Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pasapuluhsada-tahunkon, bani ari sada bulan sapuluh dua, roh ma hata ni Jahowa hu bangku, mangkatahon,
2 “Ale anak ni jolma, bahen ma sada doding tangis-tangis pasal Parao, raja ni Masir, hatahon ma hu bani: Ale singa ajar-ajar i tongah-tongah ni bangsa-bangsa, ho na dob pinarseda! Songon naga do ho ibagas laut, unsong-unsong ibagas bah banggalmu; gombur do ibahen ho bahmu marhitei naheimu, anjaha iluntaki ho do bah banggalmu.
3 Sonon do hata ni Tuhan Jahowa: Rungkubkonon-Ku do jalang-Ku hubam, ai ma hulanan ni buei bangsa; dokdokon-Ku do hu atas ibagas jalang-Ku.
4 Sampakkonon-Ku do ho hu darat, anjaha hu ladang-ladang in do ho gijigkonon-Ku; parohon-Ku do manuk-manuk na i awang-awang in sogop bam, anjaha bosuran binatang-binatang na i tanoh in halani ho.
5 Gijigkonon-Ku do dagingmu i atas ni dolog-dolog, anjaha gokan-Ku habungan-habungan marhitei bangkeimu.
6 Pabosuron-Ku do tanoh age dolog-dolog marhitei darohmu na mabaor in, gok do binanga-binanga bahenonni ai.
7 Sanggah parboismai, rungkubon-Ku do langit in, anjaha manggolapi hubahen bintang-bintang; rungkubon-Ku do mata ni ari bani hombun, anjaha bulan pe seng marsinalsal.
8 Haganup panondang na i langit manggolapi do bahenon-Ku i baboumu, anjaha parohon-Ku do hagolapan hu tanohmu, nini Tuhan Jahowa.
9 Gobir do bahenon-Ku uhur ni buei bangsa, anggo Huboan ho tarbuang hu tongah-tongah ni bangsa-bangsa, hu nagori-nagori na so tinandamu.
10 Songgotan do buei bangsa halani ho, anjaha gobir raja-raja ni sidea pasal ho, anggo Huawas-awaskon ma podang-Ku i lobei ni sidea; rusak do sidea torus, pasal hosahni bei, bani panorang pardabuhmu.
11 Ai sonon do hata ni Tuhan Jahowa: Podang ni raja Babel do na roh mandorab ho!
12 Rasei do bahenon-Ku balamu marhitei podang ni puanglima, haganup sidea, ai ma sibisangan humbani bangsa-bangsa. Parsedaon ni sidea do hatimbulon ni Masir, anjaha magou do bahenonni rayatni.
13 Ripaskonon-Ku do ganup pinahanni na i topi ni bah banggal; seng be gomburon ni nahei ni jolma ai, anjaha tambirik ni pinahan pe seng be luntakonni ai.
14 Lihou do bahenon-Ku binanga ni sidea, anjaha manjulur songon minak bah banggal ni sidea, nini Tuhan Jahowa,
15 sanggah na Hubahen Masir gabe halimisan, Huparseda haganup isini, anjaha Huraseihon sagala na marianan ijai, ase itanda sidea, Ahu do Jahowa.
16 Doding tangis-tangis do in, sidodingkononkon; tongon, dodingkonon ni boru ni bangsa-bangsa do in, dodingkononni do ai bani Masir ampa bani rayatni haganup.
17 Dob ai pasapuluhdua-tahunkon, ari sapuluh lima bulan sapuluh dua, roh ma hata ni Jahowa hu bangku, mangkatahon,
18 Ale anak ni jolma, tangisi ma Parao ampa rayatni, anjaha suruh ma sidea tuad, ia pakon boru ni bangsa-bangsa na sangap-sangap in, laho hu nagori toruh, marayak na dob tuad hu lubang ai.
19 Ise do na niatasanmu ibagas hajengeson? Tuad ma ho, ase ipatibal ho rap pakon halak na so marsunat.
20 I tongah-tongah ni halak binunuh ni podang do ia tompas, anjaha i lambungni radag sagala rayatni.
21 Jadi hatahonon ni puanglima na gogoh-gogoh ai ma hun tongah ni nagori toruh ai pasalsi ampa na mangurupisi: Tuad do sidea, radag ijai, halak na so marsunat ai, hona bunuh ibahen podang.
22 Ijai do Assur, ampa ganup rayatni inggot tanomanni; haganup sidea tarbunuh, tompas halani podang;
23 bani tang parbagas ni lubang ai do tanomanni, anjaha rayatni inggot bani tanomanni; haganup sidea tarbunuh, tompas halani podang, ai ma sibahen songgot-songgot hinan i tanoh ni halak na manggoluh.
24 Ijai do Elam ampa haganup rayatni inggot tanomanni; haganup sidea tarbunuh, tompas binahen ni podang; tuad do sidea, seng marsunat hu nagori toruh; ipausung-usung sidea do habadoronni rap pakon halak na tuad hu lubang ai.
25 Ibahen sidea do podomanni i tongah-tongah ni halak na tarbunuh rap pakon rayatni, inggot tanomanni; haganup sidea seng marsunat, tompas halani podang; sidea do sipasar songgot-songgot i tanoh ni halak na manggoluh, ipausung-usung sidea do habadoron ni sidea rap pakon halak, na tuad hu lubang ai, i tongah-tongah ni halak na tarbunuh ai do sidea radag.
26 Ijai do Mesek ampa Tubal ampa haganup rayatni inggot tanoman ni sidea, haganup do sidea seng marsunat, tompas halani podang, ai ma sibahen songgot-songgot hinan i tanoh ni halak na manggoluh.
27 Seng tibal sidea rap pakon puanglima na dob tarbunuh sapari, na dob tuad hu nagori toruh marpakeian porang, podang ni sidea inahkon i toruh ni uluni, anjaha gantarni irungkubkon bani holi-holini; ai songgot-songgot mangidah puanglima ai do na masa i tanoh ni halak na manggoluh.
28 Tapi anggo ho i tongah-tongah ni na marsunat ai do, marosak anjaha tibal, rap pakon halak na tarbunuh halani podang.
29 Ijai do Edom, raja-rajani ampa na sangap-sangapni, itibalhon ijai, age pe gogoh hinan, rap pakon halak na tarbunuh halani podang; radag do sidea ijai rap pakon halak na so marsunat, rap pakon halak na tuad hu lubang ai.
30 Ijai do raja-raja na hun utara haganup ampa haganup halak Sidon, na tuad rap pakon halak na tarbunuh, na gabe bador ibagas kuasani; tibal do sidea seng marsunat rap pakon halak na tarbunuh halani podang, anjaha ipausung-usung sidea do habadoron rap pakon halak na tuad hu lubang ai.
31 Idahon ni Parao ma sidea, gabe tarapoh ma uhurni pasal rayatni; tarbunuh ibahen podang do Parao ampa haganup balani, nini Tuhan Jahowa.
32 Ai ipasar do songgot-songgot i tanoh ni halak na manggoluh; halani ai patibalon do Parao ampa haganup rayatni i tongah-tongah ni halak na so marsunat, rap pakon halak na tarbunuh binahen ni podang, nini Tuhan Jahowa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA