¹ Zen kim hya gwesik, ki zep ahanik in zen tujukam de Alap mo jala bare panci hona okamanak hlei-hli dasibirink abon onak hata zaka. Ki zep ze asa gublu zaka, “Haen. Ëe asa kahalo soson we yawalsa ebe hap goltreblal– men desa sa Alap serkam karek guluke.” Hwena eiwakam de kahalo soson wesya hom enlala gwibirki. Hwena e yawala Babelsa ki enlala gweblaka– in zen weya yawal alpnak lwaꞌarake.
² Auhu-kamanak de teipsin-teipsin wenya man zeno mae mo lowehen san ang ta gwek– boton yang tasin alap-alap osan dep de ang ta nasen gwenkam. Zep zen Alap mo nwenak man lowehek– san de kahalo soson we walya kiye. Bejen aha-ere zi niban en. Okamanak de zini dekam zep desan ang ta gwek, hendep zep emamak gwe-gwek– san de ho mamaksa de otdebinni kiye.
³ Ki zep hendep Alap mo Enhona asa bi gweblaka, dekam zep hendep Alap mo dam taha nakore zini in asa zi srem lang san dep zersong gweka. Zao zebe wenya hlauk. Otweran dowal tahan dannak nikin aneꞌak. Otweranna in, zeno sopna, ok eis kal-kal makarena, hen zeno timni Alapsa de lamang tan bosemse alekam mes sowehek. Otweranna in mo nola tuju enkam, hen nolak de hli-hlina dare taha-tap enkam.
⁴ Wenya in bajuna hen ok eis kal-kal makare naka ala sok– sam dan kil makare naban de siri nen naka. Hen zen mes serkam wer gwek– emaskam, kirekam-kirekam kaso lilingtin niban hen sasyan naban. Tahakam anggur ho nabare sondosa zirensik– emaskam de syal gwibin nika. Hwena zen anggur ho tangansa hom. Hwena zeno dam gulsunnu, zere mo kirekam-kirekam karek hen zere mo kahalo-kahalo nakore karek.
⁵ Mirenak de alena hen ki– anakare gulk sun de ol blaoran naban, “Ëe an Babel Bak, tingare swi soson hen kahalo soson wenyik mo ane.”
⁶ Ëe dekam zebe tame guk, “Zen ansa anggur hona otde gwenan, zen anggur ho tangansa hom. Zen zi kalsa otde gwenan. Kala in Alap mo irik ginnik de biti gwen wenyik mo kal– mensa Yesus hon de tatem ezauk gwennak damera gwekke. Wenya in zep gwe gwenan– san de ho mamaksa de otde gwenna kiye.” Kime ze wenya insa kara guꞌuk, ama ze serkam tenggwanbiꞌik.
⁷ Hwena Alap mo dam taha nakore zini in ki zep asa gubluka, “Em basae tenggwanbiꞌira! Zen in gulk sun de ol blaoran makan. Hwena ee anik dawemkam ebe hap srip gulsubluk– nol beya nabare otweran dowal yala in hap denaka, hen wenya in zen zebon nikin aneꞌanke, zebe hap denaka.
⁸ Otweran dowala in orep man sap okamanak ngaya gweka, hwena angkam hom. Zen nabakam sa etan juwen zi mo lang nakon sewese zala. Okamanak de zini hla tankam sa denggwanblal, sap zen jek-jak gwen nakon sa etan jowe zala. Hwena Alap mo Domba Tane sa nabakam etan hendep denaban timbwas tala. Tingare zini molya dowala insa denggwanblak. Hwena diki auhu-kamana ansa de yang gulsun sremnak men zeno mae mo bosem-sesa ale dabir-zim srem gwek hendep de engaya gwen hap de wenyik mo bosemse nabare bukunak, zen zen en sa denggwanblal.
⁹ “Enlala blal wenya, zen en sa otweran dowala in hap dena dam nulsuk gwer: Tujukam de nola, zeno dam gulsunnu, zen tujukam de kwatap bete-tek, men zewe wenya in nikin gwenanke. Tujukam de nola in hen, zeno aha dam gulsunnu, tujukam de teipsin-teipsinni.
¹⁰ Teipsin-teipsin wenya in, aha-ere taha-tap enkam mes juwe gwek. Ahana nama irik giꞌira, hen ahana nama hom hataꞌara. Zen kim de hataꞌan zaka, zen hen molya holokam irik gilki, ki sa hen tili.
¹¹ Hen otweran dowala in zen de juwen zi mo lang nakon etan ngaya gwen hap sewe seꞌan zaka, zen kim orep gweka, zen tujukam de teipsin wenya men zen lowehe gwek, dekam hen man teipsinkim gweka. Zen zeno mae mo ahana. Zen kim de etan joweꞌan zaka, zen sa etan dekam teipsinkim irik gili. Zep sa tim dir, ‘An teipsinni delapanna.’ Hwena zen hen molya holo gweka, ki sa hen timbwas gwera.
¹² Nola kore hli-hlina insa dare taha-tapkam hlauludala, zen hen dare taha-tapkam de teipsin-teipsinni. Zen angkam nama hom irik niꞌin, hwena zen otweran dowala in mo alp nakon sa sren-srenkam de langnak irik nilidal. Hwena zen hen holokam molya irik nilidak.
¹³ Dare taha-tapkam de teipsin-teipsin wenya in, zen sa enlalana aha-en dal, hendep zep sa zere mae mo irik ginni otweran dowala in hap tapbla nulblir.
¹⁴ Otweran dowala in sa Alap mo Domba Tanena in han zereijala. Hwena Domba Tanena in zere hon de ang ta gwen wenya ban sa zitimbwas tabiri. Sap Domba Tanena in Zen– Teipsin Zini Bian. Hen Zen tingare teipsin zi mo Teipsinni. Men zen Desa ang neblaꞌan, zen Zena mensa hlil inkike hen kwang guludakake, hen men zen Zebon onak tatem ezaukke.”
¹⁵ Ki zep etan Alap mo dam taha nakore zini in asa e yala Babel hap denaka gubluka, “Weya yawala insa kahalo soson wenya in mo alp san hlaulu, zen hen weya tangansa hom. Zeno dam gulsunnu, zen tingare zi ausu, tingare kirekam-kirekam sop nwe-mase zi ausu, hen tingare kirekam-kirekam ol ton gwibin zi ausu.
¹⁶ Hwena otweran dowala in hen nola kore hli dare taha-tap zem in han sa lamkam kahalo soson wenya insa jal neibir, hendep zen sa zeno kire-kirena alal dabir hen sa irkare nul. Zen sa hendep zeno ninni dwinbir, hendep tokna syauknuk sa ang nulsul.
¹⁷ Zen Alap Zen sa kirekam de enlalana ing ta sonezimdi– zere mo dwam gwibin sin dikim syal gwibin hip. Zen in zep sa dare taha-tapkam de teipsin-teipsin wenya in zere mae mo irik ginni otweran dowala in hap tapbla nulblir. Zen dekam otweran dowala insa sa betek neblal, hendep mensa Alap kirekam de syal gwibin hip hamal hap gubiridaka mes ki su nulsonek.
¹⁸ “Hen kahalo soson wenya insa hlaulu, desa de dam gulsunnu, zen e yawala in zen langna beyakam irik giꞌinke.”