Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Melaikat luk kelimeh ineh pana' nengiup serupitneh, idi ui nenier aceh gituen luk pangeh nerurug rat bang langit amé' luun tana', idi pangeh biré kuanneh taka tanga' lubang luk na miak teriin kidalemneh.
2 Gituen ineh nengukab tanga' lubang luk na miak teriin kidalemneh ineh, idi rabpun neremuat rat bang lubang ineh, mepad kudeng rabpun tetel luk rayeh, pad mateh aco idi arang gawa' pana' medacem ngaceku ratnan rabpun lubang ineh.
3 Idi kato-kato neremuat rat bang rabpun ineh amé' luun tana', idi pangeh biré kuandeh lalud luk mepad kudeng lalud menipal kara'.
4 Idi pangeh bila kuandeh na miak ngaté uduh, lawa kayuh, idi tibu luk baken, iamo' ideh miak ngedereh lemulun luk na etu Allah nan madu'deh.
5 Idi pangeh bila kuandeh pad ideh na ngaté nedeh, iamo' ngedereh nedeh pad macing limeh bulan kinioneh. Idi derehdeh ineh mepad kudeng kareb lemulun kitep menipal kara'.
6 Kareb ineh teh lemulun miak nakap até, iamo' na miak kali' ineh, idi ideh sikal maté, iamo' até ineh buro rat nedeh.
7 Idi ayu kato ineh mepad kudeng kuda luk temina' pebunu', idi nan uluhdeh inan mepad kudeng pata luk ratnan amas; idi kiungdeh mepad kudeng kiung lemulun.
8 Abpukdeh mepad kudeng abpuk decur idi lipendeh mepad kudeng lipen balang.
9 Idi nan ruukdeh inan mepad kudeng kuyuh' belawan, idi uni iladdeh mepad kudeng uni keréta dengan kuda luk pelaba ula' upun kareb pebunu'.
10 Ideh inan iur mepad kudeng iur menipar kara', idi megalih teh. Idi bang iurdeh ineh inan lalud ngacing ét kuan lemulun pad macing limeh bulan kinioneh.
11 Idi raca'deh, ieh ineh melaikat lubang luk na miak teriin kidalemneh ineh. Ngadanneh bang buri' lun Iberani, Abadon, idi bang buri Grika, ngadanneh Apolion, (ilungneh "Luk Ngaté").
12 Idi susa' luk pun-pun ineh pangeh nepelaba; idi inan dueh susa' luk miak macing baruh teh.
13 Idi melaikat luk keanem ineh pana' nengiup serupitneh, idi ui neninger arod remuat ratnan apat unga bubpun amas luk pa kiung Allah ineh.
14 Arod ineh pebala kuan melaikat luk keanem luk ngimet serupit ineh, "Muit apat melaikat luk kiling tangeb abpa' rayeh ineh, ieh ineh Abpa' Pirat."
15 Idi apat melaikat ineh pinuit. Ideh pangeh tinina' kuan jam idi aco idi bulan idi lak ineh, pad miak ngaté sebabpat ratnan teluh babpat amung-amung lemulun.
16 Idi kinula' amung-amung baweh luk inan kuda ineh 200 juta; ui pangeh neninger kinula'deh.
17 Bang luk sinierku ui nenier kuda-kuda ineh idi lemulun luk tudo luundeh, ayudeh kudeng ini: ideh inan kuyu' belawan luk mesia' mepad kudeng apui, idi mebata' mepad kudeng batu luk bata' langit, idi mebirar mepad kudeng batu apui. Uluh kuda ineh mepad kudeng uluh balang, idi remuat rat bang tangdeh apui, rabpun, idi batu apui.
18 Idi ngaceku ratnan teluh dereh ineh sebabpat ratnan teluh babpat amung-amung lemulun pinaté ku apui, rabpun, idi batu apui luk remuat rat bang tangdeh ineh.
19 Ngaceku lalud kuda ineh inan bang tangdeh idi bang iurdeh. Iurdeh ineh mepad kudeng menipeh luk inan uluh, idi dengan ineh ideh ngatep lemulun.
20 Lun baken luk nateh pinaté ku dereh ineh, na nuren ratnan kekamendeh, iamo' ideh megéi sembayang inan ada' idi akang luk ratnan amas, pirak, tekaling, batu, idi kayuh, luk na miak nier idi ninger, idi luk na miak nalan pana'.
21 Idi nateh ideh nuren ratnan ngaté lemulun, ratnan bangun, sét, idi pano pana'.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA