Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Isuruh TUHAN aku lawes ku istana raja Juda, kesusuren Daud. I jah Kuturiken man raja, man pegawai-pegawaina ras kalak Jerusalem, gelah ibegikenna kai si ikataken TUHAN:
2 (Yer 22:1)
3 "Aku kap TUHAN si merentahken kam erbahan bujur ras adil. Pulahi kalak si tertipu i bas penipunna nari. Ula tindih dingen ula bahan si la mehuli nandangi kalak pertandang, anak melumang ras diberu balu-balu. Ula amburken dareh kalak si la ersalah i bas negeri si badia enda.
4 Adi tuhu-tuhu ikutkenndu bagi si Kukataken enda kesusuren Daud tetap ngerajai negeri enda. Radu ras pegawai-pegawaina, rayatna tetap banci mentasi pintun gerbang istana enda alu gereta kuda ras ngersak kuda.
5 Tapi adi la ikutkenndu kai si Kuperentahken ersumpah Aku man bandu maka, runtuh me istana enda. Aku kap TUHAN si melasken ranan enda.
6 Man bangKu, keluarga Juda seri kap jilena ras negeri Gileat bage pe ras deleng-deleng Libanon. Tapi Kubahan maka ingan enda jadi melungen lanai lit i je kai pe enggeluh.
7 Kusuruh kalak engkernepkenca. Ibabana kapak lako nabah batang kayu aras si mejilena jenari iambengken ku bas api.
8 Kenca si e, kerina kalak si mentas arah e si sungkunen sapih-sapih ia ngkai maka Aku TUHAN ngelakoken perbahanen si bagenda nandangi kota si mbelin enda.
9 Jabapna eme erkiteken itundalkenndu perjanjindu ras Aku, Dibatandu, jenari nembah dingen erdahin kam man dibata-dibata si deban."
10 O kalak Juda ula tangisi Raja Josia; ula ceda atendu kerna kematenna. Tapi tangisilah anakna Joas, si nggo ibaba kalak lawes; lanai ia pernah mulih, lanai pernah idahna negeri inganna tubuh ndube.
11 Nina TUHAN kerna Joas anak Josia si nggancihken bapana jadi raja, "Ia nggo lawes i Juda nari janah ndigan pe lanai mulihken.
12 Ia mate i bas negeri ku ja ia ibaba janah ndigan pe lanai pernah idahna negeri enda."
13 Cilakalah kalak si manteki rumahna alu kinilabujuren si nambahi bilikna alu la kinilepaken si nuruh kalak erdahin la ngalo kai pe, alu la mereken upahna.
14 Cilakalah kalak si ngataken, "Kupanteki me rumah mbelin man bangku, ruangna mbas dingen ertingkat." Rumah e ipasangna jendelana, ilapisi alu kayu aras, icatna alu cat megara si mejile.
15 Iakapndu kin kam banci jadi raja si mehuli kune ipantekindu istana alu kayu aras si mejile, jilen asangken rumah kalak si deban? Bapandu malem atena ras sangap kal ia enggeluh. Ia lalap bujur dingen adil perbahanenna. Kasa kai si idahikenna, jore kerina.
16 Kalak musil iadilina alu bujur, emaka mehuli me sikerajangenna. Ma e kin ertina nandai Aku?
17 Tapi kam, kepentingenndu ngenca idahndu, dareh kalak si la ersalah iamburkenndu, bangsandu itindihindu alu mesangat, Aku TUHAN kap si nggo melasken ranan enda.
18 Kenca bage ngerana TUHAN kerna Joyakim anak Josia, raja Juda, "La lit kalak si erceda ate kerna kematenna, la lit si ngataken, 'Andiko teman! Andiko seninangku!' La lit kalak nangisi ia, la lit kalak serko ngataken, 'Andiko tuan! Andiko rajangku!'
19 Bali penanemken kalak ia ras nanemken kelede; isarenken kalak jenari iambengken arah pintu gerbang Jerusalem.
20 O kalak Jerusalem, to ku Libanon janah serko, laweslah ku Basan janah ngandung. Erlebuhlah i datas deleng Moap nari, perban kerina temanndu nggo italuken.
21 Tupung kam i bas kesenangen denga ngerana TUHAN bandu, tapi la diatendu pe, bage me si ilakokenndu gedang-gedang geluhndu la pernah kam patuh man TUHAN.
22 Peminpin-peminpinndu iembusken angin, teman-temanndu ibaba jadi tabanen perang. Kotandu lanai ermulia, tapi ijuruken, erkiteken kerina kejahaten si ibahanndu.
23 Tapi kam si tading i tengah-tengah batang aras si ibaba i Libanon nari; andiko kuahna ate man bandu tupung si mesui engkenai kam, bali suina iakapndu ras diberu sangana mupus."
24 Nina TUHAN man Raja Joyakin anak Joyakim raja Juda, "Asa tuhu aku Dibata si enggeluh, aminna pe kam cincin setempel i bas tanKu si kemuhun, Kueldek me kam,
25 jenari kuendesken man kalak si nibiarindu, kalak si ersura-sura munuh kam. Kuendesken kam man Nebukadnesar, raja Babilon ras tenterana.
26 Kam ras nandendu Kupaksa ku bas pembuangen. Kubenterken ku negeri si la inganndu tubuh, i jah me kam duana mate.
27 Merincuh kal kam mulih ku negeri enda, tapi ndigan pe lanai kam pernah mulih."
28 Ningku, "Bali kin Raja Joyakin ras guci si idampesken, si la ise pe merluken ia? Ngkai maka ia ras anak-anakna iangkut ku pembuangen ku negeri si la itandaina?"
29 O negeri, negeri, negeri! Dengkehkenlah kai si ikataken TUHAN,
30 "Kalak enda iukum alu kebenen anak-anakna, ia jadi dilaki si la sangap. La lit si jadi kesusurenna, si nggancihken ia jadi raja Juda selaku kesusuren Daud Aku kap TUHAN si melasken ranan enda."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA