Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On do hata ni Jahowa na roh hubani si Jeremia,
2 “Jongjong ma ho, anjaha tuad ma ho hu rumah ni sitopa hudon, ijai ma pabogeihonon-Ku hatang-Ku bam.”
3 Jadi tuad ma ahu hu rumah ni sitopa hudon ai anjaha tonggor ma, tudu do ia marhorja manjolom parugasni ai.
4 Tapi hudon na sihol paulionni ai humbani tanoh halampung, maseda do ibagas tangan ni sitopa hudon ai; jadi ipauli ma hudon na legan hunjai, sonaha na dear nini uhurni.
5 Dob ai roh ma hata ni Jahowa hu bangku sonon,
6 “Ai seng tarbahen Ahu gakni bannima, songon pambahen ni sitopa hudon on, ale ginompar ni Israel?” nini Jahowa. “Tonggor ma, songon tanoh halampung ibagas tangan ni sitopa hudon, sonai do hanima ibagas tangan-Ku, ale ginompar ni Israel.
7 Marsipota marsahap Ahu pasal sada bangsa atap sada harajaon, laho mangorbat manropuki ampa parsedahon ai;
8 tapi anggo mubah do humbani hajahatonni bangsa na dob Hupalumba ai, jadi marpangulaki do uhur-Hu pasal hamagouan na dob Huranggihon ai bani.
9 Marsipota marsahap do Ahu pasal sada bangsa atap sada harajaon, laho manuan ampa pajongjongkon ai;
10 tapi anggo ibahen na jahat i lobei ni matang-Ku, seng itangihon sorang-Ku, jadi solsolan-Ku ma diring-Ku pasal na madear na sihol bahenon-Ku hu bani.
11 Ai pe, hatahon ma hubani halak Juda ampa hubani pangisi ni Jerusalem. Sonon do hata ni Jahowa, ʻTonggor ma, domma Huranggi hinan hamagouan dompak hanima, anjaha Husurahon manlawan hanima. Mulak ma hanima, ganup humbani parlahouni na masambor, anjaha padear hanima ma dalannima ampa pambahenannima.ʼ
12 Tapi nini sidea ma, ʻSisoya-soya do ai! Domu hubani pingkirannami do hanami marparlahou, anjaha ganup mambahen domu hubani hengkeng ni uhurni na jahat ai.ʼ
13 Halani ai sonon do hata ni Jahowa, ʻSungkun ma i tongah-tongah ni bangsa parbegu, atap dong do na dob ongga mambogei sisonai!ʼ
14 Ai ongga do masab salju humbani batu-batu na i dolog Hermon? Ai ongga do horah bah na manorsuk, na torus mabaor hun dolog?
15 Tapi anggo bangsang-Ku lupa do sidea Bangku, bani sisombahon do sidea manutung dahupa; jomba do sidea bani dalan ni sidea, bani dalan na basaia ai, mardalan bani dalan na so pinauli.
16 gabe songgot-songgot do sidea ibahen, gabe siapason ronsi sadokah ni dokahni. Ganup na montas hunjai tarsonggot do anjaha iupir-upirhon uluni.
17 Songon logou na hun purba merap do sidea bahenon-Ku i lobei ni munsuh. Gurung-Ku do patuduhkonon-Ku bani sidea sedo bohing-Ku, bani ari ni hamagouan ni sidea.”
18 Nini sidea, “Laho ma hita mantahihon si Jeremia, ai seng anjai surut titah humbani malim, podah humbani na maruhur ampa hata ai humbani nabi. Laho ma hita, agou hita ma ia marhitei hatani sandiri, anjaha tangi ma hita pasal sagala hatani.
19 Ham Jahowa, pardiatei Ham ma ahu, tangar Ham sora ni sipanlawan bangku.
20 Ai patut do na jahat balos ni na madear? Tongon, ihurak sidea do godung bangku? Ingat Ham ma, sonaha parjongjongku i lobei-Mu laho mangapiti sidea i lobei-Mu, laho palembangkon ringis-Mu humbani sidea.
21 Halani ai uhum Ham ma anak ni sidea marhitei lohei, anjaha ondoskon Ham ma sidea bani kuasa ni podang. Sai popor ma jolma ni sidea anjaha mabalu, anjaha dalahi ni sidea marmateian ma ibahen sampar; garama ni sidea pe rasei ma ibahen podang bani parmunsuhan.
22 Sai tarbogei ma doruh-doruh hun rumah ni sidea, anggo iparoh Ham bala sompong mandorab sidea! Ai ihurak sidea do godung laho manangkap ahu, anjaha ponop itaon siding bani naheihu.
23 Ham Jahowa, ibotoh Ham do ganup partahi-tahian ni sidea; laho mamunuh ahu: Ulang ma sasap Ham hajahaton ni sidea ai, anjaha ulang ma masabkon Ham dousa ni sidea hun lobei-Mu. Mardabuhan ma sidea bahen Ham i lobei-Mu. Pasaud Ham ma uhur-Mu bani sidea bani panorang ni ringis-Mu.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA