ Lamba’ gu ta’ oreng Isra’il se ekala’-gella’ bi’ Mo’ab, ekacaca akantha bangsa Isra’il reya se ekenneng pega’ abareng ban leng-maleng, ta’ iya?

²⁸ Pandhudhu’ Mo’ab, onduri tha-kotthana ba’na, pas enneng e gumo’ bato akantha dara se agabay lebunna e penggir jurang.

²⁹ Ba’na ce’ angkona! Sengko’ la ngedhing saapa sombongnga ba’na, tenggi atena, gathak ban angga’!

³⁰ Sengko’, PANGERAN, la tao ka kaangkowanna ba’na. Cacana kosong, lalakonna tadha’ artena.

³¹ Daddi Sengko’ nangesana ba’na epakaja’a, ban nangesana reng-oreng e Kir-Heres, ibu kotthana ba’na.

³² Bi-lebbi Sengko’ nangesana pandhudhu’ Sibma alebbiyan dhari pandhudhu’ Yaezer. Kottha Sibma reya akantha tamennan anggur se rang-carangnga nalar sampe’ gan Yaezer e dhajana Tang’ Mate. Tape sateya wa’-buwa’an mosem panassa ban buwana anggurra la epamosna.

³³ Tadha’ sowarana oreng raksoragan pole e tana Mo’ab se landhu. Aengnga anggurra bi’ Sengko’ epaambu ta’ epagili pole dhari pamerressanna anggurra. La tadha’ pole oreng se agabay anggur ban se asorak kaperagan.

³⁴ Oreng e Hesybon ban Eleyale nanges, tangessa ekaedhing sampe’ ka Yahas, ban ekaedhing keya bi’ reng-oreng dhari Zowar sampe’ ka Horona’im ban Eglat-Selisia. Reng-oreng jareya nanges polana aeng e cangkana Songay Nimrim la kerreng.

³⁵ Sengko’ maambuwa bangsa Mo’ab ngobbar kurban e ngan-kennengnganna pamojja’anna ban epaambuwa ngeba kurban ka ba-dibana. Sengko’, PANGERAN, la ngoca’.

³⁶ Dhi’-andhi’na Kir-Heres ban saantero Mo’ab la mosna. Sengko’ ce’ ngennessa nangale’e kabadha’anna se kantha jareya, Sengko’ akantha oreng se nope soleng, mamonye lagu se ngennes.

³⁷ Reng-oreng jareya kabbi padha nyokor obu’na ban janggu’na, lengngenna elokae, sarta ngangguy kalambi karong menangka tandha sossa.

³⁸ E attassa ata’na ko-bengko ban e lon-alon se ekaedhing tadha’ laen kajabana sowarana oreng nanges. Sabab bi’ Sengko’ Mo’ab la epabella epakantha pennay se ta’ ekendha’i oreng.

³⁹ Mo’ab la ancor! Todhussa Mo’ab! Mo’ab nanges polana eya-seya ban ekala’gella’ sa-bangsa e sakalenglengnga. Sengko’, PANGERAN, la ngoca’."

⁴⁰ PANGERAN adhabu, "Akantha mano’ rajabali se nyaop ban menthang kalembangnga, kantha jareya keya bakal dhatengnga settong bangsa nyaoba Mo’ab.

⁴¹ Tha-kotthana ban teng-bintengnga bakal erebbu’a ban tantarana bakal katako’ana akantha babine’ se rembi’a.

⁴² Mo’ab bakal ancora ban ta’ daddi bangsa pole, sabab ga’-maangga’ e adha’na Sengko’.

⁴³ Bangsa Mo’ab ngadhebbi terror, bang-lobang ban jira’.

⁴⁴ Oreng se buru dhari terror bakal tabalusoga ka lobang, oreng se kalowar dhari lobang bakal tajira’a. Jareya kabbi bakal kalakona e bakto se bi’ Sengko’ la etantowagi kaangguy maancor Mo’ab.

⁴⁵ Reng-oreng ngongse se ta’ bisa apa-rapa nyare pangaoban e Hesybon, tape kottha jareya teppa’na katonon, ban karatonna Rato Sihon teppa’na katonon keya. Apoy matompes dhaera bagiyan bates ban pagunongan Mo’ab, nagarana reng-oreng se dujan aperrang jareya sampe’ tadha’ karena.

⁴⁶ Palang Mo’ab! Pandhudhu’na se nyemba Diba Kamos la epatompes, na’-ana’na eangko’ egabay tawanan.

⁴⁷ Tape e budhi are kabadha’anna nagara Mo’ab jareya bi’ Sengko’ epabaliya akantha asalla. Sengko’, PANGERAN, la ngoca’!" Jareya se elampa’agiya PANGERAN ka Mo’ab.

Yeremia

Video Yeremia 48

Ikuti Kami:

KONTAK | PARTISIPASI | DONASI