Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nampa kulangngere’ Allata’ala akkio’ angkana, "Battuko mae he sikamma tau ampajappayai hukkunganga mae ri anne kotaya. Erangi sanjata-sanjatanu."
2 Appada-padami ammumba annang tau battu ri pantaranganna pakke’bu’ lompo bageang wara’na Balla’Na Batara, massing angngerang sanjata. Nia’ naagang ke’nanga tau ammakeang lenang angngerang pakkakasa’ untu’ annulisi’. Antamai ke’nanga siagang ammentengi ri ampi’na tampa’ pakkoro’bangngang tambagaya.
3 Nampa caya accilla’ pammatei kahaderanNa Allata’alana Israel tassioroki battu ri patunna malaeka’-malaeka’ akka’nyika, nampa a’lette’ battu ri tampa’na rioloa mange ri pakke’bu’ antamaya ri Balla’Na Batara. Na Nakio’mo Batara anjo tau ammakeang lenanga, Nakana,
4 "A’lampako mange ri sikontu kotaya siagang sarei pammatei abanna sikamma tau si’naya siagang susaya pa’mai’na lanri anjo panggaukang appakaringika ri anjo kotaya."
5 Kulangngereki Allata’ala angkana mae ri tau maraengannaya, "Amminawangko ri ia mange ri sikontu kotaya siagang bunoi tunggala’ taua, teako pammopporangngi.
6 Bunoi sikontu tu bura’nea siagang tubainea, tau toa tau rungka, tau toa siagang ana’-ana’. Mingka tea sikaliko apa-apai sikamma tau niaka pammateinna ri abanna. Appakkaramula mako anrinni, ri anne BallakKu." Jari napakaramulaimi tugasa’na ke’nanga na nabuno sikamma pamimpinna Israel niaka sitabang ammenteng ri Balla’Na Batara.
7 Nakana Allata’ala ri ke’nanga, "Ra’massi anne BallakKu! Pirassi sikamma paranglakkenna siagang maya’. Appakkaramula mako!" Jari appakaramulami ke’nanga ambunoi sikamma tau niaka lalang ri kotaya.
8 Lalang nigaukanna anjo pammunoanga, kale-kalengku nia’ anjoreng. Su’juka’ siagang akkio’ma’ angkana, "O Batara Kaminang Tinggia, maka sanna’ dudu kammami anjo larroTa mae ri Yerusalem, sa’genna ero’ Kibuno kabusu’ tau niaka ija ri anne Israel?"
9 Appiali Allata’ala angkana, "Tu Israel siagang tu Yehuda le’baki nagaukang dosa lompo dudua. Nagaukangi ke’nanga pammunoanga ri sikontu tampaka, siagang nara’massi Yerusalem lanri kaja’dallanna ke’nanga. Nakana ke’nanga angkana iNakke, Batara, Kubokoimi anne pa’rasanganga, sa’genna takkulleami Kucini’ panggaukanna ke’nanga.
10 Tena nalaKukamaseang ke’nanga. LaKugaukangi mae ri ke’nanga apa le’baka nagaukang ke’nanga mae ri tau maraenga."
11 Nampa ammotere’ anjo tau ammakeang lenanga a’laporo’ mae ri Batara angkana, "Le’ba’ ngasemmi nigaukang sikontu Kiparentanga Batara."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA