Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sedekia, raja Juda nuruh Pashur anak si Malkia ras Imam Sepanya anak si Maaseya ndahi aku. Pemindonna man bangku arah kalak enda nina,
2 "Pindoken sitik man TUHAN entah mawen banci IlakokenNa man banta tanda kuasa lako maksa gelah mundur Nebukadnesar, raja Babilon ras tenterana si sangana ngkepung kota enda."
3 Kenca TUHAN nggo ngerana man bangku emaka kukataken man persuruhen e,
4 gelah ikatakenna man Sedekia kata TUHAN, Dibata nu Israel, "O Sedekia, Aku jine si naluken kam ras tenterandu, si sangana erperang ngelawan raja Babilon ras tenterana. Kupegun-gun me senjata tenterandu i tengah kota enda.
5 Aku me si ngelawan kam alu gegehKu, alu nembehKu, alu rawa ras runtusKu.
6 Asa si nggeluh i bas kota enda Kubunuh me. Subuk manusia ras rubia-rubia mutus me kesahna erkiteken penakit si mejin.
7 Tapi kam ras pegawai-pegawaindu si la mate ibahan perang, kelihen, ras penakit -- Kupediat kam itangkap Raja Nebukadnesar ras imbang-imbangndu si atena munuh kam. Nebukadnesar me si meltepken kesahndu. La ipulahina kam, la icidahkenna perkuah ate, la kam iampunina. Aku TUHAN kap si nggo melasken ranan enda."
8 Kenca bage ikataken TUHAN man bangku gelah kukataken man bangsa e, "Dengkehkenlah! Aku TUHAN, Kupepilihken dalan si man dalanenndu. Dalan kempak kegeluhen entah dalan kempak kematen.
9 Ise si tading i bas kota enda mate erkiteken perang, kelihen tah penakit. Tapi ise si lawes ngendesken bana man kalak Babilon si nerang kota enda, ia la ibunuh, si langlangna nggo ikelinina kesahna.
10 Nggo Kutetapken i bas ukurKu, maka la Kupulahi kota enda, tapi Kukernepken. Ibereken me ia man raja Babilon jenari icilukna radas ku taneh. Aku kap TUHAN si nggo melasken ranan enda."
11 Isuruh TUHAN aku melasken kata enda man keluarga raja Juda kesusuren Daud: "Aku TUHAN, dengkehkenlah kai si Kukataken. Perdiatekenlah maka tep-tep wari ilakokenndu si bujur. Pulahilah kalak si kena tipu i bas penipu nari. Adi la bage perbahanenndu kejahaten si ibahanndu erbahan gurlah rawangKu desken api si gara si la ternimpeti nari.
12 (Yer 21:11)
13 O Jerusalem, si ipanteki i babo baluren-baluren desken batu si pantek i babo taneh kendit. Tapi Aku kap si ngelawan kam. Iakapndu la lit ise pe si ngasup ngelawan kam entah ngerontasken pertahanenndu.
14 Tapi Kuukum kam erkiteken perbahanenndu. Kuciluk me istanandu emaka ipan api me kasa kai si lit sekelewetndu. Aku TUHAN kap si nggo melasken ranan enda."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA