¹ Aya-wal oso-wal, em bahem beyakam Alap mo olsa de tawa ta gwibin hip edwam gwe-gwen. Sap tawa ta gwibin hip de zini nesa Alap sa lamkam dawemkam karatda tabiri, “An san ha ano ola dawemkam tawa ta gwibirki?” Em de karekkam tawa ta gwibinkim, emsa sa serkam karek tabiri.
² Sap nen kitak kareknake altil gwenan. Hwena zini men zeno ek tihi nakon ol karekna aha-en mae wet son sremna, kire zini man zere mo timni kitak golinik gweꞌara. Zen kire nik Alap mo nwenak eoto gwesik gwenan.
³ Men kiye– kudasa de zersong gwenna. Zen besi tekna ek tihinak bu nulsuk gweblanan, dekon zep dabenkam bai da gwenan– dekam de zini in zere mo dwam gwibin sin dep zersong gwen hapye. Ëk tihi en nakon de da tablankam, zen dekam de tingare timni insa zersong gwen.
⁴ Men kiye hen bul golsong gwen zini. Zen zere mo hoskam de golsong gwen– zere mo enlala gwibin sin. Bulu in sap yawala. Asesena hen sap yawala. Hosna in betekna, hwena dekam diki bul yala insa golinik gwen.
⁵ Mahala hen kirekam: Zen sap betekna. Hwena zen ki serkam gulin halasen gwenda. Emki eenlala gwen: Men kiye hen, eik yawalak de syauk betekkam drawe henna, zen hwena dekon de hendep hitil song gwenkam yak gwe haladan.
⁶ Zen zep mahala hen syauk makan. Zen neno mae mo timnik lwa gwenda– san de jal ausu. Dekon zep jal-jala syauk makan yak gwe halada gwenan, hendep timni zao zep kitak hweistil gwenan. Syauknu insa zen dowal mo kigi ze draul sone gwenda, dekam zep neno mae mo gwenna kitak ang gulsuk gwenda.
⁷ Kitak de otweran terya-tyana, hwena zini ki desa mumuk da gwibirin– sap eiknik dena, gulk dena, sap muskum de il gwehal gwen tweran. Sap hinak de lowehe gwen wenya, desa ki mumuk da gwibirin.
⁸ Diki mumuk tan srem hap dena aha-en: Zen mahal. Desa toton nara dep? – mumuk tan naye. Zen jal-jal tanganna– san de wanya jal-jala kiye.
⁹ Sap nen mahalkame Bian Alap mo bosena teip ulsuk gweblanan. Hwena mahala in hen dekame etan zi bosyanna lamang la gwibirin. Hwena zi bosyanna in sap hen Alap am zere mo nwe-masekam yang tasibirki.
¹⁰ Aya-wal oso-wal, bap zen kirekam lwa gwen: Mahala an, zen dekame Alapsa boltere la gwenan, hen nenaka dekame lamang la gwibirin.
¹¹ San ha ki aha-ere ho-nwe nakon wet so gwenan– hikam hen ho tangankamye? Sap hom tanganke.
¹² Aya-wal oso-wal, san ha yerana ki walengkam te gwenan? San ha deiwana ki wangakam te gwenan? Zen homke. Hen hi nwena bejen ho tangankam wet son. Zen zep nere mae mo mahala nen dawem enkam goleinik gwe-gwen.
¹³ Ebon mae onakon de ahanik kil ginni, “Alap mes abe hap enlala blala zerblaka.” Hwena ki eno enlala blala in wal bose wal ukip emki zertrei gwizimdin. Sap eiwakam de enlala blal zini, zen dawemsa noltrei gwizimnin, hen aha zisi enlala betekkam mas neibirida gwenan. Zen dekon zep anakan tame da gwibirin, “Eiwa, zeno enlalana blala.”
¹⁴ Hwena em de zi bose omka husus gwibirida gwenna, dekam bahem enaka anakan boltere tan, “Ano enlalana blala.” Hen em de ere en mo timsi ngalap gwe-gwibinni, ki ebon onak Bian onakore enlala blala hom.
¹⁵ Em de kirekam lowehe gwenna, zep eno mae mo enlala blala in ngatan zi mo lang nakore naka hom. Zen okamana awe de enna, hen ere mo hole-hle nakorena, hen dowal-dowala korena.
¹⁶ Zini men zebon zenaka de husus gwibiridan enlalana, hen zena en naka de ngalap gweblan hap dena lwa gwenda, zeno enlalana men-san an-sankam sa lwa gweblala. Kire zini tingare kareksa sa hendep gulin hana song gwera.
¹⁷ Hwena Alap onakore enlala blala bare zini, zen kirekam bejen. Kire zi mo enlalana lalakna, hen umlae enna, hen kwasang-kwasangna. Alap onakore enlala blala bare zini zen hen aha zisi blikip gwesik gweblankam. Kire zini man aha zi niban de enlalasa zisiri tan hap esam gwesik gwenan, hen zi bose zikhip dawemsa nol gwizimnin. Alap onakore enlala blala bare zini zen bejen ahakore en naka goleaken, hen bejen mahala dare syak gwen.
¹⁸ Zi de zi bosyansa umlae ora san dep dam tasik sone gwibinkim, dekam Alap sa hwena heꞌho gwibin nika zebe hap golblala, sap zini beya nik sa dekon Alap mo nwenak edakastil gwer.