Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nina TUHAN, "O kalak Juda, dosandu nggo isuratken salu pena besi. Dosandu nggo iukir i bas pusuhndu ras i bas tanduk batar-batarndu alu intan si ntelap.

² Bangsandu mereken persembahen i babo batar-batar, dingen nembah man gana-gana Dewi Asera si ipajekken deherken tep-tep batang kayu si merabun i datas uruk-uruk,

³ bage pe i datas deleng-deleng i tengah mbal-mbal. Kubahan maka ibuat imbang-imbangndu kerina erta-ertandu ras kebayakenndu erkiteken dosa-dosa si ilakokenndu i belang-belang negeri enda.

⁴ Terpaksa ipulahindu negeri si nggo Kubereken man bandu jenari Kubahan kam erdahin guna imbang-imbangndu i bas negeri si langa pernah ietehndu, erkiteken rawangKu gurlah desken api si la ernimpet-nimpet."

⁵ Nina TUHAN, "Kalak si nundalken Aku, kalak si erpengarapen man jelma, kalak si ernalem man gegehna Kuukum kerina.

⁶ Ia desken kayu kitik-kitik i gurun pasir, turah i taneh mesawang si kerah, i babo taneh sira, ise pe la lit tading i je, kai pe la turah. La lit kai pe si mehuli jadi man bana.

⁷ Tapi kalak si ernalem man bangKu, Kupasu-pasu kap ia.

⁸ Ia bali ras batang kayu si turah deher lau maler, uratna njoler seh kempak lau. La aru atena tupung paksa perlego, erkiteken bulungna tetap meratah. La aru atena tupung paksa perlego, lalap meramis buahna.

⁹ Ise ngasup ngantusisa pusuh manusia? La lit si deban bali ras pusuh manusia penipuna; mekeleksa guna ipepalem.

¹⁰ Aku kap TUHAN, si mperdiateken perukuren manusia, si nguji pusuh manusia si ersimulih kempak kalak rikutken lagu langkahna, sue ras kai si ibahanna."

¹¹ Kalak si ndatken untung alu la bujur bali kap ras perik si ngkeremken naruh temanna. I bas pertengahen umur geluhna bene me kebayakenna, i bas pengkeri-kerin geluhna teridah maka kalak lenge kepe ia.

¹² Rumah Pertotonta bali kap ras mahkota si mulia, bena-benana nari kin nggo pajek i datas ancuk-ancuk deleng.

¹³ O TUHAN, Kam kap pengarapen Israel, kalak si nadingken Kam mela kap iakapna. Lesap me ia, desken gelar si isuratken i bas taneh, sabap itadingkenna Kam TUHAN, sumbul si enggeluh.

¹⁴ O TUHAN, pepalem min aku, maka mejuah-juah aku; pulahi min aku, maka terkelin aku. Kam kap ngenca si kupuji!

¹⁵ Nina kalak man bangku, "I ja dage ancamen si ibahan TUHAN man banta e? Suruhlah maka IdalankenNa!"

¹⁶ Tapi, O TUHAN, la pernah kupindo maka seh wari kiniseran man bana. IdahNdu kap si e kerina O TUHAN. IetehNdu kap kai si nggo kukataken.

¹⁷ Ula kearun man bangku. Kam kap jine inganku cicio tupung paksa kiniseran.

¹⁸ Bahan mela iakap kalak si ngayak-ngayak aku, tapi pulahi min aku. Demi ia alu kebiaren, tapi ula bereken kebiaren man bangku. Bereken man bana cilaka jenari perperken ia.

¹⁹ Nina TUHAN man bangku, "O Jeremia momoken katangKu enda i bas Pintu gerbang bangsa e, gerbang dalan bengket raja-raja Juda dingen dalan ndarat i bas kota e nari. Kenca bage lawes kam ku pintu-pintu gerbang si deban i Jerusalem.

²⁰ Kataken man raja-raja Juda, man kerina kalak Juda, ras man kerina kalak si ringan i Jerusalem si bengket arah pintu-pintu gerbang, gelah idengkehkenna kai si Kukataken.

²¹ Turiken man bana adi keleng atena geluhna, la banci ngangkut barang-barang tupung wari Sabat, janah inabasa arah pintu gerbang Jerusalem.

²² La banci kai pe ibabana ndarat i bas rumahna nari tupung wari Sabat; la banci erdahin. Arus maka ipebadiakenna wari Sabat sue ras si Kuperentahken man nini-ninina.

²³ Nini-ninina la Aku ibegikenna, la Aku diatena pe. Tapi mekeng pusuhna; la ia patuh man bangKu dingen la ia nggit erlajar i bas Aku nari.

²⁴ Kataken man bangsa emaka arus ipatuhina kerina si Kuperentahken. La banci ibabana babanna arah pintu gerbang Jerusalem tupung wari Sabat. Arus maka ipebadiakenna wari Sabat dingen la banci kai pe idahikenna.

²⁵ Emaka raja-raja ras si biak raja banci bengket arah pintu gerbang Jerusalem maka bali kuasana ras kuasa Daud nai. Raduken kalak Juda ras Jerusalem inangkihina gereta kuda, dingen iersakna kuda. Kota Jerusalem gelgel idemi salu jelma si nterem.

²⁶ I bas kota-kota Juda, i bas kuta-kuta sekelewet Jerusalem nari, i bas daerah Benyamin nari, i ture-ture deleng nari, i deleng-deleng nari, bage i Selatan Juda nari, rehen kerina kalak ku Rumah PertotonKu; ipersembahkenna ku je persembahen tutungen, persembahen gelehen, persembahen pangan, kumenen, dingen persembahen pengataken bujur man TUHAN.

²⁷ Tapi arus maka ia patuh man bangKu, dingen arus iperdiatekenna wari Sabat. I bas wari e la banci ibabana babanna arah pintun gerbang Jerusalem. Adi ibabana la banci lang Kuciluk me pintun gerbang Jerusalem. Kerina istana Jerusalem ipan api, la ise pe ngasup nimpetisa."

Yeremia

Video Yeremia 17

Ikuti Kami:

KONTAK | PARTISIPASI | DONASI