¹ Aya-wal oso-wal, nen de ngatan Zini Bian Yesussu taibliblankam, nen bejen nen nenaka ahakore en naka nwekam goleake gwen– bose nabare wenya ban bose srem wenya banye.
² Zep anakarekam de lwaꞌanam: Zi dare de eno mae mo but srem golak ang eꞌanam– ahana pakean dawem naban hen cincin ala tan naban, hwena aha zini tahalha tola, pakean kalk-kalk naban.
³ Nen de pakean dawem nabare zini insa gublunkam, “Bian, emki awe komal tum sam-samnak nikinzi,” hwena tahalha zini insa gubluꞌanam, “Em iwe zauk,” ahaksa, “Em analak ano tana alp nakon nikin,”
⁴ dekam nen mese tangan ekarek gwenan. Sap dekam nen auhu-kamanak de kirekam-kirekam enlala nabane ahakore en naka nwekam nenaka oleakenan.
⁵ Aya-wal oso-wal, emki eenlala gwen: Auhu-kamanak mensa tahalha zikim nenbirida gwenan, hwena Alap mes desa hlil inki– zen de serkam Zenaka taibliblan hap, hen tahalha sremkam dikim zere mo irik ginnik lamkam lowehe gwen hap. Sap men zen Zenaka kwasang ne gweblanan, zebe mae hap dena mes ki kirekam gu-gubirida gweka.
⁶ Hwena nen de tahalha srem zi ensa nwekam goleake gwenkam, dekam hwena tahalha wenya ema lamang la gwibirin. Hwena te-ala beya wenya men zebon mae ebon gwe-gwenan, nabakam de bayar gun sremkam, zen in zen nesa jap nul sonenda gwenan, hendep teipsin-teipsin zi sin dep il dibirhal gwenan– zewe de nesa klak tabin hipye.
⁷ Zen zen hen neno mae mo Teipsin Zini Yesus mo bosena lamang nul gwenan.
⁸ Emki Alap mo ol ale gunnu ansa, bol-zaun tangan wenya enlala gwe-gwibin– mensa hen neno mae mo Teipsinni Yesus anakan nesa titi tabirkike, “Zi bose omka em kwasang gwibirida gwen– san de enaka de kwasang gweblanna kiye.” Zen in zep, nen esa esam gwesil– desan de ang ta gwenkamye.
⁹ Hwena nen de ahakore en naka nwekam goleake gwenkam, bose nabare wenya ban bose srem wenya ban, dekam nen kareknake altil gwenan– kwasang hap de titi tabin ola insa de gulmurunkumye.
¹⁰ Bian man nesa dwam gwibiridaꞌara– nen de kitak zere mo titi tabin sin sul sonenkam ang ta gwen hap. Zi de kitak zeno ol san ang gwe-gwenna, hwena aha-en tol mae de gulmun sone kininna, dekam hwena man dam gwesinin, “Zen hom kitak sul sonenda.”
¹¹ Zep anakan lwaꞌan: Musa man jalse gwibiridaka, “Bahem ekahalo gwe-gwen,” hen, “Bahem enaka tamera gwen.” Em de kahalo gwen sremkam zi ensa tankam, dekam em home titi tabin ola insa kitak sul sonenda. Zep hen kirekam, nen de ahakore en naka nwekam goleake gwenkam, nen hen home dekam Bian mo titi tabinsi su kul sone gweꞌan.
¹² Emki ansa enlala gwibin: Nen kime Bian Yesus hun lamkam ertoweꞌak, Zen molya nesa epba titi tabin ol san de ang tan srem hap karek tabirki. Ëpba titi tabin ola in menkam serkam nesa tahale gwibik, hwena Bian Yesus mes dekon nesa gwiswe soneka. Diki Bian de lwahal zankam Zen sa neno mae mo syala hen ol toranna anakan klis gulzimdi, “Em ba habe kwasang hap de ano titi tabin ola in san ang gwe srem gweka?”
¹³ Zep men zen zi bose zemka kwasang neibirida srem gwe-gwenan, Bian Yesus hen kire zisi molya lamkam kwasang gwibiridaka. Hwena men zen kwasang tola ban zi bose zik mo karekna eititi nei gwibir-zimnin, Bian sa desa hen kwasang gwibiridala, hen zeno mae mo karek-karekna sa tap gulsuzimdi.
¹⁴ Aya-wal oso-wal, zi de anakan gunnu, “Ëe mese Alapsa taibliblak,” hwena zen de zere mo Alapsa de taibliblanna insa goltre gwen sremkam, zen waba hap. Dekam bejen zenaka ngaya tan.
¹⁵ Emki eenlala gwen: Wal bose uk de tahalha gwenna– pakeanna hom, hen tembanena hom.
¹⁶ Ebon mae onakore nik de ahanik gubluꞌanam, “Dawem ki en song gwe, hen dawem enkam gwe. Wake, wehe tol pakeankam hen tembanekam emsa mas neblaꞌak?” Hwena zen de hen mas gweblan sremkam, zeno kirekam de ola in waba hap.
¹⁷ Zep Alapsa de taibliblanna zen hen kirekam: Goltre gwen sremkam, zen waba hap. Zen san de tokna.
¹⁸ Hwena ano ola insa ahakon sa anakan nulsul, “Alap mes ki kirekam dwam gwibiridaka: Ahakon zere mae mo Alapsa de taibliblansa de goltre gwen hap de wenya. Ahakon goltre gwen sremkam dep de wenya.” Kirekam de zini ee asa anakan ding gulzim, “Ëe ki banakan asa emsa anakan tawa gwibiridal? – ‘Zen eiwa man Alapsa daibliblaꞌan,’ em de ba maesa syal gwibin sremkamye. Hwena ee asa ere mo Alapsa de taibliblansa zisi de mas gwibirida gwenkam hen dawemkam de gwe gwenkam goltrei gwizim.
¹⁹ Eiwa, em mese anakan laibliblak, ‘Alap Zen aha-en.’ Zen sap airis tol. Hwena kire enkam de taibliblankam hom sowe heꞌan. Dowal-dowala ki hen kire enkam daibli gweblanan– in kirekam hen em laibliblaꞌanye. Zen zep anakare hap etitikin gwe-gwenan, ‘Asa sa Alap karek tabiri.’”
²⁰ Zep men zen kirekam ekil gil gweꞌan, “Goltre gwen sremkam de Alapsa taibliblanna zen airis,” kirekam de zini zen enlala joblo-top tanganna. Goltre gwen sremkam de taibliblanna, zen waba tangan hap. An zebe ebe mae hap ansa mas gulzimꞌin:
²¹ Nere mae mo auyanna Abrahamsa emki enlala gweblan– zen kim tane zem Isaksa Alap hap de sap ang tasik seblan hap holena blonsubluꞌankake. Zen dekam Alap hap anakan goltreblaka, “Ëe eiwa ama Emsa taibliblaꞌan.” Zen in zep Alap sam gwesiblika.
²² Eiwa, Abraham hap de aisili iwe man tangan dam gwesiꞌin: Zere mo taibliblanna insa kim kirekam Alap hap goltreblaka, zen dekam tangan zep Alap mo nwenak sowehek.
²³ Zen in zep hyanak zebe hap dena Alap mo olak anakan ale nuk, “Abraham zen Alapsa taibliblaka, dekam zep Alap anakan gubluka, ‘Em mese ere mo nwenak dakastili.’” Zen in zep Abrahamsa nen gweblak, “Alap mo dokot.”
²⁴ Zep angkam mes dam gwesinin: Nesa de Alap sam gwesibiridan hap, diki nen esa nere mae mo Alapsa de taibliblanna insa oltre gwer. Goltre gwen sremkam, bejen sam gwesin.
²⁵ Rahab Bak hen kirekam gwek. Zen sap nonol kahalo hap zenaka golgu gwek– te-alasa de dekon gulin gwen hap. Hwena Israel kore otek zi darena kim apta zaka, zen teisyaink. Ki zep hwena aha ora san sowekam si so sonek. Zen insa kirekam syal gwibik, zen dekam zep zenaka anakan goltrek, “Ëe ama Alapsa taibliblaꞌan.” Zen zep hendep Alap mo nwenak sam gwesik.
²⁶ Men kiye– timni. Ensasa sremkam, zen tokna. Neno mae mo Alapsa de taibliblanna hen kirekam: Goltre gwen sremkam zen hen san de tokna kiye.