Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara, "Punna nia’ sitau baine nitalla’ ri bura’nenna, nampa anjo bainea nibaineangi ri bura’ne maraeng, takkulleai anjo le’ba’ bura’nenna ambaineangi pole ammotere’, lanri anjo passala’ kammaya lammanraki ri anne pa’rasanganga. Ikau tu Israel, jai sikalimi tanrinnu, antekamma batenu lakkulle ammotere’ mae ri Nakke!
2 Coba sako accini’ nai’ ri coppo’-coppo’na buluka! Tampa’ kereanga mami tena le’ba’ nubattui untu’ a’gau’ bawang? Sangkamma tu Arab ri parang lompoa, kammaminjo batenu ammempo ri biring aganga attayang tau lanuaganga attanring. Nurantassi anne pa’rasanganga lanri a’gau’ bawannu siagang kaja’dallannu.
3 Lanri kammana minjo natattahang je’neka battu ri langi’, siagang tena battu-battuna bosia ri wattu baraka. Sanrapangko pasundala’, siagang tena siri’nu.
4 Ri wattu anjo kasukkarrannu nukana mae ri Nakke angkanaya iNakke manggenu, angkanaya Kukamaseangko battu ri ca’di-ca’dinu.
5 Nukana pole angkanaya tena Kutuli larro mae ri kau. Iaminjo kanannu, he tu Israel, mingka lalang kammana anjo nugaukang tonji kaja’dallang akkullea nugaukang."
6 Ri wattu pamarentahanna Karaeng Yosia, akkana kammai anne Batara ri nakke, "Le’ba’mi nucini’ apa nagaukanga tu Israel, anjo rapang baine tenaya namajarre’ pa’mai’na? NabokoiA’ nampa nagaukang assundalaka irate ri tunggala’ moncong tinggia siagang irawanganna poko’ kayu lompoa.
7 Kukana ri pikkirangKu angkana punna le’ba’mo nagaukang ngaseng anjo sikammaya, lammotereki mae ri Nakke. Mingka tammoterai mae ri Nakke, ba’lalo a’lampai mange assundala’. Lanri kammana minjo naKutallaki siagang Kubongkai. Yehuda, sari’battanna Israel, tenaya namajarre’ pa’mai’na, nacini’ ngasengi anjo sikammaya, mingka tena na’jari malla’. Ba’lalo amminawang tongi a’jari pasundala’,
8 (3:7)
9 siagang tena sikali siri’-siri’na. A’gau’ bawangi lanri anynyombai ri batua siagang poko’-poko’ kayua, sa’genna a’jari rantasa’ anne pa’rasanganga.
10 Le’baki nagaukang ngaseng sikammaya anjo, ammotere’mi anjo tu Yehuda tamajarreka pa’mai’na mae ri Nakke mingka assara-saraiji, lanri tena natulusu’ antama’ ri atinna ke’nanga. INakke, Batara, anne a’bicara."
11 Nampa Napauanga’ Batara angkanaya manna pole nanibokoimo ri tu Israel, mingka bajikangngangiji naanjo tu Yehuda tenaya namajarre’ pa’mai’na.
12 Nasuroa’ Batara a’lampa untu’ ampabattui anne passalaka mae ri Israel angkanaya: "He Israel tenaya namajarre’ pa’mai’na, ammotere’ mako mae ri Nakke! Lompo pangngamaseangA’ ri kau siagang tena Kutuli lalarro mae ri kau.
13 Akuimi angkanaya salako siagang anjari baliko mae ri Batara, Allata’alanu. Akuimi angkanaya le’baki nupassareang pangngainnu mae ri rewata-rewatana bansa maraenga irawanganna poko’-poko’ kayu lompoa, siagang tena numannuruki ri parenta-parentaKu. INakke, Batara, anne a’bicara."
14 Nakana Batara, "He umma’ tenaya namajarre’ pa’mai’na, ammotere’ mako mae ri Nakke! INakke ampatangko. LaKualleko tassitau battu ri tunggala’ kotaya, ta’rua tau battu ri tunggala’ lokoang bija, nampa Kuerangko ammotere’ mange ri Bulu’ Sion.
15 LaKusareko pamimping-pamimping mannurukia ri Nakke. Lanapimpingko ke’nanga siagang baji’ kammayatompa mapahang bajika.
16 Nampa punna pila’ katambammi jainu ri anne pa’rasanganga, tenamo nalanabicara pole taua ri passala’na Patti ParjanjiangKu. Tenamo nalanawa-nawa yareka nau’rangi ke’nanga, ba’lalo tenamo nalanaparalluangi yareka tenamo nalappare’ pole ke’nanga Patti Parjanjiang maraeng.
17 Anjo wattua kota Yerusalem laniarengi ‘Empoang Kala’biranNa Batara’, siagang sikontu bansaya la’rappungi ri anjo kotaya untu’ anynyomba ri Nakke. Tenamo nalanaturuki ero’ kalenna ke’nanga ja’dalaka siagang kapala batua anjo.
18 Lasse’rei Israel siagang Yehuda, nasiagang battu ri butta pammelakkanga, battu wara’. Lammotereki ke’nanga mange ri pa’rasangang le’baka Kupassareang a’jari butta pisaka mae ri boe-boenu."
19 Nakana Batara, "He Israel, erokKa’ antarimako a’jari anakKu, siagang assareko pa’rasangang appakasannanga pa’mai’, pa’rasangang kaminang bajika ri sikontu linoa. ErokKa’ nukio’ mangge, siagang tenamo nanula’lampa pole ampilariA’.
20 Mingka rapang baine tenaya namajarre’ pa’mai’na, sangkamma tomminjo tena namajarre’ pa’mai’nu mae ri Nakke. INakke, Batara, anne a’bicara."
21 Ri coppo’na bulu’-buluka nia’ kalangngerang sa’ra gegere’; iaminjo sa’ranna umma’ Israel angngarru’ siagang appala’ tojeng, lanri dorakami ke’nanga, siagang nakaluppaimi Karaeng Allata’alana ke’nanga.
22 He ikau ngaseng sikontu tau ambokoiyai Batara, ammotere’ mako! LaNapammolleko battu ri garrinnu, siagang laNapa’jariko majarre’ ri pa’mai’nu. Nukana ngaseng, "Iyo, kamma-kamma anne ammotere’mi ikambe mae ri Batara, nasaba’ Iami Allata’alana ikambe.
23 Tena matu-matunna ikambe assua’-suara’ anynyomba barhala irate ri coppo’-coppo’ buluka. Battu ri Karaeng Allata’alana bawang ikambe pannulunna umma’ Israel.
24 Lanri anynyombana ikambe ri rewata appakasiri’-sirika anjo natappela’mo ana’-ana’na ikambe kammayatompa olo’-olo’ sapi siagang gimbala’na ikambe, iamintu sikontu apa le’baka nausahai boe-boena ikambe battu riolo dudu.
25 Jari, boli’mi kamma siri’-siri’ ikambe, siagang boli’mi kamma a’jari tuna ikambe. Nasaba’, ikambe siagang boe-boena ikambe doraka ngasemmaki’ ri Karaeng Allata’ala, kammayatompa tenale’bakaki’ mannuruki ri parenta-parentaNa."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA