Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Anjo wattua tanggala’ sampulo bulang se’re, lalang taung makaruampulo allima ri wattu nipela’na ikambe, iamintu sampulo angngappa’ taung ri le’ba’na nibeta Yerusalem, kupisa’ringimi kakoasanNa Batara, nampa Naeranga’ a’lampa.

² Lalang se’re paccini’, Naeranga’ kucini’ Allata’ala mange ri butta Israel nampa nabolikka’ ri moncong tinggia. Ri dallekangku nia’ kucini’ sipa’gompoang bangunang santanjaka se’re kota.

³ Naeranga’ mange anjoreng, nampa nia’ kucini’ sitau bura’ne accilla’ kamma tambaga ammenteng ri ampi’na pakke’bu’ lompoa. Anna’galaki kucini’ otere’ pa’baku’ battu ri kaeng lenang, siagang se’re kayu pa’baku’.

⁴ Nakana anjo tau bura’nea ri nakke, "He tau, pilangngeri baji’-baji’ siagang parhatikangi sikontu apa kupappicinikanga mae ri kau, nasaba’ lanri kammanami anjo nanierangko mae anrinni. Pauangi bansa Israel sikontu anjo apa nucinika."

⁵ Nampa kucini’ Balla’Na Batara nikulilingi ri tembo’. Appakkaramulami anjo tu bura’nea angngukkuruki anjo temboka siagang kayu pa’baku’ tallua metere’ la’buna. A’nassami angkanaya anjo temboka tinggina tallu metere’ siagang kapala’na tallu todong metere’.

⁶ Nampa a’lampa mange ri pakke’bu’ lompo a’dalle’ anraika. Angngambiki nai’ ri tukaka, nampa ri wattunna battu nai’, naukkuru’mi sangkara’ bageang ratena anjo pakke’buka, nania’ tallu metere’ sangkara’na.

⁷ Ri bokona anjo pakke’bu’ lompoa nia’ se’re lorong, na ri massing-massing sa’rinna para nia’ tallu kamara’ jaga. Sangkamma kabusuki lompona anjo kamaraka; tanja’na appaki pasagi, na la’buna massing sa’rinna iamintu tallu metere’. Sikamma tembo’ passimbanna kamaraka sangkammai kapala’na, iamintu rua sitangnga metere’. Anjo loronga a’la’buiji tallu metere’, angngolo mange ri kamara’ lompo a’dalle’ mangea ri Balla’Na Batara. Naukkuru’mi anjo tu bura’nea anjo kamara’ lompoa, nampa a’nassamo angkanaya appa’ metere’ sangkara’na; tampa’na anjo kamaraka iamintu ri cappa’na pakke’bu’ lompoa, bageang lalang, iamintu kaminang a’reppeseka ri Balla’Na Batara. Tembo’-tembo’na a’dalle’ mangea ri Balla’Na Batara, kapala’na se’re metere’.

⁸ (40:7)

⁹ (40:7)

¹⁰ (40:7)

¹¹ Nampa naukkuru’ anjo tu bura’nea sangkara’na anjo loronga ri pakke’bu’ lompoa; sangkara’na iamintu annang sitangnga metere’, nampa sangkara’na pakke’bu’ lompoa lima metere’.

¹² Ri dallekanna kamara’-kamara’ jaga anjo ukkurang tallua metere’ pasagi, nia’ tembo’ bodo tinggina sitangnga metere’, siagang kapala’na sitangnga metere’ todong.

¹³ Nampa naukkuru’ anjo tu bura’nea bellana temboka battu ri tembo’ bageang bokoang se’rea mae ri bageang boko maraenga ri anjo kamara’ jagaya, nania’ 12.5 metere’ la’buna.

¹⁴ Naukkuru’ tongi anjo kamara’ lompoa: la’buna sampulo metere’. Pakke’bu’na anjo kamaraka a’la’bu mangei ri paranglakkeng bageang pantaranganna Balla’Na Batara.

¹⁵ Bellana battu ri pakke’bu’ lompo bageang pantaraka sa’genna mange ri tembo’ kamara’ lompo ri bageang andallekanga mange ri Balla’Na Batara iamintu 25 metere’.

¹⁶ Ri tembo’ ri bokoanga siagang tembo’-tembo’ passimbang anjo kamara’-kamaraka nia’ jandela-jandela ca’di. Tembo’-tembo’ bageang lalang andallekanga mange ri loronga, nibelo-beloi siagang ukirang-ukirang poko’ palem.

¹⁷ Nampa naeranga’ anjo tu bura’nea allalo ri pakke’bu’ lompoa mange ri paranglakkeng bageang pantaranna Balla’Na Batara. Ri sa’ri tembo’ bageang pantaranna ri tammulilina anjo Balla’Na Batara nia’ nibangung kamara’ 30 jaina. Ri dallekanna anjo sikamma kamaraka nia’ dapara’ batu,

¹⁸ angkulilingi sikontu anjo paranglakkenga. Paranglakkeng bageang pantaranga la’bi rawangangngangi na paranglakkeng bageang lalanga.

¹⁹ Anjoreng nia’ pakke’bu’ lompo maraeng, tinggiangnganga pammantanganna siagang a’lampa mangea ri paranglakkeng bageang lalanga. Naukkuru’ tongi anjo tu bura’nea bellana battu ri anjo ruaya pakke’bu’ lompo, iamintu 50 metere’.

²⁰ Nampa anjo tu bura’nea naukkuruki pakke’bu’ lompo bageang waraka, a’lampa mangea ri paranglakkeng bageang lalanga.

²¹ Ri anjo pakke’bu’ lompoa, niaka tallu kamara’ jaga ri massing sa’ri loronna, tembo’-tembo’ passimbanna, kammayatompa kamara’ lompona, sangkamma kabusuki ukkuranna siagang niaka ri pakke’bu’ lompo niaka bageang iraya. Sikontu lorong-loronna anjo pakke’bu’ lompoa la’buna 25 metere’ siagang sangkara’na’ 12.5 metere’.

²² Kammayatompa kamara’ lompona, jandela-jandelana, siagang ukirang-ukirang poko’ kayu palemna sangkamma kabusuki siagang niaka ri pakke’bu’ lompo bageang irayaya. Nia’ tuju lonjo’na tuka’ mangea ri anjo pakke’bu’ lompoa, siagang ri cappa’na nia’ kamara’ lompo a’dalle’ mangea ri paranglakkeng bageang pantaranna Balla’Na Batara.

²³ Assidallekanga siagang pakke’bu’ lompo bageang waraka, nia’ pakke’bu’ lompo maraeng, iamintu a’lampa mangea ri paranglakkeng bageang lalang, sangkamma niaka ri pakke’bu’ lompo bageang iraya. Anjo taua naukkuruki bellana anjo ruaya pakke’bu’ lompo, iamintu: 50 metere’ bellana.

²⁴ Nampa, anjo tu bura’nea naeranga’ mange ri pakke’bu’ lompo bageang timboro’ nampa naukkuru’. A’nassami angkanaya anjo pakke’bu’ lompoa sangkammai ukkuranna siagang pakke’bu’ lompo maraenga.

²⁵ Sikamma jandelaya ri kamara’-kamaraka sangkammai siagang niaka ri pakke’bu’ lompo maraenga. La’buna anjo loronga lompoa 25 metere’ siagang sangkara’na 12,5 metere’.

²⁶ Tuju lonjo’na tuka’ mangea ri anjo pakke’bu’ lompoa, siagang kamara’ lompona nia’ todong cappa’na, a’dalle’ mange ri paranglakkeng bageang pantaranna Balla’Na Batara. Tembo’-tembo’ bageang lalang a’dalle’ mangea ri loronga, nibelo-beloi siagang ukirang-ukirang poko’ palem.

²⁷ Anjoreng nia’ todong pakke’bu’ lompo a’lampa mange ri paranglakkeng bageang lalang. Anjo tu bura’nea naukkuruki siapa sikabellaina anjo ruaya pakke’bu’ lompo, iamintu: 50 metere’.

²⁸ Nampa anjo tu bura’nea naeranga’ allalo ri pakke’bu’ lompo bageang timboro’ antama’ ri paranglakkeng bageang lalang. Naukkuruki anjo pakke’bu’ lompo bageang timboroka, nampa ukkuranna sangkammai siagang sikamma pakke’bu’ lompo bageang pantaraka.

²⁹ Sikamma kamara’ jagana, kamara’ lompona, siagang tembo’-tembo’ bageang lalanna sangkammai siagang niaka ri sikamma pakke’bu’ lompo maraenga. Sikamma kamaraka anrinni nia’ todong jandela-jandelana. Lorong-lorong lompona 25 metere’ la’buna siagang sangkara’na 12,5 metere’.

³⁰ (40:29)

³¹ Mingka kamara’ lompona a’dalle’ mangei ri paranglakkeng bageang pantaraka. Tembo’-tembo’ bageang lalang a’dalle’ mangea ri loronga, nibelo-belo tongi siagang ukirang-ukirang poko’ palem. Sagantuju baringang tuka’na a’lampa mangei ri anjo pakke’bu’ lompoa.

³² Le’baki anjo naeramma’ anjo tu bura’nea allalo ri pakke’bu’ lompo bageang rayaya antama’ ri paranglakkeng bageang lalang. Naukkuruki anjo pakke’bu’ lompoa, nampa ukkuranna sangkammai siagang sikamma pakke’bu’ lompo maraenga.

³³ Sikamma kamara’ jagana, tembo’-tembo’ bageang lalanna, siagang kamara’ lompona, sangkammai ukkuranna siagang sikamma pakke’bu’ lompo maraenganga. Ri sikamma anjo kamaraka siagang ri kamara’ lompona nia’ jandela-jandela. La’buna anjo lorong lompoa 25 metere’ siagang sangkara’na 12,5 metere’.

³⁴ Kamara’ lompona a’dalle’ mangei ri paranglakkeng bageang pantaranga. Tembo’-tembo’ bageang lalang a’dalle’ mangea ri loronga, nibelo-beloi tongi siagang ukirang-ukirang poko’ palem. Sagantuju baringang tuka’na a’lampa mangei ri anjo pakke’bu’ lompoa.

³⁵ Kala’busanna anjo tu bura’nea naeranga’ mange ri pakke’bu’ lompo bageang wara’. Naukkuruki anjo pakke’bu’ lompoa, na ukkuranna sangkammai siagang sikamma pakke’bu’ lompo maraenga.

³⁶ Kammayatompa sikamma kamara’ jagana, tembo’-tembo’ bageang lalanna siagang kamara’ lompona, sangkammai siagang niaka ri sikamma pakke’bu’ lompo maraenga. Ri sikamma kamara’na siagang ri kamara’ lompona nia’ jandela-jandela. La’buna loronna anjo pakke’bu’ lompoa iamintu 25 metere’ siagang sangkara’na 12,5 metere’.

³⁷ Kamara’ ri dallekanna a’dalle’ mange tongi ri paranglakkeng bageang pantaranga. Tembo’-tembo’ bageang lalang a’dalle’ mangea ri loronga, nibelo-beloi siagang ukirang-ukirang poko’ palem. Sagantuju baringang tuka’na a’lampa mangei ri anjo pakke’bu’ lompoa.

³⁸ Ri paranglakkeng bageang pantarang nia’ se’re kamara’ pannambai ri pakke’bu’ lompo bageang lalang ri bageang wara’. Battu ri anjo kamara’ pannambaia nia’ se’re pakke’bu’ a’lampa mange ri kamara’ lompoa. Anjoremmi nibissai sikamma olo’-olo’ eroka nipassareang a’jari koro’bang nitunu.

³⁹ Ri anjo kamara’ lompoa, nia’ appa’ mejang, ta’ruai ri sa’rinna. Irate ri anjo mejanga nipolong olo’-olo’ koro’bang nitunua, yareka koro’bang pannangkasi dosaya yareka koro’bang untu’ sambe karugiang.

⁴⁰ Ri pantaranganna anjo kamara’ lompoa nia’ pole appa’ mejang, ta’ruai ri massing sa’rinna anjo pakke’bu’ lompo bageang waraka.

⁴¹ Jari, kabusu’na nia’ sagantuju mejang untu’ tampa’ ammolong koro’bang: appa’ ilalang, siagang appa’ ri pantaranganna paranglakkenga.

⁴² Appaka mejang ri kamara’ pannambaia, iamintu nipakea untu’ appasadia koro’bang nitunu, batu nipa’ nipare’. Anjo mejanga sitangnga metere’ tinggina, nampa bageang ratena appasagi appaki; la’buna siagang sangkara’na massing tallumparapa’ metere’. Irate ri anjo mejang-mejanga niboli’ pakkakasa’ untu’ nipake ammolong olo’-olo’ koro’bang.

⁴³ Birinna anjo sikamma mejanga nisarei biring iamintu 75 milimetere’ la’ba’na. Sikontu dageng lanikoro’bangkanga nipadongkoki irate ri sikamma anjo mejanga.

⁴⁴ Nampa anjo tu bura’nea naeranga’ mange ri paranglakkeng bageang lalanga. Anjoreng nia’ rua sangkamma los; ia se’rea ri sa’rinnai pakke’bu’ lompo bageang waraka, siagang a’dalle’ timboroki, nampa se’reanga pole ri sa’rinnai pakke’bu’ bageang timboroka siagang a’dalle’ waraki.

⁴⁵ Nakana anjo tu bura’nea ri nakke angkanaya anjo los a’dalle’ timboroka nipasadiakangi sikamma imang tugasaka ri Balla’Na Batara,

⁴⁶ nampa los a’dalle’ waraka nipasadiakangi sikamma imang tugasaka ri tampa’ pakkoro’bangnganga. Sikontu anjo imanga musti tau battu ri jari-jarina Zadok. Nasaba’ battu ri suku Lewi poro jari-jarinaji bawang Zadok akkulle andallekang ri Batara untu’ allayani ri Ia lalang ri wattu ibadana taua.

⁴⁷ Anjo tu bura’nea naukkuruki paranglakkeng bageang lalanga. Tanja’na iamintu appa’ pasagi: la’buna siagang sangkara’na massing 50 metere’. Anjo Balla’Na Batara niaki ri bageang ilau’, na ri dallekanna nia’ tampa’ pakkoro’bangngang.

⁴⁸ Nampa naeranga’ mange ri kamara’ bageang dallekanna Balla’Na Batara, angngambikki’ pirang baringang are tuka’. Naukkuruki kamara’ antamaya; luara’na iamintu tuju kali rua sitangnga metere’, nampa rinring-rinrinna ruaya birinna tasse’re sitangnga metere’ kapala’na. Ri kairinna siagang ri kananna nia’ tasse’rei pilara’. Anjo kamara’ dallekanga kalenna la’buna 10 metere’ nampa sangkara’na 6 metere’.

⁴⁹ (40:48)

Yehezkiel

Video Yehezkiel 40

Ikuti Kami:

KONTAK | PARTISIPASI | DONASI