Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On do hata ni Jahowa, na roh bani si Jeremia, pasal logou ni ari maningting.
2 Marpusok ni uhur do Juda, anjaha horbanganni hurleh; pangisini hundul tangis-tangis i toruh, anjaha doruh-doruh ni Jerusalem manaik do hu atas.
3 Na sangap-sangap marsuruh juakjuakni mangindahi bah; das ma sidea bani parigi, seng dong bah jumpah sidea; mulak ma sidea, lumei gusini; jut do uhurni sidea, hiranan, irungkub sidea do uluni.
4 Siholan do tanoh bani bah, halani seng roh udan hu tanoh in; jut do uhur ni parjuma-juma, martudung-tudung horu ni uhur do sidea.
5 Age ursa boru-boru na i talun, itadingkon do anakni na baru tubuh, halani seng dong be poyon-poyon.
6 Jongjong do halode harangan i atas buntu-buntu na palpalon, daup-daup bani logou songon sorigala; gombur do mata ni sidea halani seng dong sigagaton.
7 “Ham Jahowa, anggo adu-adu hajahatonnami dompak hanami, sai mangurupi ma Ham, halani goran-Mu; tongon buei do panundalionnami, dompak Ham do hanami mardousa.
8 Ham, ale pangarapan ni Israel, Sipaluah bani panorang sanggah hasosakan, mase ma songon halak na legan Ham i tanoh in, songon halak pardalan-dalan na roh marborngin hansa?
9 Mase ma Ham songon halak na jonong, songon puanglima na so boi mangurupi? Tapi i tongah-tongahnami do Ham, ale Jahowa, marpanggorani bani goran-Mu do hanami. Ulang ma tadingkon Ham hanami!”
10 Sonon do hata ni Jahowa bani bangsa on, “Marosuh do sidea hujai-hujon, seng ra sidea pasohkon naheini. Halani ai seng marosuh Jahowa mangidah sidea, idingat do sonari hajahaton ni sidea, anjaha sihol do balaskonon-Ni dousa ni sidea.”
11 Nini Jahowa do hu bangku, “Ulang ma sai martonggoi ho mangapiti bangsa on.
12 Age marpuasa sidea, seng anjai tangihonon-Ku doruh-doruh ni sidea, age pe igalangkon sidea galangan situtungon ampa galangan sipanganon ni sidea, seng marosuh Ahu bani sidea; tapi boiskonon-Ku do sidea marhitei podang, lohei pakon sampar.”
13 Dob ai ningku ma mambalosi, “Ham Tuhan Jahowa, tonggor ma, nabi-nabi ai do mangkatahon bani sidea, ʻSeng anjai idahonnima podang, barang loheian hanima, tapi damei na totap do berehononku bannima bani ianan on.ʼ”
14 Tapi nini Jahowa ma hu bangku, “Ladung do na hinatahon ni nabi-nabi ai marhitei goran-Ku; seng dong Husuruh sidea, atap martonah Ahu bani sidea, atap marsahap bani sidea. Pangungkabon sipaoto-oto, panjahaion na so marnidok, ampa haotoon ni pingkiran ni sidea do ihatahon sidea bannima.
15 Halani ai sonon do hata ni Jahowa dompak nabi na manjahai marhitei goran-Ku, age pe lang Husuruh sidea, anjaha na mangkatahon, ʻSeng anjai roh podang atap lohei hu nagori on. Maningon bois do nabi na sonai marhitei podang ampa lohei.ʼ
16 Anjaha halak na nijahaan ni sidea, maningon radag do i alaman ni Jerusalem, rasei ibahen lohei ampa podang, seng dong na mananom sidea, sidea sandiri, jolmani, anakni pakon boruni. Ai maningon useihonon-Ku do hajahaton ni sidea bani sidea.
17 Hatahon ma bani sidea hata on, ʻSai marabur-abur do iluh ni matang-Ku arian pakon borngin, anjaha seng marnamangadi ai, ai parah do ugah ni boru ni bangsang-Ku, borat do na mangonai bani ai.
18 Anggo laho ahu hu ladang, tonggor ma, na mangkamatei binahen ni podang; mulak masuk ahu hu huta, tonggor ma, halak radag binahen ni lohei; tongon, age nabi ampa malim dalan-dalan do i tanoh in, jut do uhur ni sidea.
19 Ai domma tongon-tongon iambukkon Ham Juda? Ai domma sogam Ham bani Sion? Mase ma ilonsingi Ham hanami, anjaha seng dong hamalumon bennami? Sai mangarap do hanami bani hadameion, tapi seng dong roh na madear, mangarap do hanami bani panorang hamalumon, hape tonggor ma, hasonggoton do roh.
20 Ham Jahowa, itandai hanami do hajahatonnami ampa salah ni ompungnami; tongon, dompak Ham do hanami mardousa.
21 Ulang ma buangkon Ham hanami halani goran-Mu! Ulang ma lopas Ham mahiri hotak ni hamuliaon-Mu! Ingat Ham ma, ulang ubah Ham padan-Mu na bennami.
22 Mintor adong ma humbani naibata ni bangsa-bangsa na boi paroh udan? Atap mintor tarparoh langit ma udan? Ai lang Ham do hansa, ale Jahowa Naibata? Bamu do marhatengeran hanami, ai Ham do na manjadihon ai haganupan.ʼ”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA