Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nasuroa’ Batara a’lampa mange ri balla’ karaenna karaeng Yehuda, jari-jarina Daud, untu’ ampabattui pasanNa Batara mae ri karaenga, mae ri sikamma pagawena, kammayatompa mae ri sikontu pandudu’na Yerusalem. Iaminne kana-kananNa Batara mae ri ke’nanga,
2 (22:1)
3 "A’gau’ adelekko siagang a’gau’ lambusukko. Lappassangi tau nipaccoka battu ri kakoasanna tau papaccoka. Teako anjallakkangi yareka teako a’gau’ ja’dalaki mae ri bansa maraeng niaka ammantang ri alla’nu, mae ri ana’-ana’ kukanga, yareka mae ri jandaya. Teako bunoi tau tenaya salana ri anne tampaka.
4 Punna attojeng-tojengko ampajappai anjo parenta-parentaKu, sikamma tau ammarentaya sangkamma Daud lantamaki ri sikamma pakke’bu’ lompona anne balla’ karaenga. Anjo ke’nanga siagang sikamma pagawena kammayatompa ra’ya’na ke’nanga la’dongko’ kareta jarangi.
5 Mingka punna tena nuturuki parenta-parentaKu, assumpA’ angkanaya anne balla’ karaenga la’jari loro-loro mami le’ba’ nakanre pepe’. INakke, Batara, anne akkana.
6 Untu’ iNakke, anjo balla’ karaenna karaeng Yehuda ga’ga sikali, sangkammai ga’gana butta Gilead siagang moncong-moncong Libanon; mingka anjo tampaka laKupa’jari sangkamma parang lompo tenaya nanipammantangngi ri tau.
7 LaKukiringi battu taua untu’ angngancuruki. Langngerangi ke’nanga pangkulu’, nampa narumbang sikamma benteng-benteng ga’gana nipareka battu ri camara Libanon. Nampa lanapasambila ke’nanga antama’ ri pepeka.
8 Le’baki anjo jaimi bansa maraeng ammalo anjoreng, nampa massing sikuta’nang para ia angkana, angngapa na iNakke, Batara, appanggaukang kamma anjo mae ri anjo kota ga’ga kammaya.
9 Nampa lappialimo taua angkanaya nakajariang ngaseng anjo sikammaya lanri nudakkaina parjanjiannu siagang iNakke, Allata’alanu, kammayatompa lanri anynyomba mako siagang assambayang mako mae ri rewata-rewata maraenga."
10 Ikau tu Yehuda, teako susai pa’mai’nu lanri kamateanna Karaeng Yosia. Karrukimi Yoahas ana’ bura’nena nasaba’ nierammi a’lampa na talammotera. Talanacinikami pole butta passolongang cera’na.
11 Ri passala’na Yoahas, ana’ bura’nena Yosia, a’jari karaenga ri Yehuda ansambeangi manggena, kamma anne kananNa Batara, "A’lampami battu anrinni, siagang talammoterami pole.
12 Lamatei ri butta pammelakkanga, siagang talanacinikami pole anne pa’rasanganga."
13 Cilakai tau ambangungai balla’na siagang tena naadele’, kammayatompa ampa’la’bangi kajekkonganna. Cilakai tau assuroa anjama nampa tena nasarei gajina taua.
14 Cilaka tongi tau angkanaya, "Lambangunga’ balla’ karaeng lompoa siagang luaraka kamara’na ri bageang lonjo’ iratea," nampa napare’ ri anjo balla’ karaenga jandela ammake les kayu camara Libanon, siagang nice’ eja.
15 Pilangngeri, he Karaeng Yoyakim! Punna nubangung balla’ karaeng battu ri kayu Libanon kaminang bajika, maka nukana anjo a’jari butti angkanaya ikau karaeng kaminang baji’ battu ri sikamma karaeng maraenga? Coba sai u’rangi manggenu: Nakasiaki tallasa’ mate’nea siagang angngerangi wassele’ sikontu usahana, lanri tuli lambusuki siagang tena najekkong angngadeli, kammayatompa adeleki angngadeli parkarana tau kasi-asia. Memang kammaminjo mustina panggaukanna tau tappaka mae ri Batara.
16 (22:15)
17 Mingka ikau, Yoyakim, maraengi. Ikau kaparalluang kalennu bawang nuboya. Nubunoi tau tenaya salana, siagang nujallakkangi ra’yaka nukapallakki.
18 Lanri kammana anjo, ri sesena Yoyakim karaeng Yehuda, ana’ bura’nena Yosia, kammaminne kananNa Batara, "Kamateanna tena nalanikarruki; tena tau lakkana, ‘Kodong, agangku, kodong.’ Tena tau lasusa yareka ammarrang angkana, ‘Kodong karaeng!’
19 Lanire’resangi Yoyakim nampa nipasambila assulu’ battu ri pakke’bu’ lompona Yerusalem, sangkamma nagaukanga taua mae ri keledai matea."
20 Nakana Batara, "He pandudu’na Yerusalem, a’lampako mange ri Libanon siagang Basan, nampa akkiokko anjoreng. Ammarrangko ri monconna Moab, nasaba’ sikontu agannu nibeta ngasemmi.
21 Le’ba’Ma’ a’bicara ri kau ri wattunna baji’ kaadaannu, mingka taerokako mappilangngeri. Memang kammaminjo gau’-gau’nu battu riolo sa’genna kamma-kamma anne; tale’bakako ero’ mannuruki ri Nakke.
22 Lanri kammana anjo sikamma pamimpinnu lalanynyaki rapang nitui’ ri anging. Sikamma agang-agannu laniengkaki salaku tau nitahang, kammayatompa kotanu lanihinai siagang nipakasiriki passabakkang sikontu kaja’dallannu.
23 Amangko ammantang nitammulili ri benteng camara Libanon, mingka sallang punna natuju mako kapa’risang, lasessa mako rapang baine eroka ammana’."
24 Nakana Batara ri Karaeng Yoyakhin, ana’ bura’nena Yoyakim karaeng Yehuda, "Lanri iNakke, Allata’ala mattallasaka, Kupattantu tojeng-tojengi angkanaya manna pole ikau rapangko cincingKu ammakea meterei ri lima kanangKu, mingka laKupasulukko
25 nampa Kupassareangko mae ri tau nukamallakkanga siagang eroka ambunoko. LaKupassareangko mae ri Nebukadnezar karaeng Babel, siagang sikontu pasukanna.
26 Ikau siagang amma’nu laKubongkako siagang laKupelakko mange ri pa’rasangang teai butta passolongang cera’nu, siagang anjorengko lamate.
27 Lasanna’ nakku’nu ri anne pa’rasanganga, mingka tena nulammotere’."
28 Inakke Yeremia, kukana, "Apaka anjo Karaeng Yoyakhin a’jarimi sanrapang uring reppe’ nipelaka siagang tenayamo ningai? Iakami anjo saba’na nanibongkai siagang nipelaki siagang ana’-ana’na mange ri pa’rasangang tenaya naassengi ke’nanga?"
29 O, pa’rasangangku, pilangngeri apa kananNa Batara, angkana,
30 "Anjo taua le’ba’mi nipattantu angkanaya latappelaki ana’-ana’na siagang tuli lasalasai lalang katallassanna. Battu ri jari-jarina tena tasalasa lalang ammarentana ri Yehuda, tena nasangkamma Karaeng Daud. INakke, Batara, anne akkana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA