¹ Ëe Yohanis ki zebe etan dekon kara gwek, hwena ngatan zi mo langnak de lilikinsi zebe kon akesek. Man dalusuhuk. Hwena ki zebe hen ola salsek– men kirekam nonol asa tonblaꞌankake, sramin auku makare olsa. Zen man asa gubluka, “Haen, an san emki sewe sezan. Ëe asa ebe hap goltreblal– in zen ki ngein sin joweꞌakye.”
² Dekam zep ki hendep Alap mo Enhona asa bi gweblaka, hendep dekam zebe eiwa de makan ngatan zi mo langnak hatak. Zao zebe teipsin tangan zi hip de komal tumna akesek, hen Teipsin Tangan Zini Alap Zena zewe nikinꞌinka.
³ Zeno nwe-masena man angtan-angtan gweblaꞌanka– kal-kalkam hen te-ala esesekam, kaso lilingtin makan. Hen boge alp te-ala esese makare nik komal tumna in san wal-wale gwe-gweꞌak.
⁴ Hwena Alap mo komal tumna insa man 24 enkam de ahakore komal tumkam wale nosok. Zewe zini teipsin-teipsin nik hen teinikinꞌik– 24 enkam. Zen pakean ngap-ngapsa alala dak, hen emaskam de mire sigi alala tan naban ze teinikinꞌik.
⁵ Hwena Alap mo komal tumna in kon nglina man ang tasik kini gweꞌanka, hendep dekon zep nglina mam enkam ngam ta gweꞌanka, hendep aukuna man alal tahal gweꞌanka. Hen zeno dang gwen nakon seip makare syauk ngatanna tuju enkam ehitilsik kini gweꞌak. Desa de dam gulsunnu, zen Alap mo Enhona– men Zen tujukam de nwe-masekam zinik syal gwenda-gwendake.
⁶ Hen Alap mo komal tum dang gwen san ki zebe hen hi yawal makarena hlauk, hwena zen kaca lalak makarena. Hen tumna in mo alp-alp san, ngatan zi mo langnak de otweran makare zini dan-ner dan-nerkam ze lowehe gwenan. Zeno mae mo timni dang san hen tahan san nwe en naban.
⁷ Otweran nwe-masena in ahana men kiye– singana. Ahana zeno nwe-masena men kiye– sapi zirya. Hen ahana men kiye– zini. Hen ahana zen men kiye– mawana heir de ihe zanna.
⁸ Dan-ner dan-nerkam de otweran makare zini in, zeno mae mo si alana enam-enamkam. Hen zeno mae mo timni nwe enkam esowehek– sap si ala iltikin mae san. Zen yaklam hen kam ter tanna hom ezausuk gwenan. Zen a kirekam mo da tine gwenan: “Bian Alap, Teipsin Zini, Zen lalakna, Zen lalakna, Zen lalak tanganna. Zen orep mes gweka, hendep nama gweꞌara, hen zeno gwenna molya topse gweblak.”
⁹ Dan-ner dan-nerkam de otweran makare zini, zen kirekam zeno bosesa de teip gulsublun hap de terya da tine gwenan– blikip gwesik gweblan hap hen dawemsa de gol gweblan hap, Zena in Zen komal tum dawemna in kon hendep denaban irik giꞌirake. Hen in kim otweran makare zini in kirekam terya da gwenan,
¹⁰ 24 kam de teipsin-teipsin wenya in dekam zep nol ik gin niban boklena kom da gweblananzal– hendep de gwen Teipsin Zini zere mo nwenak. Zen dekam zere mae mo mire sigina talwesin nika kang da gwenanzal– dekam de Bian mo nwenak ebetek gwen hap. Hen dekam zeno bosesa anakan teip nulsuk gweblanan,
¹¹ “Are Bian, ano mae mo Alap, Em en airis– terkam de Emsa ta gweblan hapye. Dikire tingare sosonna Ebon lwa gwek. Dikire ere mo bosena teip nulsublunda gwek. Sap tingare kire-kirena Eme yang tabirki, hen eno enlala gwibinkim ki tingan ejowenda gwek hen engaya gwe-gwek.”