Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E bakto Yoyakim pottrana Yosiya jumenneng rato Yehuda, PANGERAN adhabu ka sengko’,

² "Kassa’ entar ka reng-oreng kaom Rekhab. Giba reng-oreng jareya ka sala settonganna rowangan e dhalem Tang Padalemman, pas angka’e anggur."

³ Daddi Sengko’ pas entar ngone’e sakabbinna oreng se tamaso’ kaom Rekhab jareya, iya reya Ya’azanya (ana’na oreng se anyama Yeremiya ana’na Habazinya) ban tan-taretanna sarta ana’ lalake’anna.

⁴ Bi’ sengko’ reng-oreng jareya egiba ka Padalemman Socce ka dhalem kennengnganna red-moredda Nabbi Hanan ana’na Yigdalya. Kennengngan jareya e attasanna kennengnganna Imam Ma’aseya ana’na Salum, e seddi’na kennengnganna ja-pangraja laenna. Ma’aseya reya ponggaba tenggi se ajaga bang-labangnga Padalemman Socce.

⁵ Saellana jareya sengko’ nyaba’ bung-tobung se aesse anggur sampe’ possa’ ban las-gellas e adha’anna reng-oreng Rekhab buru. Sengko’ pas ngoca’, "Mara enom."

⁶ Tape reng-oreng jareya nyaot, "Kaula ta’ poron ngenom anggur. Bangatowa kaula Yonadab ana’na Rekhab ta’ marengngagi kaula satoronan ngenom anggur. Larangan gapaneka kaangguy salanjangnga.

⁷ Kaula ta’ eparengngagi atane, jugan ta’ eparengngagi agarap otabana gadhuwan kebbun anggur. Saomorra kaula ta’ eparengngagi maddek compo’; kodu neng e kemah, sopaja kengenga neptep e tana ka’dhinto menangka oreng manca.

⁸ Sadaja papakonna Yonadab bi’ kaula etoro’. Saomorra, kaula sareng ana’ bine kaula tadha’ se ngenoma anggur.

⁹ Kaula padha tadha’ se maddegga compo’, sadaja padha enneng e kemah. Kaula padha tadha’ se gadhuwanna kebbun anggur, teggal otabana ne-binena gandum se etamenna. Pandha’na, sadaja se epakonnagi bangatowa kaula Yonadab gapaneka, sareng kaula sadaja padha etoro’ gu-onggu.

¹⁰ (35:9)

¹¹ Namong e bakto Rato Nebukadnezar nyerrang nagara paneka, kaula sadaja padha motossagi buruwa dhari tantara Babil sareng tantara Siria, ngongse ka Yerusalim. Ganeka sababba aponapa kaula sadaja me’ padha enneng e ka’iya samangken paneka."

¹² PANGERAN Se Mahakobasa, Allahna Isra’il, makon sengko’ entar ka oreng Yehuda ban Yerusalim, epakon manapa’ dhabuna Pangeran se kantha reya ka reng-oreng jareya, "Sengko’, PANGERAN, atanya’a arapa ba’na me’ ta’ endha’ ngedhingngagi Sengko’, ban ta’ endha’ atoro’ ka sabarang se eparenta’agi Sengko’.

¹³ (35:12)

¹⁴ Yonadab ta’ magi toronanna ngenom anggur, bi’ toronanna larangan jareya etoro’. Sampe’ sateya tadha’ settonga toronanna se ngenom anggur. Tape Sengko’ ros-terrosan acaca ka ba’na, ban ba’na ta’ endha’ ngedhingngagi.

¹⁵ Sengko’ ros-terrosan ngotos sakabbinna Tang abdi para nabbi, Tang di-abdi jareya la la-malae ba’na sopaja ba’na ngoba’a tengkana ban ambu se alako jahat. Ba’na epaenga’ ta’ ebagi nyemba ka lah-illah laen ban ta’ ngabdi ka lah-illah jareya, sopaja ba’na ngennenga terros enneng e nagara reya se bi’ Sengko’ la ebagi ka ba’na ban ka bangatowana. Tape ba’na ta’ endha’ ngestowagi ban ta’ endha’ ngedhingngagi Sengko’.

¹⁶ Toronanna Yonadab ta’at ka parentana bangatowana, tape ba’na ta’ ta’at ka Sengko’.

¹⁷ Daddi Sengko’, PANGERAN Se Mahakobasa, Allahna Isra’il, neba’agiya ka ba’na, oreng Yehuda ban Yerusalim, sakabbinna balai se bi’ Sengko’ la etantowagi ka ba’na, akantha se la ekoca’agi bi’ Sengko’. Bi’ Sengko’ ba’na epakantha’a jareya polana ba’na ta’ endha’ ngedhingngagi mon Sengko’ acaca ka ba’na, ban ba’na ta’ endha’ nyaot e bakto ba’na eolok bi’ Sengko’."

¹⁸ Sengko’ pas malae reng-oreng kaom Rekhab ja’ PANGERAN Se Mahakobasa, Allahna Isra’il, adhabu kantha reya, "Ba’na ta’at ka bangatowana, Yonadab; sakabbinna parentana bi’ ba’na etoro’ ban elakone.

¹⁹ Daddi Sengko’, PANGERAN Se Mahakobasa, Allahna Isra’il, ajanji ja’ dhari toronanna Yonadab ana’na Rekhab bakal terrosa badha lalake’ se aladine Sengko’."

Yeremia

Video Yeremia 35

Ikuti Kami:

KONTAK | PARTISIPASI | DONASI