Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'ena 'iduanga de ngoino 'ikula 'o gota ma ngogu moi 'isoka 'o papadi de 'isoka 'o du-duga, de 'isuloko 'ingose 'ato, "Tagi natuga ma Jo'oungu ma Dutu wi Woa de 'o su-suba 'idu-dutuuku ma ngii. De nakidoimi kokia manga gudai gee yosuba-suba ma dodaka doka.

² Ma 'uwa natuga ma Jo'oungu ma Dutu 'awi Woa ma ginitara 'ingoa-ngoatika. Sababu ge'ena wokulakau 'o nyawa-nyawaka gee kowingaku-ngakuwa. 'Ona 'asa yaparetano 'o Yerusalem ma kota ge'ena la ma Jo'oungu ma Dutu 'awi kota ge'ena 'o mede nagi soata de modidino.

³ Ngoi 'asa takisuloko 'ai sakisii yamididi gee yomasinoaku 'o balisa ma baju, 'ona 'asa yosikawasa 'ai habari de yobalisa 'o wange caana moi de 'o ratusu modidi de nagi butangano."

⁴ 'O sakisii yamididi ge'ena la 'o zaitun 'o utu modidi de 'o silo ma to-todenge 'o ngai modidi gee ma Jou 'o sagala moi-moi wosidadi-dadi 'awi bionoka.

⁵ Nako 'o nyawa yomau yositaili manga singina 'itorou 'onaka, ge'ena manga 'urude 'isupu 'o 'uku gee yakibinasa 'o nyawa manga singina 'ito-torou go'ona. De ma ngekomo ge'ena, 'o nyawa 'iodumu gee yomau yobadingaka 'onaka 'asa yakito'oma.

⁶ 'Ona ma Jo'oungu ma Dutu wakikula 'o kuasa ma ngale yodiai koibesakuwa ma do'ingo 'ona yosikawasa 'o habari ma Jo'oungu ma Dutuno. Mita wakikula 'o kuasa ma ngale yadiai 'o 'akere 'iodumu 'idadi 'o 'aunu. De wakikula 'o kuasa ma ngale yatorou 'o dunia de 'o bodito 'i'ini-'inioka, ma 'orasi kokia naga bato yomau yadiai.

⁷ Gedagee 'ona yaduanga yosihabari 'o habari ma Jo'oungu ma Dutuno ge'ena, de 'o haewani ko biasawa 'isupu 'o ngomasa ma dorou ma ngiide dau de 'ikiniiki yamididika go'ona sigado yakito'omaka.

⁸ De to 'ona manga maieti 'asa 'ilolokie 'o tapakioka 'o kota ma amokoka gee kiaka naga to 'ona manga Jou wisidele. 'O kota ge'ena 'o nyawa yosi'ade-'ade yosironga 'o Sodom bolo 'o Mesir.

⁹ 'O nyawa naga 'o sagala negarano, 'o sagala sukuno, 'o sagala demo moi-moino de 'o soana 'iodumino 'asa yaino de yamake yamididi go'ona manga maieti 'o wange sa'ange de ma songonano. De koyosidabiwa 'o maieti ge'ena yapo'osuku.

¹⁰ 'O nyawa 'o duniaka 'iodumu 'asa yomorene sababu 'o sakisii yamididi gee 'o duniaka yosisangisarakau go'ona yosongenokau. 'Ona 'asa yodarame de manga parasengi yomasikadingoto.

¹¹ 'O wange sa'ange de ma songona, de ma Jo'oungu ma Dutu wakikula 'o ngomasa gee yakisiwango-wango, so 'o nabii yamididi go'ona yowangoli. De 'ona yoma'oko so 'o nyawa 'iodumu gee yakimake 'onaka yakimodongo ma sala.

¹² Ge'enaka de 'o nabii yamididi go'ona yo'isene 'o 'ilingi 'iamo-amokie 'o sorogaaku 'ibicara 'onaka 'ingose 'ato, "Nou, niodoade ningie!" Ge'enaka de to 'ona manga musu-musu manga bionoka 'ona yodoa 'o sorogaade 'o kakamoro yakisaono.

¹³ De ma 'orasi ge'ena 'i'osu 'iku-kuatino so ma kotaka ge'ena 'o woa-woa 'isoka 'o bula mogiookoka gee 'o bula moi 'itorou 'ibootuku. De yacaana tumudiingi yosongene sababu 'o 'osu ge'ena. 'O nyawa 'iregu gee yakimodongo so wisiarene ma Jo'oungu ma Dutu, yongose 'ato, "Ka ma Jo'oungu ma Dutu 'o sorogaaka duga 'awi kuasa 'iamoko de 'awi singina 'ifoloi 'isure!"

¹⁴ 'O bodito gee 'isigali ma modidi 'ipasakau, ma niosi-singina, 'o bahaya gee 'isigali ma sa'ange rekeni 'iboau.

¹⁵ Ge'enaka de 'o mala'ekati moioli yauwaka ma torompet so ma tumudiingou, de 'o sorogaaka yo'isene 'o 'ilingi 'iamo-amokie 'ingose 'ato, "'O kuasa ma ngale yapareta 'o dunia ma 'orasi ne'ena naga, ge'ena la ma Jo'oungu ma Dutu de 'una gee ma Jo'oungu ma Dutu Wiiri-irikokau manga giama ma soatoka. 'Una 'asa wopareta kaisi'ado-'adonika!"

¹⁶ So yosibalu-balusu yamonaoko de soata gee yogogerie manga kurusiioka ma Jo'oungu ma Dutu 'awi bionoka, yobukuku de wisuba ma Jo'oungu ma Dutu.

¹⁷ 'Ona kayongosekau, "Jou, Jo'oungu ma Dutu, 'ani kuasa ma batingi koi'iwa, gee no'ahu kaisi'ado-'adonika! Ngomi mio'amalaha ngonaka sababu ngona napakekau 'ani kuasa 'iamo-amoko, de nomulaengokau nopareta!

¹⁸ Jou, 'o nyawa gee koninako-nakowa posironga yongamoka, ma ma 'orasi ya'adonokau ngona nakisikilioro 'okia naga yodi-diaiokau, de ma 'orasi ya'adonokau nakilega ma diai 'o nyawa yosonge-songene. Ne'enau ma 'orasi ma ngale nakikula 'o parasengi 'ani nabii-nabiika de gee 'o nyawa nile-leleanika, de 'ani nyawa 'iodumika ge'ena la 'o nyawa gee yosuba-suba de yosingou-ngounu ngonaka, 'o nyawa ma amoko bolo ka biasa. Ne'enau ma 'orasi yakitorouoka 'o nyawa-nyawa gee 'o dunia yato-torou!"

¹⁹ So ma Jo'oungu ma Dutu 'awi Woa 'o sorogaaka 'ipelenga, de ma dodaka tamakeka 'o Jaji ma Peti. Ge'enaka de 'o tawi-tawi kaimakadowangou, 'o duturu 'ikapotoka, de 'o 'osu de 'o 'eis 'itotaka ma rikimoka.

Wahyu

Video Wahyu 11

Ikuti Kami:

KONTAK | PARTISIPASI | DONASI