Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri tanggala’ se’re bulang sampulo anrua, lalang taung makasampulo anrua ri wattu nipela’na ikambe, Nakana Batara ri nakke,
2 "He tau, terassi pakainga’ karaeng Mesir. Pabattui anne pasangKu ri ia angkana, ‘Ikau appanggaukang kammako singa rungka ri alla’na bansa-bansaya, mingka la’bi sangkammako buaya a’langea lalang ri je’neka. Bangkennu napakapuccaki siagang nara’massi sikontu binangaya.
3 Ri wattunna a’rappung bansa-bansaya, laKujakkalakko siagang jalaKu, siagang laKulappassangi anjo bansa-bansaya anre’resangko mae ri bontoa.
4 LaKupatappasakko naung ri buttaya nampa sikontu jangang-janganga siagang olo’-olo’ battua ri sikontu linoa laKusuroi angkanreko.
5 Nampa sikamma buluka siagang ka’bunga laKupirassi siagang maya’-maya’nu bottoka.
6 Cera’nu laKutumpai sa’genna nabasai sikamma buluka siagang narassi sikamma binangaya.
7 Ri wattunnu Kupanraki, langika laKubomboki, siagang sikamma bintoenga laKupa’jari matei rinrana. LaKucokkoi mataalloa ribokona rammanga siagang bulanga tenamo naccaya.
8 Tojeng, sikontu apa singaraka ri langika laKubunoi, siagang linoa laKupa’jari sassang makkapuki. INakke, Batara Kaminang Tinggia, anne akkana.
9 Ri wattunna Kupasiara’ ri passala’na kaancurannu ri sikamma pa’rasangang tenayapa nuassengi, jai bansa la’jari lussa’.
10 Tojeng, laKusoeangi pa’dangKu nampa Kubetako. Sikamma karaenga siagang bansa-bansaya lanaciniki anjo tindakangKu mae ri kau. Anjo wattua lannekkereki ke’nanga napakamma malla’, siagang lanri malla’na mate.’"
11 Nakana Batara Kaminang Tinggia ri karaeng Mesir, "Pa’danna karaeng Babel lanipate’baki mae ri kau.
12 Tantara battua ri bansa-bansa pallaka laKusuroi ambi’buki pa’danna ke’nanga nampa nabuno sikontu ra’ya’nu. Ra’ya’nu siagang sikontu apa nakalompoanga pa’mai’nu laancuru’ taba sikali ngasengi.
13 Olo’-olo’nu laKubunoi ri biring binanga-binangaya, tampa’na ke’nanga angnginung. Baji’ rupatau kammayatompa olo’-oloka, tenamo nalanapuccaki pole je’ne’na anjo binangaya.
14 Jari sikontu binangaya ri pa’rasangannu laKupa’jari ci’nong kabusuki je’ne’na, siagang Kupassolong je’ne’na siagang sannang. INakke, Batara Kaminang Tinggia, anne akkana.
15 Punna Kupa’jari Mesir parang lompo sino, kammayatompa Kupanraki sikontu apa ammantanga anjoreng, lanaassemmi ke’nanga angkanaya iNakkemi Batara.
16 Anne pappakainga’ terasaka la’jari kelong kasusaang. Tubainea battu ri bansa-bansa maraenga lanakelongangi salaku pammatei kasusaang mae ri Mesir siagang sikontu ra’ya’na. INakke, Batara Kaminang Tinggia, anne akkana."
17 Ri tanggala’ sampulo allima bulang se’re, lalang taung makasampulo anrua nipela’na ikambe, Nakana pole Batara ri nakke,
18 "He tau, susako ri nyawanu lanri ra’ya’ Mesir. Kiringi ke’nanga mange ri linona tau matea siagang ngaseng pa’rasangang-pa’rasangang kassa’ maraenga.
19 Paui mae ri ke’nanga, angkana, ‘Nukapangi angkana ikau kaminang ga’ga? Lanaungko ri linona tau matea, siagang nipara’bako ri alla’na tau tenaya natappa’ ri Allata’ala.’
20 Bansa Mesir lamatei siagang tau matea lalang pa’bundukang. Nia’mo se’re pa’dang sadia untu’ ambuno kabusuki ke’nanga.
21 Sikamma tubarani gammaraka siagang sikamma tau naaganga Mesir sita’gala’ lalang pa’bundukang, lanaruppai siagang rannu kabattuanna tu Mesir antama’ ri linona tau matea. Akkio’ rannui ke’nanga angkana, ‘Sikamma anjo tau tenaya natappa’ ri Allata’ala, matemi lalang pa’bundukang. Kamma-kamma anne battumi mae ke’nanga siagang anra’ba anrinni.’
22 Asyur anra’bai anjoreng, nikulilingi ri kuburu’na sikamma tantarana. Yangasenna ke’nanga matei lalang pa’bundukang. Kuburu’na ke’nanga niaki ri bageang kaminang irawa ri linona tau matea. Ri wattu attallasa’na ija ke’nanga, appakamallaki mae ri linoa.
23 (32:22)
24 Elam niaki anjoreng siagang kuburu’na tantarana ri tammulilina. Tena nisunnaki ke’nanga, namate ngaseng lalang ri pa’bundukang, nampa naung ri linona tau matea. Ri wattunna attallasa’ ke’nanga appakamallaki, mingka kamma-kamma anne matemi ke’nanga siagang musti natanggongi siri’-sirika siagang ngaseng sikamma tau matea lalang pa’bundukang.
25 (32:24)
26 Mesekh siagang Tubal niaki anjoreng, nikulilingi ri kuburu’na sikamma tantarana ke’nanga. Tena nisunnaki ke’nanga, namate ngaseng lalang pa’bundukang. Ri wattunna attallasa’ ke’nanga appakamallaki ri linoa.
27 Tena nanggappa ke’nanga acara nikuburu’ nipakalompo sangkamma tau barania ri jammang riolo, ia naunga ri linona tau matea siagang sanjatana langkaka. Anjo sikamma tau barania nikuburuki siagang pa’dang niparirawangngang ulunna siagang pannangkisi’ niparibarambanna. Ri wattunna attallasa’, anjo sikamma tau barania, ma’nassa barani tojengi, sa’genna a’jari malla’ ngaseng taua.
28 Kammami anjo tu Mesir lanitarawang siagang nipara’ba ri tangnga-tangngana tau tenaya natappa’ ri Allata’ala siagang tau matea lalang pa’bundukang.
29 Edom niaki anjoreng siagang sikontu karaenna kammayatompa sikontu pamarentana. Riolo ke’nanga tantara kassa’, mingka kamma-kamma anne anra’bami ri linona tau matea siagang tau mate maraenga tenaya natappa’ ri Allata’ala.
30 Sikamma karaenga battu wara’ niaki anjoreng, kammayatompa tu Sidon. Riolo kakoasanna ke’nanga appakamallaki, mingka kamma-kamma anne nipakasiri’mi ke’nanga, siagang tena nisunnaki nantama’ ri linona tau matea siagang ngaseng sikamma tau matea lalang pa’bundukang. Anjorengi ke’nanga anra’ba siagang natanggongi ra’masa’na siagang ngaseng sikamma tau naunga ri linona tau matea.
31 Punna battu karaeng Mesir siagang tantarana mae ri linona tau matea, nampa nacini’ ngaseng sikamma tau matea lalang pa’bundukang, langgappami ke’nanga panynyaleori. INakke, Batara Kaminang Tinggia, anne akkana.
32 INakkemi passabakkanna na’jari appakamalla’ karaeng Mesir mae ri sikamma tau attallasaka, mingka ia siagang tantarana lamatei nampa nipara’ba siagang sikontu tau tenaya natappa’ ri Allata’ala, siagang matea lalang pa’bundukang. INakke, Batara Kaminang Tinggia, anne akkana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA