Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri wattunna Yoyakim ana’na Yosia a’jari karaeng Yehuda, Nakana Batara ri nakke,
2 "A’lampako mange a’bicara siagang sikamma tau battua ri lokoanna Rekhab. Erangi ke’nanga mange ri kalase’renna kamaraka ri BallakKu, siagang patalangi anggoro’ ke’nanga."
3 Jari a’lampama’ mange anbuntuli sikontu lokoanna Rekhab, iamintu Yaazanya (ana’na sitau niarenga Yeremia ana’na Habazinya) siagang sikontu sari’battanna siagang sikontu ana’-ana’ bura’nena.
4 Kuerangi ke’nanga mange ri Balla’Na Batara, antama’ ri kamara’na ana’-ana’ gurunna Na’bi Hanan ana’na Yigdalya. Anjo kamaraka tampa’na irateannai kamara’na Imang Maaseya ana’na Salum, ri ampi’na kamara’na pagawe-pagawe maraenga. Maaseya iami pagawe tinggi anjannangngi sikamma pakke’bu’na Balla’Na Batara.
5 Nampa kupadongko’ ri dallekanna sikamma taunna Rekhab pammoneang rassia anggoro’, siagang kaca-kaca pangnginunganga. Nampa kukana ri ke’nanga, "Angnginungki’."
6 Mingka appiali ke’nanga angkana, "Tena nangnginung anggoro’ ikambe. Boena ikambe iamintu Yonadab ana’na Rekhab, napisangkai ikambe kammayatompa jari-jarina ikambe angnginung anggoro’. Anjo pappisangkaya tappakei sa’genna satunggu-tungguna.
7 Takkulleai ikambe a’lamung, takkulleai ikambe appare’ yareka ammallaki koko anggoro’. Lalang sikontu tallasa’na ikambe, tena todong nakkulle ambangung balla’. Musti anjorengi ri kemaya ikambe ammantang, sollanna akkulle ammantang tuli anrinni ri tampaka salaku tau annompang.
8 Sikontu anjo apa naparentakanga Yonadab mae ri kambe naturuki ngasemmi ikambe. Lalang sikontu tallasa’na ikambe, ikambe siagang tubai’-bainena ikambe, kammayatompa ana’-ana’na ikambe, tena ngaseng nangnginung anggoro’.
9 Tena nambangung balla’ ikambe untu’ tampa’ pammantanganna ikambe, mingka anjoreng ri kemaya ammantang ikambe. Tena todong koko anggoro’na ikambe, kammayatompa koko maraeng siagang bine untu’ nilamung. Bodona kana, sikontu apa naparentakanga boena ikambe iamintu Yonadab, naturuki ikambe sibaji’-baji’na.
10 (35:9)
11 Mingka ri wattunna nabunduki Karaeng Nebukadnezar anne pa’rasanganga, natappukimi ikambe untu’ lari battu ri tantarana Babel siagang tantarana Siria, nampa a’lili ikambe mange ammantang ri Yerusalem. Iaminjo saba’na nania’ ikambe ammantang anrinni kamma-kamma anne."
12 Nampa Batara Kaminang Koasaya, iamintu Allata’alana Israel, Nasuroa’ a’lampa mange ri tu Yehuda siagang Yerusalem, nampa Kupabattu anne pasanNa Batara angkana, "Inakke, Batara, akkuta’nang angkana angngapa nutaeroka mappilangngeri ri Nakke, siagang taeroka manuruki ri parenta-parentaKu.
13 (35:12)
14 Yonadab napisangkai jari-jarina angnginung anggoro’, nampa mannuruki ke’nanga ri anjo pappisangkana. Sa’genna anne alloa tena manna sitau battu ri ke’nanga angnginung anggoro’. Mingka iNakke, tena ammariKu a’bicara mae ri kau, mingka taerokako mappilangngeri ri Nakke.
15 Tena ammariKu assuroi battu mae ri kau sikamma atangKu na’bi-na’bia, siagang napakainga’ mako ke’nanga sollanna nupakabaji’ panggaukannu na nupamari a’gau’ ja’dalaka. Napakaingakko ke’nanga sollanna tena nunynyomba mae ri rewata-rewata maraenga siagang tena nupare’ atai kalennu mae ri anjo rewata-rewataya, sollannu akkulle ammantang tuli anrinni ri pa’rasangang Kupassareanga mae ri kau siagang mae ri boe-boenu. Mingka taerokako amparhatikangi siagang taerokako mappilangngeri ri Nakke.
16 Jari-jarina Yonadab mannuruki ri parentana boe-boena ke’nanga, mingka ikau taerokako mannuruki ri Nakke.
17 Lanri kammana anjo, naiNakke, Batara Kaminang Koasaya, iamintu Allata’alana Israel, lappabattuA’ mae ri kau — tu Yehuda siagang Yerusalem — sikontu bala le’baka Kupattantu untu’ ikau ngaseng, sangkamma le’baka Kupau. Anjo kammaya Kugaukangi lanri tenana nuero’ mappilangngeri punna a’bicarA’ mae ri kau, siagang lanri tenana nuero’ appiali ri wattunnu Kukio’."
18 Nampa kukana mae ri sikamma silokoanna Rekhab, angkanaya Batara Kaminang Koasaya, iamintu Allata’alana Israel, akkana kammai anne, "Mannuruki mako mae ri boe-boenu Yonadab; sikontu parentana nuturuki siagang nupajappa ngasemmi.
19 Lanri kammana anjo, iNakke, Batara Kaminang Koasaya, iamintu Allata’alana Israel, a’janjiA’ angkanaya battu ri jari-jarina Yonadab ana’na Rekhab, tuli lania’na tu bura’ne allayani ri Nakke."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA