Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kutare ku das langit-langit si lit i babo takal kerubim e, janah kuidah lit sada si tempasna bagi kursi kinirajan si i bahan i bas batu sapir nari.
2 Nina Dibata man kalak si ruis kain linen ndai, "To dahi ku kelang-kelang roda-roda si lit i teruh kerubim e, janah buat i je sengkerauk arang si gara. Kenca bage caburkenlah arang e ku kota e." Kuperdiateken ia lawes.
3 Kerubim ndai sangana tedis arah selatan Rumah Pertoton tupung dilaki si ruis kain linen ndai bengket ku teruh kerubim e. Emaka lit embun ndemi kesain Rumah Pertoton.
4 Sinalsal si mesilo, tanda TUHAN lit i je, mbincar i bas kerubim e nari, jenari pindah ku dalan bengket Rumah Pertoton e. Kenca bage Rumah Pertoton e dem alu embun, janah kesainna dem alu sinalsal si terang.
5 Sora kabeng kerubim ndai terbegi seh ku kesain si arah darat; bagi sora Dibata si Mada Kuasa tempasna.
6 Tupung iperentahken TUHAN kalak si ruis kain linen ndai muat api i bas kelang-kelang roda si lit i teruh kerubim e, minter ia bengket jenari tedis deherken sada roda.
7 Sada i bas kerubim ndai nari ndadaken tanna ku api si lit i kelang-kelang kerubim e kerina, jenari ibuatna arang, itamakenna ku tan kalak si ruisken kain linen ndai. Ialokenna arang e, jenari lawes ia.
8 Kuidah maka kerina kerubim ndai lit tanna bagi tan jelma i teruh kabengna.
9 Kuidah ka pe maka empatna kerubim e lit sada roda iduruna. Roda si empat e seri kerina, janah erkilat-kilat bagi batu permata si mejile. Kenca bage i tengah-tengah tep-tep roda lit ka sada roda si deban, siku percibalna.
10 (Yeh 10:9)
11 Emaka adi erdalan kerubim e, banci ia erdalan kempak apai pe, alu la pada erkusur. Ras-ras ia kerina erdalan ku ja saja pe atena, janah la perlu ia erkusur.
12 Dagingna, gurungna, tanna, kabengna, bage pe rodana, kerina dem alu mata.
13 Roda enda kerina seri ras si nggo kuidah i bas pengenehenen si pemena.
14 Tep-tep kerubim lit empat ayona. Si pemena bagi ayo jenggi lembu, si peduaken bagi ayo jelma, si peteluken bagi ayo singa, janah si peempatken bagi ayo rajawali.
15 Kerubim e kap si kuidah i tepi Lau Kebar mbarenda. Adi ikirbangkenna kabengna, kabang ia ku das, tah kabang ku lebe, adi ngadi ia, roda ndai tetap ngikut, sabap kerubim ndai engkuasaisa.
16 (Yeh 10:15)
17 (Yeh 10:15)
18 Kenca bage sinalsal si mesilo, tanda TUHAN lit i je, nadingken dalan bengket ku Rumah Pertoton e, jenari lawes ku sada ingan i babo kerubim e.
19 Ikirbangkenna kabengna, jenari kabang ia i doni nari tupung aku ngenenca, janah roda ndai pe ikut kerina rassa. Ngadi ia kentisik i bas pintu gerbang si arah kenjulu Rumah Pertoton, janah sinalsal si mesilo e teridah i babona.
20 Kutandai maka kerubim e, eme kerubim si kuidah i teruh Dibata nu Israel i Lau Kebar.
21 Tep-tep kerubim lit empat ayona, empat kabengna, tan si seri ras tan jelma lit i teruh tep-tep kabengna.
22 Ayona bali kal ras ayo si nggo kuidah mbarenda i tepi Lau Kebar. Tep-tep kerubim pinter perdalanna ku lebe.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA