Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Terus malaẽkat kelime niup terompẽtne, dait tiang serioq sopoq bintang geriq lẽman langit ojok gumi. Bintang nike teicanin kunci jurang maut.

² Make bintang nike bukaq jurang maut nike, terus sugul pendet lẽman dalemne maraq pendet lẽman keren saq belẽq. Jelo dait awang-awang jari peteng siq pendet lẽman jurang nike.

³ Terus lẽman dalem pendet nike sugul balang-balang saq turun ojok gumi. Balang-balang nike teicanin kuase saq pade maraq saq teicanin tipaq teledu.

⁴ Ie pade tebalaq nyẽdaq pupaq, atao leloloan, atao tetaletan-tetaletan lainne. Ie pade cume kanggo nyerang dengan-dengan saq lẽq telakarne ndẽq araq tande sẽgel lẽman Allah.

⁵ Balang-balang nike ndẽq teijinang nyematẽq dengan-dengan nike, laguq cume nyiksaq ie pade sengonẽq lime bulan. Sakit lantaran siksaqan balang-balang nike pade maraq sakitne tesenget siq teledu.

⁶ Sengonẽq lime bulan nike, dengan-dengan nike berusahe adẽqne iniq ninggal, laguq ie pade ndẽq iniq ninggal; ie pade melẽt ninggal, laguq maut jaoq lẽman ie pade.

⁷ Rue balang nike maraq jaran saq siep lalo perang. Lẽq otak balang-balang nike araq penggitan maraq rue mahkote emas. Mue balang-balang nike pade maraq mue manusie.

⁸ Bulu balang-balang nike maraq bulu dengan nine, dait gigine pade maraq gigi singe.

⁹ Dade balang-balang nike maraq tetutup siq kelambi besi. Suare kelẽtẽkne pade maraq suare pasukan kerẽte-kerẽte jaran saq luwẽq saq kenyeke nyerbu perang.

¹⁰ Ie pade bedowẽ ẽlong dait senget maraq teledu. Dait lẽq dalem ẽlongne nike araq kekuatan jari nyiksaq manusie sengonẽq lime bulan.

¹¹ Ie pade bedowẽ raje saq mrẽntah ie pade, dait raje nike malaẽkat jurang maut. Dalem base Ibrani aranne Abadon; dait dalem base Yunani Apolion (saq artine "Penyẽdaq").

¹² Celake saq penembẽq sampun liwat. Sesampun nike araq due celake malik saq gen dateng.

¹³ Beterus malaẽkat saq keenem niup terompẽtne. Make tiang dengah suare dateng lẽman keempat bucu mẽje taoq kurban saq tepiaq lẽman emas saq araq lẽq arepan Allah.

¹⁴ Suare nike bemanik tipaq malaẽkat saq keenem nike, "Lepas keempat malaẽkat saq tetaliq lẽq dẽkẽt Kokoq Eprat, kokoq saq belẽq nike!"

¹⁵ Keempat malaẽkat nike telepas. Ie pade sampun tesiepang husus umaq jam, jelo, bulan, dait taun nike jari nyematẽq sepertelu lẽman selapuq umat manusie.

¹⁶ Tiang dengah bahwe jumlah pasukan-pasukan saq kadu jaran nike araq satak jute luwẽqne.

¹⁷ Dait dalem penyerioqan tiang, tiang serioq jaran-jaran nike dait penunggang-penunggangne. Penunggang-penunggangne kadu kelambi besi saq bewarne bẽaq toaq dait biru maraq batu nilam, dait kuning maraq urirang. Otak jaran-jaran nike maraq otak singe, dait lẽman biwihne sugul api, pendet, dait urirang.

¹⁸ Sepertelu lẽman umat manusie ninggal siq telu bencane nike; api, pendet, dait urirang saq sugul lẽman biwih jaran-jaran nike.

¹⁹ Kekuatan jaran-jaran nike araq lẽq biwihne dait lẽq ẽlongne ẽndah. ~Elong-ẽlongne maraq ulah saq bedowẽ otak. Siq ẽlongne nike, jaran-jaran nike nyiksaq manusie.

²⁰ Laguq sise umat manusie saq ndẽq ninggal siq bencane-bencane nike ndẽqne tobat lẽman perbuatanne mẽsaq. Ie pade ndẽq mẽlẽ engkah nyembah roh-roh jahat dait berhale-berhale emas, perak, tembage, batu dait kayuq saq ndẽq iniq gitaq atao dengah atao lampaq.

²¹ Ie pade ẽndah ndẽq mẽlẽ tobat lẽman perbuatan-perbuatan nyematẽq dengan, ilmu-ilmu sẽhẽr, gawẽq perbuatan saq cabul dait memaling.

Wahyu

Video Wahyu 9

Ikuti Kami:

KONTAK | PARTISIPASI | DONASI