Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu ka sengko’,
2 "Kassa’ ba’na entar ka bengkona tokang polo’; e dhissa’ bi’ Sengko’ ba’na ebala’ana apa Tang pessen."
3 Daddi Sengko’ entar ka bengkona tokang polo’ jareya ban sengko’ nangale’e oreng jareya teppa’na agabay polo’.
4 Mon polo’ se ekagabay jareya korang bagus, pas elakone pole ekagabay polo’ akantha se ekakarep atena.
5 PANGERAN pas makon Sengko’ ngoca’ ka ommat Isra’il,
6 "He Tang ommat, mon lempong rowa bi’ tokang polo’ epakantha jareya, masa’ ba’na ta’ ekennenga pakantha jareya keya bi’ Sengko’? Akantha lempong e tanangnga tokang polo’ rowa, bariya keya ba’na badha e dhalem Tang tanang.
7 Mon e settong bakto Sengko’ motossagi nyabuda, magujura ban maancora settong bangsa otaba karaja’an,
8 tape bangsa jareya pas atobat dhari dusana, Tang neyat jareya epaburunga.
9 Sabaligga, mon Sengko’ motossagi maddegga otaba makokowa settong bangsa otaba karaja’an,
10 tape bangsa jareya pas ta’ ta’at ka Sengko’ sarta atengka juba’, Tang neyat jareya epaburunga."
11 PANGERAN adhabu ka sengko’, "Sateya kassa’ kabala ka oreng Yehuda ban pandhudhu’ Yerusalim ja’ Sengko’ teppa’na andhi’ sajja ngamosowa reng-oreng jareya ban nyadhiya’agiya okoman ka reng-oreng jareya. Soro reng-oreng jareya maambu carana odhi’na se dusa ban mateppa’ tengka polana.
12 Tape reng-oreng jareya bakal nyaoda kantha reya, ‘Ponapa gunana? Kaula norodi karep kaula dibi’. Kaula ngalakonana pangaterrona ate se jahat!’"
13 PANGERAN adhabu, "Tanya’agi ka saneyap bangsa ba’ taowa badha kadaddiyan se kantha reya. Ommat Isra’il ngalakone barang se talebat nako’e!
14 Ta’ tao salju sampe’ mosna dhari gunong bato e Libanon. Ta’ tao aeng se cellep se agili e pagunongan sampe’ kerreng.
15 Tape Tang ommat loppa ka Sengko’ ban ngobbar dupa ka brahala. Reng-oreng jareya tatandhung e rong-lorong kona se kodu elebadi aba’na, pas nyaleyot ka jalan se gi’ ta’ eparata.
16 Nagara reya bi’ reng-oreng jareya la epadaddi kennengngan se talebat nako’e, ban salanjangnga bakal ebi-cebbiya oreng. Oreng se lebat e jadhiya bakal pek-kepeggana kabbi polana marenges.
17 Akantha abu se ekebbat angen temor, bariya keya Tang ommat bi’ Sengko’ epatabuyana e adha’na mosona. Mon dhateng balai, Sengko’ mongkora, ta’ nolonga reng-oreng jareya!"
18 Oreng ngoca’, "Mara asakongkel alaban ka Yeremiya. Banne pera’ Yeremiya jareya se bisa acaca abakkele Allah. Salanjangnga terros badha imam se terros bisa aberri’ pangajaran, badha oreng bicaksana se bisa aberri’ babala’an; ban badha nabbi se bisa manapa’ dhabuna Pangeran ka sengko’ ban ba’na. Mara sateya parkara’agi ka pangadilan, ban ja’ edhingngagi pole cacana."
19 Daddi sengko’ adu’a ka PANGERAN, "Guste PANGERAN, peyarsa’agi du’a abdidalem; peyarsa’agi ponapa se ekoca’agi moso abdidalem parkara abdidalem!
20 Ponapa pantes kabecce’an ebales sareng kajahadan? Namong reng-oreng ka’dhinto ngale lobang sopaja abdidalem tabalusoga. Kaemodi, Guste, ja’ abdidalem ampon abillai reng-oreng gapaneka e ajunannepon Junandalem, sopaja Junandalem ta’ kantosa duka ka reng-oreng gapaneka.
21 Namong samangken, GUSTE, diggal ana’na reng-oreng gapaneka me’ olle mate kalaparan otabana tebas e dhalem paperrangan. Moga babine’anna kaelangana lake sareng na’-ana’na; moga lalake’anna padha’a mate polana panyaket, ngangodhadanna mate e dhalem paperrangan.
22 Padhatengngagi daksakala bigal ka compo’epon reng-oreng gapaneka, me’ olle sadaja padha reng-cerrengan katako’an. Reng-oreng gapaneka ampon ngale lobang sopaja abdidalem tabalusoga ka dhalemmanna, sareng masang jebbak ajira’a abdidalem.
23 Namong Junandalem, GUSTE, ngagali ka sadaja sajjaepon reng-oreng gapaneka kaangguy mateyana abdidalem. Daddi, ja’ sapora reng-oreng gapaneka, ja’ paelang kasala’annepon. Pokol reng-oreng gapaneka pakantos labu. Ngereng okom reng-oreng gapaneka e dhalem dukaepon Junandalem."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA