Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Palus malekat je kalimee mampahiau tarompete, tuntang aku mite ije bintang manjato bara langit akan hunjun petak. Akan bintang te inenga kunci liang pampatei.

² Maka bintang te mukei liang pampatei te, palus asep balua bara huange sama kilau asep bara dapur je hai. Matanandau tuntang langit manjadi kaput awi asep bara liang pampatei.

³ Palus bara huang asep te balua kare sangkalap je mohon akan hunjun petak. Kare sangkalap te inenga kuasa sama kilau je inenga akan kala.

⁴ Ewen te ingahana marusak oru, atawa kare batang kayu, atawa kare taloh awang beken. Ewen baya tau mawi kare oloh je intu lingkaue jaton tanda segel bara Hatalla.

⁵ Kare sangkalap te dia inyoho mampatei kare oloh te, tapi baya mangapehe ewen sampai lime bulan. Angat karah ganan kapehe je iawi kare sangkalap te sama kilau angat karah pepet kala.

⁶ Katahin lime bulan te kare oloh te mipen toto handak matei, tapi ewen dia tau matei; ewen mipen matei tapi pampatei kejau bara ewen.

⁷ Ampin sangkalap te sama kilau kuda je tatap handak parang. Intu kare takolok sangkalap te aton taloh je ampie sama kilau makota amas. Baun ewen sama kilau baun olon.

⁸ Balau ewen sama kilau balau oloh bawi, tuntang kasingan ewen sama kilau kasingan singa.

⁹ Usok ewen inutup hapan taloh je sama kilau baju sanaman. Auh palapas ewen sama kilau auh kare kareta kuda je are toto kawae je kanjerae mamok hong parang hai.

¹⁰ Ewen te aton ikohe tuntang tau mamepet sama kilau kala. Tuntang intu ikoh ewen te aton kaabas hapae mangapehe oloh kalunen lime bulan katahie.

¹¹ Ain ewen aton raja je marentah ewen, tuntang raja te iete malekat je mimbing kuasa hunjun kare taloh hong liang pampatei. Arae huang bahasa Ibrani iete Abadon; tuntang hong bahasa Yunani inyewut Apolion (rimae "Parusak").

¹² Calaka je pangkasolake jari mahalau. Limbah te aton due calaka tinai je musti dumah.

¹³ Limbah te malekat je kajahawen mampahiau tarompete. Maka aku mahining auh lembut bara epat puting mesbeh amas je aton intu taharep Hatalla.

¹⁴ Auh te hamauh dengan malekat je kajahawen te, "Keleh malapas kaepat malekat je injarat intu Sungei Euprat te!"

¹⁵ Kaepat malekat te palus ilapas. Ewen te puna tantai inatap jame, andaue, bulae, tuntang nyeloe uka mampatei sapertelo bara salepah ungkup oloh kalunen.

¹⁶ Akangku insanan jumlah pasukan je manongkang kuda te aton due ratus juta karee.

¹⁷ Tuntang huang panggitangku aku mite kare kuda te tuntang kare oloh je manongkange. Kare oloh je manongkange te uras mahapan baju sanaman je warnae bahandang hanyala, bahijau sama kilau batu nilam, tuntang bahenda kilau barirang. Takolok kare kuda te sama kilau takolok singa, tuntang bara nyamae balua apui, asep tuntang barirang.

¹⁸ Sapertelo bara ungkup oloh kalunen matei awi telo macam calaka te; iete apui, asep tuntang barirang je balua bara kare nyaman kuda te.

¹⁹ Kaabas kare kuda te aton intu nyamae tuntang kea intu ikohe. Kare ikohe te sama kilau handipe hatakolok. Hapan ikohe kare kuda te mangapehe oloh kalunen.

²⁰ Tapi tisan kare ungkup oloh kalunen je dia matei awi kare taloh calaka te, mahin dia kea ewen hobah bara kare gawin ewen kabuat. Ewen dia tende manyembah kare setan, tuntang kare hampatong amas, perak tambaga, batu tuntang kayu je dia tau mite tuntang mahining, atawa mananjong.

²¹ Ewen dia kea malihi kare gawin ewen je papa, iete pamuno, kaji patua, gawi harayap tuntang manakau.

Wahyu

Video Wahyu 9

Ikuti Kami:

KONTAK | PARTISIPASI | DONASI