Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sasudah tu, ambo maliyek Anak Domba tu mamacahi sege nan partamu, dari katujuah sege tu. Sudah tu ambo mandanga, ciyek di antaro ka ampek mukaluak tu bakato, "Molah!" Bunyi suwaronyo tu bakcando bunyi guruah.

² Mako ambo maliyek, sudah tu nampak sikua kudo putiah. Urang nan maracaknyo mamacikkan sabuwah induak panah, kabake inyo dibarikan sabuwah mangkuto. Inyo kaluwa sabagai urang nan manang, nan payi marabuik kamanangan.

³ Kudian Anak Domba tu mamacahi sege nan kaduwo, ambo mandanga mukaluak nan kaduwo bakato, "Molah!"

⁴ Sudah tu kaluwa pulo sikua kudo nan lain. Kudo tu sirah bulunyo. Urang nan maracaknyo dibari kuwaso, untuak ma ilang lanyokkan ka adaan damai dari muko bumi, supayo manusia bunuah mambunuah. Mako inyo dibari sabilah padang nan gadang.

⁵ Sudah tu, Anak Domba tu mamacahi sege nan katigo. Ambo mandanga mukaluak nan katigo bakato, "Molah!" Ambo maliyek, mako nampak sikua kudo itam. Urang nan maracaknyo mamacikkan sapasang timbangan di tangannyo.

⁶ Ambo mandanga sasuatu, nan tadanga bakcando suwaro nan basaru, dari tangah-tangah ka ampek mukaluak tu. Suwaro tu bakato, "Saliter gandun nan rancak, sa arago upah sahari, tigo liter gandun corak nan lain, sa arago upah sahari pulo. Tapi, jan marusakkan batang-batang zaitun, sarato jo kabun anggur!"

⁷ Kudian Anak Domba tu mamacahi sege nan ka ampek. Ambo mandanga mukaluak nan ka ampek bakato, "Molah!"

⁸ Ambo maliyek, sudah tu nampak sikua kudo pucek. Urang nan maracaknyo banamo si Mauik. Dari balakang, inyo di iriangkan dakek-dakek dek Alam Mauik. Kakuwasoan dari saparampek bumi ko, disarahkan kabake inyo tu, supayo inyo dapek mambunuah malalui paparangan, malalui maso kalaparan, malalui bala panyakik, sarato malalui sagalo binatang buweh.

⁹ Sasudah tu, Anak Domba tu mamacahi sege nan kalimo. Mako ambo maliyek di bawah mezbah, ado jiwa-jiwa urang-urang nan mati dibunuah, dek karano inyo satiya mambaritokan pasan dari Allah malalui pangakuannyo.

¹⁰ Inyo tu bi mamakiak jo suwaro nan kuwaik, "Ya Tuhan Nan Mahakuwaso, nan suci sarato nan bana! Bara lamo lai, baru ka Angkau adieli panduduak bumi, pabilo ka Angkau ukun urang-urang tu, dek karano inyo lah mambunuah kami?"

¹¹ Satiyok inyo tu dibari salai jubah nan putiah. Sudah tu inyo disuruah balapeh panek agak sabanta, sampai lah langkok kasadonyo kanti-kanti sapajuwangannyo, sarato jo sudaro-sudaronyo nan ka dibunuah bakcando inyo pulo.

¹² Sudah tu ambo maliyek Anak Domba tu mamacahi sege nan ka anam. Tajadilah gampo nan manakuikkan. Matoari manjadi itam bakcando malam nan kalam bakapiciak, bulan manjadi sirah bakcando darah.

¹³ Bintang-bintang bi rareh dari langik ka bumi, bakcando buwah puraweh mudo, rareh dari batangnyo, dikutiko dioyak dek angin limbubu.

¹⁴ Langik ma ilang bakcando karateh diguluang, kasadonyo gunuang sarato jo pulau, di insuikkan dari tampaiknyo.

¹⁵ Sudah tu rajo-rajo dunia, sagalo pamimpin, sagalo palimo, urang-urang kayo, urang-urang bakuwaso, sarato jo urang-urang lainnyo, biya budak maupun urang mardeka, kasadonyo ka bi ma andok masuak guwo, sarato di salo-salo batu gunuang.

¹⁶ Kabake gunuang jo kabake batu tu, inyo bi ma ariak, "Timpolah kami! Sawok-ilah kami dari pancaliak-an Baliau nan duduak di ateh kurisi, sarato dari bangih Anak Domba tu!

¹⁷ Ari nan manakuikkan lah tibo, kiniko Allah sarato jo Anak Domba, malapehkan bangih-Nyo, mako indak surang juwo doh nan ka talok batahan di adok-an Baliau-baliau tu!"

Wahyu

Video Wahyu 6

Ikuti Kami:

KONTAK | PARTISIPASI | DONASI