Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu kantha reya ka sengko’ parkara mosem nemor se ce’ kerrengnga,
2 "Yehuda sossa atena, tha-kotthana para’ mateya. Reng-orengnga tedhung e tana sambi aserrowan. Yerusalim rat-tharadan menta bantowan.
3 Barengnga reng-oreng sogi padha esoro nyare aeng san-kassannagi; mor-somor kabbi eentare, tape aengnga kabbi padha kerreng. Gendhi se egiba abali padha kosong kabbi. Kalaban ate mangmang ban potos pangarep, reng-oreng jareya notobi mowana polana todhus.
4 Tadha’ ojan toron ban tana kerreng ka-maroka, reng-oreng tane notobi mowana polana astaba.
5 Rebba padha ta’ tombu, daddi korbina manjangan padha ondur. Budhu’na se gi’ buru lahir edina e ra-ara se tadha’ rebbana.
6 E konco’na gunong hemar alas jeng-manjeng malolo, matana orem polana nyare rebba ta’ nemmo; nyabana nga’-engnga’an akantha pate’ alas.
7 Tang ommat aserro, oca’na, ‘GUSTE, sanare abdidalem bannya’ dusa, kasokana Junandalem apareng partolongan menorot janji se edhabuwagi Junandalem. Abdidalem sadaja li-baliyan adinggallagi Junandalem; lerres, abdidalem padha dusa ka Junandalem.
8 Namong Junandalem settong pangarebbannepon Isra’il, se masalamet abdidalem sadaja dhari balai. Namong, aponapa Junandalem me’ akadi oreng manca e nagara paneka, akadi mosafir se nyepper namong samalem, saamponna laju meyos pole?
9 Aponapa Junandalem me’ akadi oreng se bingong, akadi pahlawan se ta’ sanggup atatolong? Namong, tantoepon Junandalem badha e nga’-tengnga’anna abdidalem sadaja, GUSTE! Abdidalem ommattepon Junandalem sadaja, ja’ dinggallagi, Guste!’"
10 Parkara bangsa jareya PANGERAN adhabu, "Sengko’ ta’ lebur ka reng-oreng jareya se seggut buru ondur dhari Sengko’ ban ta’ bisa ngobasae aba’na. Sengko’ ta’ loppa’a ka kasala’anna reng-oreng jareya, Sengko’ ngokoma reng-oreng jareya polana dusana."
11 PANGERAN adhabu ka sengko’, "Ba’na ja’ menta ka Sengko’ sopaja Sengko’ nolonga reng-oreng jareya.
12 Maske reng-oreng jareya apowasa, Sengko’ ta’ ngedhingngagiya serrona se menta tolong; ban maske reng-oreng jareya ngeba kurban obbaran ban kurban gandum ka Sengko’, Sengko’ ta’ kera lebur ka reng-oreng jareya. Sabaligga, reng-oreng jareya bi’ Sengko’ epatompessa bi’ perrang, kalaparan, ban wabah panyaket."
13 Sengko’ laju mator, "Adhu GUSTE Allah Se Mahatenggi, Junandalem ngagali bi-nabbi ampon abala ka ra’yat ja’ tadha’a paperrangan otaba kalaparan pole, sabab Junandalem ampon ajanji manabi e nagara ka’dhinto bakal taremtemma terros."
14 Tape PANGERAN adhabu, "Bi-nabbi jareya ngeba kabar lecek kalaban ngangguy Tang nyama; Sengko’ ta’ ngotos reng-oreng jareya, bariya keya Sengko’ ta’ aberri’ parenta otabana acaca ka reng-oreng jareya. Sakabbinna pangatonan se ecareta’agi banne dhari Sengko’ asalla; reng-oreng jareya ngoca’agi ramalan se tadha’ gunana, ramalan gabayanna dibi’.
15 Bi-nabbi jareya ngoca’ kalaban ngangguy Tang nyama ja’ e nagara reya bakal tadha’a perrang otabana kalaparan, mangkana Sengko’ ta’ nyoro reng-oreng jareya ngoca’ kantha jareya. Sengko’, PANGERAN, mala’ana ka ba’na, Yeremiya, epabaramma’a bi’ Sengko’ bi-nabbi se ta’ eotos Sengko’ jareya. Reng-oreng jareya bi’ Sengko’ epamateya ban perrang sarta kalaparan.
16 Reng-oreng se narema ramalanna bi-nabbi jareya bi’ Sengko’ epateyana keya kalaban cara se kantha jareya keya. Mayyidda reng-oreng jareya bakal epelpallagiya ka rong-lorong e Yerusalim ta’ kalaban badha oreng se ngoburragiya. Daddi reng-oreng jareya ban ana’ binena bakal kantha’a jareya. Dina reng-oreng jareya me’ apangrasa apa ollena kajahadanna."
17 PANGERAN ngotos sengko’ notorragi kasossa’anna sengko’ ka ommadda. Sengko’ kodu ngoca’ kantha reya, "Dina sengko’ nanges tadha’ ambuna, seyang malem ngalocor aeng mata. Sabab tang bangsa loka ce’ rajana, ban ce’ nyangsarana.
18 Mon sengko’ entar ka teggal, sengko’ nangale yit-mayyit kurbanna perrang. E dhalem kottha sengko’ nangale’e kasangsara’an, reng-oreng para’ mateya kalaparan. Nabbi ban imam ajalannagi kawajibanna, tape ta’ ngarte apa se elakone jareya."
19 Guste PANGERAN, ponapa Junandalem ta’ kasokan ongguwan ka Yehuda? Ponapa Junandalem baji’ onggu ka Siyon paneka? Aponapa Junandalem me’ mokol abdidalem sadaja me’ ce’ kajana kantos abdidalem ta’ bisa baras pole saterrossa? Parcoma saos abdidalem sadaja nyare kataremtemman, tadha’ gunana aehteyar terro barasa, sabab se badha namong kakerrasan.
20 GUSTE, abdidalem sadaja dusa ka Junandalem. Abdidalem sadaja ngakone dusa abdidalem dibi’ sareng dusaepon para bangatowa sadajana.
21 Kaemodi janji se edhabuwagi Junandalem, abdidalem sadaja ja’ ya-seya; parjanjiyannepon Junandalem sareng abdidalem sadaja ja’ paburung. Yerusalim kennengnganna tahtaepon Junandalem se molja, ja’ ya-seya, GUSTE.
22 Ba-dibana sa-bangsa ta’ oneng matoron ojan ka bume. Langnge’ jugan ta’ oneng matoron ojan kalaban kobasana dibi’. Namong Junandalem pangarebban abdidalem sadajana. Junandalem se madaddi sadajaepon gapaneka.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA