Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dousa ni Juda tarsurat do marhitei pena bosi; marhitei pena intan do iuhirhon ai bani batu panuratan ni uhur ni sidea. ampa bani tanduk ni anjapanjap ni sidea,
2 ai idingat anak ni sidea do anjapanjap ampa Asera ni sidea, na i toruh ni hayu na maratah ampa bani buntu-buntu na gijang,
3 bani dolog-dolog ampa i tongah ladang. Artamu ampa haganup habayakonmu ondoskonon-Ku do gabe taban-taban gabe upah ni dousamu, bani haganup nagorimu.
4 Jadi tanggalhononmu ma tanganmu humbani pusakamu na Hubere bam, anjaha bahenon-Ku ma ho gabe jabolon ni munsuhmu bani nagori na so tinandamu. Ai hanima do pagara apuy ni ringis-Ku, apuy na gara tongtong.
5 Sonon do hata ni Jahowa, “Magou ma halak na martenger ni uhur bani jolma, na marpangajaman bani gogoh ni manisia, anjaha na pasurut uhurni humbani Jahowa.
6 Usih do ia bani naporon i halimisan, na seng mangahapkon roh na madear; marianan do ia i tanoh dorging na i halimisan, bani tanoh porad, na so niiankon ni jolma.
7 Tapi martuah ma halak na martenger ni uhur bani Jahowa, anjaha na mambahen Jahowa haporusanni.
8 Usih do ia hubani hayu na sinuan i topi ni bah, na pajulur uratni dompak bah. Seng mabiar ia age roh na milas, anjaha tongtong do maratah bulungni; seng rusak ia bani tahun logou ni ari, anjaha seng mangadi ia marbuah.
9 Sipaoto-oto do uhur ni jolma, lobih humbani haganup na legan; jahat tumang, ise ma na boi mananda in?
10 Ahu do Jahowa sipareksa uhur ampa siuji piah-piah, na mambalaskon bani jolma romban hubani parlahouni domu hubani buah ni pambahenanni.
11 Songon dayok rimba na mamodomkon tolur na so tinolurhonni, sonai do halak na patumpuhon arta humbani dalan na so dalanni; bani partongahan ni umurni tadingkononni do ai anjaha bani ujung ni goluhni gabe na oto do ia.
12 Hotak hasangapon, timbul humbani mungkahni, ai ma ianan na pansing bennami.
13 Ham Jahowa, pangarapan ni Israel, sagala na manadingkon Ham maningon tarbador do; na marbalik hun Bamu, i tanoh do tarsurat goranni, halani itadingkon sidea Jahowa, sumbul ni bah hagoluhan.”
14 “Pamalum Ham ma ahu, ale Jahowa, ase malum botul ahu, paluah Ham ma ahu, ase maluah ahu tongon, ai Ham do puji-pujian bangku.
15 Tonggor ma, sidea do mangkatahon bangku, ʻIja do hata ni Jahowa? Sai roh ma ai tongon!ʼ
16 Tapi anggo ahu seng ongga husosak-sosak Ham manuruh na masambor, atap huharosuhkon ari hamagouan ai, ibotoh Ham do ai; aha na luar humbani pamanganku, talar do ai i lobei-Mu.
17 Ulang ma Ham gabe songgot-songgot bangku; Ham do haporusan bangku bani ari hamagouan.
18 Sai bador ma bahen Ham sidea na mangayak-ayak ahu, tapi ulang ma bador anggo ahu; sai tarsonggot ma bahen Ham sidea, tapi ulang ma tarsonggot anggo ahu; paroh Ham ma bani sidea ari hamagouan, lompit dua ma hasedaon ni sidea bahen Ham.”
19 Sonon do hata ni Jahowa hu bangku, “Laho ma ho, jongjong ma ho bani horbangan ni anak ni bangsa in, hamasukan ampa pandaratan bani raja-raja ni Juda, ampa bani haganup horbangan ni Jerusalem,
20 anjaha hatahon ma bani sidea, ʻTangihon ma hata ni Jahowa, ale raja ni Juda, ampa haganup Juda, ampa haganup pangisi ni Jerusalem, na masuk humbani horbangan on!ʼ
21 Sonon do hata ni Jahowa, Anggo sihol manggoluh hanima, jaga ma hanima, ulang ma usung hanima sibobanon bani ari Sabat, atap iboan hanima hu horbangan ni Jerusalem.
22 Anjaha ulang ma usung hanima hun rumahnima sibobanon sanggah ari Sabat, atap ilahoi hanima sada horja, tapi papansing hanima ma ari Sabat in, songon na dob Hutitahkon bani ompungnima.
23 Tapi seng itangihon sidea atap ipaeleng pinggolni; lambin ipajogal do tangkuhukni, ase ulang marpanangar sidea anjaha tarjalo sidea pangajaran.
24 Tapi anggo itangihon hanima Ahu,” nini Jahowa, “Anjaha seng iboban hanima masuk sibobanon sanggah ari Sabat hun horbangan ni huta on, tapi ipapansing hanima ari Sabat in, seng marhorja hanima bani ari ai,
25 jadi sai masuk do hun horbangan on raja-raja na hundul bani paratas ni si Daud, mangkunduli gareta ampa huda, sidea ampa na sangap-sangap ni halak Juda, ampa pangisi ni Jerusalem; anjaha ianonkon do huta on ronsi sadokah ni dokahni.
26 Anjaha marrohan do halak humbani huta ni Juda ampa ianan inggot ni Jerusalem, hun tanoh Benjamin ampa hun tanoh bornoh-bornoh, hun tanoh pardologan ampa hun tanoh Dangsina, mamboban galangan situtungon ampa galangan sisayaton, galangan sipanganon ampa dahupa, sonai homa galangan puji-pujian hu Rumah ni Jahowa.
27 Tapi anggo seng itangihon hanima Ahu, ase ipapansing hanima ari Sabat in, anjaha seng iusung hanima sibobanon laho masuk hun horbangan ni Jerusalem bani ari Sabat, jadi pagaraon-Ku ma apuy bani horbanganni ai, anjaha bois ma istana-istana na i Jerusalem, anjaha seng anjai mintop ai.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA