Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Paduapuluhlima-tahunkon dob tarbuang hanami, bani bona ni tahun ai, bani ari sapuluh, ai ma pasapuluhompat-tahunkon dob tartaban huta ai, bani ari ai ma sogop bangku tangan ni Jahowa,
2 anjaha iboan ma ahu ibagas pangungkabon na humbani Naibata hu tanoh Israel, lanjar ipatuad ma ahu i atas sada dolog na gijang tumang; adong do ijai na songon rumang ni huta patontang pakon ahu.
3 Sanggah na iboan ahu hujai, tonggor ma, adong ma sada dalahi na marrupa songon tombaga; adong do tali ampa tungkot sibar-sibar ibagas tanganni, bani horbangan ai do ia ipajongjong.
4 Anjaha nini dalahi ai ma hu bangku, “Ale anak ni jolma, tonggor ma marhitei matamu, anjaha bogei marhitei pinggolmu, anjaha paruhurhon ma haganup sipatidakonku on bam, ai tarboan pe ho hujon laho patuduhkon on do bam, baritahon ma na nididahmu haganup bani ginompar ni Israel.”
5 Tonggor ma, adong do sada tembok i darat ni rumah panumbahan ai inggot; ia tungkot sibar-sibar na ibagas tangan ni dalahi ai, onom asta do ganjangni, ganup asta ai saparapan do ganjangan humbani asta na somal, jadi isibar ma hapal ni tembok ai; ansa tungkot sibar-sibar ai hapalni ampa gijangni.
6 Dob ai laho ma ia hu horbangan na hampit hapoltakan, itangkogi ma tangga-tanggani ai, anjaha isibar ma molmolan ni horbangan ai, ai ma sada tungkot sibar-sibar bolagni.
7 Anjaha ganup kamar sada tungkot sibar-sibar do bolagni pakon ganjangni, anjaha tiangni ai lima asta do; ia molmolan ni horbangan ai bani surambih ni horbangan ai hampit bagas, sada tungkot sibar-sibar do.
8 Dob ai isibar ma surambih ni horbangan ai, ualuh asta,
9 anjaha tiangni ai, dua asta; hampit bagas do surambih ni horbangan ai.
10 Ia kamar ni horbangan na hampit hapoltakan ai tolu bei do palopah-lopah; haganup ai dos do sibaranni, anjaha tiangni na palopah-lopah ai dos do homa sibaranni.
11 Dob ai isibar ma bolag ni horbangan ai, sapuluh asta, anjaha ganjangni sapuluh tolu asta.
12 Adong do hondor-hondor i lobei ni kamar-kamar ai, ganup sada asta, na dua lopah ai; kamar-kamar ai onom asta bei do, na dua lopah ai.
13 Dob ai isibar ma use horbangan ai humbani pudi ni kamar na sada das hupudi ni kamar na sada nari, dua puluh lima asta do bolagni, patontang do labahni.
14 Isibar ma homa surambih ai, dua puluh asta; das bani tiang-tiang ni horbangan ai do alaman na inggot ai.
15 Anjaha humbani dalan masuk hu horbangan ai das hu ujung ni surambih parbagas ai, lima puluh asta do.
16 Adong do jandela na marjaring-jaring bani kamar-kamar ai dompak bagas, bani dalan na i horbangan ai, hadua lopahsi; sonai homa adong do jandela bani surambih ai dompak bagas hadua lopahsi, anjaha bani tiangni ai iuhirhon do dangkah ni palem.
17 Dob ai ibobai ma ahu hu alaman pardarat, tonggor ma, adong do ijai kamar-kamar ampa dalan na ibatui inggot; tolu puluh kamar mandompakkon dalan na ibatui ai.
18 Dalan na ibatui ai adong do homa i lambung ni horbangan ai, mangihutkon ganjang ni horbangan ai, ai ma dalan batu partoruh.
19 Dob ai isibar ma bolag ni alaman ai hun lobei-lobei parbagas ni horbangan partoruh ai das hu lobei-lobei pardarat ni horbangan parbagas ai, ai ma saratus asta.
20 Dob ai mardalan ma ia i lobeihu dompak utara, anjaha tonggor ma, adong do ijai sada horbangan bani alaman pardarat ai, mandompakkon utara. Isibar ma ganjangni ampa bolagni.
21 Kamar-kamarni ai pe, tolu palopah-lopah, tiangni ampa surambihni dos do sibaranni songon horbangan na parlobei ai, lima puluh asta ganjangni ampa dua puluh lima asta bolagni.
22 Jandelani, surambihni ampa dangkah ni palemni dos do sibaranni songon na bani horbangan hapoltakan ai; pitu do tangga-tanggani laho tangkog hujai; anjaha hampit bagas do surambihni.
23 Anjaha tontang ni horbangan parutara ai adong do horbangan laho hu alaman parbagas ai, songon na bani horbangan parhapoltakan; jadi isibar ma horbangan hu horbangan, saratus asta do ai.
24 Dob ai ibobai ma ahu dompak dangsina, anjaha tonggor ma, adong do ijai horbangan dompak dangsina; jadi isibar ma kamar-kamarni, tiangni ampa surambihni; anjaha dos do sibaranni songon na parlobei ai.
25 Adong do jandela bani horbangan ai ampa bani surambih ai inggot, sarupa bani jandela na legan-legan ai; ganjangni ai lima puluh asta do anjaha bolagni dua puluh lima asta.
26 Pitu do tangga-tanggani laho tangkog hujai, anjaha hampit bagas do surambihni; iuhirhon do hayu palem bani tiangni, sada bani ganup lopah.
27 Adong do horbangan dompak dangsina bani alaman parbagas ai, anjaha isibar ma horbangan hu horbangan, saratus asta do ai.
28 Dob ai ibobai ma ahu hu alaman parbagas ai, masuk hun horbangan pardangsina ai, anjaha isibar ma horbangan pardangsina ai, dos do sibaranni songon na legan-legan ai.
29 Kamar-kamarni pe, tiangni ampa surambihni dos do sibaranni ampa na legan ai; adong do jandela bani horbangan ampa bani surambihni ai inggot. Ia ganjangni ai lima puluh asta do, anjaha bolagni dua puluh lima asta.
30 Anjaha adong do surambih-surambih inggot, dua puluh lima asta ganjangni anjaha lima asta bolagni.
31 Dompak alaman pardarat ai do surambihni, anjaha tiangni margorga hayu palem do; anjaha ualuh do tangga-tanggani laho hu atas.
32 Dob ai ibobai ma ahu hu alaman parbagas ai hampit hapoltakan, anjaha isibar ma horbangan ai; dos do sibaranni ai songon na legan ai.
33 Kamar-kamarni pe, tiangni ampa surambihni dos do sibaranni songon na legan ai, anjaha adong do jandela bani horbangan ai ampa bani surambihni inggot, ia ganjangni lima puluh asta do, anjaha bolagni dua puluh lima asta.
34 Dompak alaman pardarat ai do surambihni, anjaha tiangni margorga hayu palem do, hadua lopahsi; ualuh do tangga-tangga laho hu atas.
35 Dob ai ibobai ma ahu hu horbangan parutara, anjaha isibar ma ai; dos do sibaranni songon na legan ai.
36 Kamar-kamarni pe, tiangni ampa surambihni dos do sibaranni songon na legan ai; anjaha adong do jandela bani horbangan ai ampa bani surambihni inggot; ia ganjang ni ai lima puluh asta do anjaha bolagni dua puluh lima asta.
37 Dompak alaman pardarat ai do surambihni, anjaha margorga hayu palem do tiang ni ai hadua lopahsi, ualuh do tangga-tanggani laho hu atas.
38 Anjaha adong do sada kamar bani horbangan parhapoltakan ai, anjaha labah ni kamar ai bani surambih ai do; ijai do pamurihan ni galangan situtungon.
39 Bani surambih ni horbangan ai adong do dua meja bani hadua lopahsi; ijai do isayat galangan situtungon, galangan pardousaon ampa galangan parsalahan.
40 Anjaha i darat, i lambung ni tembok ai, hampit utara ni halak na tangkog hu horbangan ai, adong do dua meja; anjaha bani lopah na sada nari ni tembok ai adong do homa dua meja.
41 Ase ompat meja hampit bagas anjaha ompat meja hampit darat i lambung ni tembok ai; haganup ualuh meja, panayatan ni galangan.
42 Anjaha adong do ijai homa ompat meja humbani batu na ibarbar, ganjangni sada satongah asta, bolagni sada satongah asta anjaha gijangni sada asta, ai ma hatibalan ni parugas manayat galangan situtungon ampa galangan sisayaton.
43 Adong do topini inggot, saparapan bolagni, tar seder dompak bagas; martayub do meja ai laho manlinggomi gulei galangan humbani udan ampa milas ni ari.
44 Jadi ibobai ma ahu hu alaman parbagas ai, anjaha tonggor ma, adong do dua kamar i alaman parbagas ai, sada i lambung ni horbangan parutara mandompakkon dangsina, na sada nari i lambung ni horbangan pardangsina mandompakkon utara.
45 Jadi nini ma hu bangku, “Ia kamar on, na dompak dangsina on, bani malim siparugas i Rumah Panumbahan do ai;
46 anjaha kamar on, na dompak utara, bani malim siparugas bani anjapanjap do in, ai ma anak ni si Sadok; sidea tumang do humbani ginompar ni si Lepi, na boi roh marugas i lobei ni Jahowa.”
47 Jadi isibar ma alaman ai, saratus asta ganjangni anjaha saratus asta bolagni, marompat suhi; i lobei ni Rumah Panumbahan ai do anjapanjap ai.
48 Jadi ibobai ma ahu hu surambih ni Rumah Panumbahan ai, anjaha isibar ma tiang ni surambih ai, lima asta ganup lopah; bolag ni horbangan ai sapuluh ompat asta, anjaha tembok parlambung ni horbangan ai tolu asta ganup lopah.
49 Ganjang ni surambih ai dua puluh asta do, anjaha bolagni sapuluh sada asta; sapuluh do tangga-tanggani laho hu atas; adong do tiang banggal manrombani tiang-tiang ai, hadua lopahsi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA